✓ قانع (1898 - 1965)
- پێنجخشتەکی لەسەر شیعرێکی فایەق بێکەس (1905 - 1948)
ئەی وەتەن ئەم جارە نەمرم بەم دڵەی نەسرەوتەوە
گەر نەجاتم بوو لەدەس ناوچاوی لار و چەوتەوە
بۆ نەجاتی تۆ بەوەڵڵا دەچمە گێژی مەوتەوە
ئەی وەتەن مەفتوونی تۆم و شێوەتم بیر کەوتەوە
وەختی بەندیی و ئەسارەت پێ بە تەوق و کۆتەوە
تۆ نەڵێی من بێوەجاخم قەت خەیاڵی وا نەکەی
تیر و تانەی ساردوسڕ هەرگیز لە لاوانت نەدەی
قەت مەفەرموو ڕۆڵەکانم نووستووون وا زەن نەبەی
من لە زیکر و فیکری تۆ غافڵ نەبووم وا تێ نەگەی
حەپس و تێهەڵدان و زیللەت تۆی لەبیر بردۆتەوە
دەستەدۆعای تۆیە بەخوا ئەو کەسەی وا زاهیدە
نووکی خامەی شاعیرانت بۆ زەلیلیت شاهیدە
دەمبەدەم هەر وا ئەڵێ بۆ تۆ ئەوەی وا عابیدە
بەو خودایەی بێشەریک و لامەکان و واحیدە
عەشقی تۆ نەوعێ لە دڵما ئاگری کردۆتەوە
هێندە سەرگەرمە کوڕت کاتێ کە سەر دێنێتە دەر
پێ لە خوێنی خۆی ئەنێت دەربەس نییە بۆ ڕۆح و سەر
ئاگری تێ چوو بەجارێ کەوتە سەر شین و چەمەر
ئاگرێکی وا هەزار ساڵ ئاوی بڕژێنیتە سەر
قەت گڕ و گڵپە و بڵێسەی تا ئەبەد نەکوژێتەوە
ئەی وەتەن پارەپەرەستی زوو کە ئێمەی کرد بە پەن
ڕۆژهەڵات و ڕۆژنشینت تانەمان وا لێ ئەدەن
تۆش نەڵێی ئێمە دەزانین خەزنەکەت بۆ کوێ ئەبەن
باسی مەحزوونی و کەساسی خۆت نەکەی تۆخوا وەتەن
چونکە بەو باسە برین و زامەکەم ئەکولێتەوە
لاوەکەم نووکی قەڵەم دڵ دوژمنی پێ هەڵدڕە
گەر قەڵەم شیوەن نەکا خەڵفەنەمامێکی زڕە
ئەی وەتەن حەڵقەی کەلەپچەی دەست و پێت سا هەڵچڕە
ماتەمینی تا بەکەی دەی پێ کەنە و سەر هەڵبڕە
موفتەخیر بە، شۆرەتت وا عالەمی گرتۆتەوە
موژدە بێ وا چاوی کردۆ کۆمەڵی لاوانی تۆ
سەیری مێژوو کە و بخوێنێ دەفتەر و دیوانی تۆ
بێنە بەرچاوت ئەساسی دەبدەبەی بابانی تۆ
نەگبەتی لاچوو سەعادەت بۆتە پشتیوانی تۆ
کەوکەبی بەخت و فریشتەت بەرزە ئەدرەوشێتەوە
ئەی وەتەن تۆ خۆشی دڵم و هێزی ئەژنۆ و باڵمی
بۆ چرای ڕووناکی دەردی ژینی ترش و تاڵمی
بێدرۆ تۆ تاجی فەخر و سێبەری ئیقباڵمی
گەرچی بەینێکە زەلیل و دیلی دەستی زاڵمی
نەوبەتی شادیتە ئەمجا ناحەزت لێک بێتەوە
ئەی گەلی پاشکەوتوو بەسیە شینی بێهەڵمەت چییە
بێتەکان سەد ساڵ بگریەی بێسەمەر داری بییە
هەر نەمامێ تۆ بە خوێن ئاوی نەدەی دڕکی زییە
لافی میللییەت بە دەم لەم عەسرەدا کەڵکی نییە
ڕۆژی هەوڵە هەر بە هیممەت گۆی هونەر ئەبرێتەوە
ئەی وەتەن من بولبولی گوڵزاری کوردستانتم
بێتە ڕۆژی سەربڕین سەربازی ڕووی مەیدانتم
ڕۆحەکەم پێشکەش ئەکەم وەک قۆچەکەی قوربانتم
بەسیە تەعنەم لێ مەدەن هەر ڕۆڵەکەی جارانتم
هێندە حیلمت بێ هەتاکوو دەست و پێم ئەکرێتەوە
باڵی هەڵماڵی لە ڕێتا سەربەسەر شاهـ و گەدا
هەر کەسێ بۆ خۆی بەتەنیا سەر لە ڕێی سەرتا ئەدا
گوێ گرە بۆ خوار و ژوور چۆن گشت ئەڵێن لەم کاتەدا
شەرتە شەرتی پیاوەتی بێ گەر خودا دەستم بدا
دوژمنت پەت کەم وەکوو سەگ بیخەمە ژێر پێتەوە
Kurdish_Poetry
ڤەژینبوکس