٤٥٥٢

✓ ئەحمەدی کۆر (1771 - 1856)

ئەی ماهی دوو هەفتە ڕوخی، سیمینبەدەنی تۆ
سەرچەشمەیی کەوسەر، چەهی زەمزەم زەقەنی تۆ
من مەیخۆر و مەستی لەبی لەعلی یەمەنی تۆ
هەر چەند سیەهچەردە و کووتاهتەنی تۆ
سەردەستەیی عوششاقی و شیرینسوخەنی تۆ

ئەی شۆخ بە قامەت تۆ نیهالی چەمەنانی
سەروی سەهی، قەدعەڕعەڕی، شای سیمتەنانی
غارەتگەری عەقڵ، ئافەتی دین، قەلبی و جانی
دەرمان و دەوایی دڵی ئەهلی مەرەزانی
گەر تەعمی بکەن شەربەتی غونچەی دەهەنی تۆ

خەڵقان بە خودا یاری مە سەرپشکی گوڵانە
سەرداری هەموو میللەتی سەر ڕوویی جیهانە
عەیشی دڵ و لەززاتی بەدەن، ڕاحەتی جانە
هر چند جدا از منی بێشک تۆ بزانە
از روز ازل تا به ابد جان منی تو

لەیلایی عەرەب، شیرینی ئەرمەن، شەهی دڵدار
بەڵقیس و گوڵەندام و زوڵەیخایی بە ڕەفتار
گیسوی چو مشکین تو مانند سیه‌مار
داییم لەبۆ عوششاقی دە مەحزوونی دڵئازار
با غمزه و ناز، پنجه‌ی شیران فکن تو

لەو ڕۆژە کە خیلقەت بووە دەشتودەر و دنیا
نە لەیلی، نە شیرین، نە عوزرا, نە زولەیخا
کەس نەبووە بە مانەندی تۆ مەحبووب و بێهەمتا
مەجنوون و فەرهاد، یۆسف و وامیق بۆ تۆ شەیدا
چون شمه‌ای در غنچه‌ی گل پیرهن تو

ئەی شیرینی خووبانی دوو عالەم بە تەمامی
سەردەستەیی جوانانی لە دنیای نیکوونامی
عاشق بەتەمای تۆن قەبووڵ کەی بە غوڵامی
یەک تاری لە زولفی تۆ بەسە عارف و عامی
چی لەحزەیێ دی شوعلەیی وەجهی حەسەنی تۆ

ئەی شۆخی شەکەرلەب، ئەتۆ مەحبووبی لە عالەم
شاهان، چ سکەندەر، چ فەرەیدوون و چ حاتەم
پابووسە لەبۆت، زوبدەیی نەسلی بەنی ئادەم
ساحێبی سیەهمار و ئیلان، ئەژدەر و ئەرقەم
ئاهووی خوتەنی، مامزی سەحرای وەتەنی تۆ

سەد ناوی خودا لەو قەدی وەک سەروی ڕەوانت
لەو لەفز و کەلامی شەکەرین، نوتقی دەهانت
لەو تاقی دوو ئەبرۆیی وەکی قەوس و کەمانت
سەد جار بەجارێک سەری من فیدیەیی جانت
چونکە لە جیهان سەروقەد و یاسەمەنی تۆ

تا وەقتێ دەبێ چاوی مە از خاکی لەحەد پڕ
قالب دەبێ ساکن، لە بینایی حەجەر و قوڕ
خاڵی نییە دڵ لەحزەیێ از ئاگری تیژگڕ
بەو ساحیبی وەک قەوسی پڕ از تیری جگەربڕ
بەو چاوی دەوەک جادووگەری پڕفیتەنی تۆ

یا ڕەببی بە زات و سیفەتی بێخەلەل و عەیب
دانەندەیی سیڕڕ و عەلەن و مەخفی و هەم غەیب
بێفەریە و بێمەریە و لاشەککی و لاڕەیب
وەی نادری نەو توحفە و نەو جەوهەری دەر جەیب
دوور بی لە غەم و دەرد و هوجوومی میحەنی تۆ

ئەی «ئەحمەدی کۆر» سەد کە لە کن خۆت بە زبانی
حەددت نییە مادیح بی لەبۆ دڵبەری جانی
عالەم هەموو موشتاقە بە ڕوخساری جوانی
گەر تامیعی مەحڕەم بی بە ئەسراری نیهانی
از نیک و بد هیچ احدی دم نزنی تو

Kurdish_Poetry

٤٥٣٩

✓ ئەحمەدی کۆر (1771 - 1856)

دڵبەرا تا کەی خەجڵ بێ دڵ لەبەر دەردی درێژە
تۆ خودا ڕەحمت لە دڵ بێ، بەس بە ناحەق خوێن مەڕێژە

بەس بکە قەتڵی ئەسیران، تۆ بەوان پەیکان و تیران
یا مەکووژە هێند فەقیران، یا کە کوشتت زووی بنێژە

هەر چی کوشتت زووی وەشێرە، خوو پڵنگ و سام شێرە
حۆری و زیبا و دلێرە، ئاگری عالەم بڕێژە

ئاگری پڕتین و تابە، زۆر بەئێش و پڕعەزابە
دڵ بەوی برژا و کەبابە، سووت بە ئەو ناری لەمێژە

سووت بە ناری زۆر بەتینە، یار بە عیشقی شای مەدینە
سا وەرە حاڵم ببینە، بەس بە من ژاری بچێژە

بەس بچێژە پێم زەقوومە، تالیعی من زشت و شوومە
بەحری خوێنین دێ لە ڕوومە، دڵ بە مەودای تیغی تێژە

دڵ بە تیغت بوو شەڵاڵە، هەر کە دی حوسن و جەماڵە
باک نییە هیچ قیلوقاڵە، بەو چەقی ڕۆژی درێژە

بۆ چییە ئیسلام و دینە، چونکە بۆ کەس ڕەحمی نینە
کاری ویم هەر قەتڵ و خوینە، عاشقان سەرمەست و گێژە

عاشقان مەستی مەجازە، نین لە عیشقی ڕاستە بازە
تالیبی عومری درازە، ماڵ و دەوڵەت کەڕڕ و گێژە

ماڵ و دەوڵەت سەرف و سوودە، ئەندەروونی بێوجوودە
وەک شەرەر خاڵی لە دوودە، پڕ لە ئاگر، تین بڕێژە

وەک تەنووری پڕ لە قینە، هەر دەسووتێ چینبەچینە
عاشقان پڕ لە برینە، خوێن لە ڕووح و جان بڕێژە

شیبهی خاشاک و غوبارم، چاوەڕێی پابۆسی یارم
چیدی نین هاوار و کارم، غەیری ناڵە و قێژەقێژە

«ئەحمەدی کۆر» ـی هەژارە، گەرچی پێت نین ئیختیارە
دەردی دڵ پەنهان بدارە، ڕازی خۆت بۆ کەس مەبێژە

Kurdish_Poetry

٤٢٨٩

 

✓ ئەحمەدی کۆر (1771 - 1856)

ئەلا ئەی عاشقی دڵساف، کەلام كَاللُّؤْلُؤِ الْمَكْنُون
لە ئەوساف و لە مەدحی یار، بەیان کە شیعری خۆشمەزموون

بەیان کە شیعری پڕلەززەت، لە مەدحی یاری نوورجەبهەت
مەکە تەرک تاکوو ماوی قەت، لە ڕوبعی ساکین و مەسکوون

ئەتۆی شادی دڵی غەمگین، زەوالی عەقڵ و عومر و دین
وەها شۆخ و وەها شیرین، حەبیبی میسلی تۆ کەی بوون

وەکوو تۆ نین و نابن کەس، دڵی مەحرووقی چون قەقنەس
لە ئاهـ و ناڵە ناکەم بەس، غەریقی بەحرم و جەیحوون

غەریقی مەوج و گێژاوم، گرفتارم هەتا ماوم
بە ناری عیشق سووتاوم، دڵ و جان و جگەر پڕخوون

دڵ و جان مایەیی دەردە، بە ئاهـ و ناڵەیی سەردە
وەکوو پەروانە بێپەردە، دەسووتێ شوبهەتی زەیتوون

دەسووتێتن وەکوو شەمعە، لە چاوانم دییەن دەمعە
لە من غەم تیپی بەست جەمعە، وەکۆ بوون بۆ دڵی مەحزوون

ئەگەر نیزیک، ئەگەر دووری، زیای زوڵماتی دەیجووری
بە شوعلەی ڕوویی پڕنووری، دەکەی شەمس و قەمەر مەدیوون

ڕوویی تۆ ماهی شەوگارە، لەبت لەعلێ شەکەبارە
لە من هێند دوور و بێزارە، میسالی بێکەسی مەتعوون

لەبەر تۆ ساکینی نارم، مەلوول و مات و خەمبارم
بێبار و خویش و غەمخوارم، لە کوللی مەخلووقات بیروون

لە قەوم و خوێش و یار و غەیر، دەبووم ئاوارە شیبهی تەیر
لە باغی یار نەمکرد سەیر، دوو چاوم دامیعی سەیحوون

دوو چاوم ئەشکڕێژانن، هەمیشە سەیلی بارانن
میسالی مەوجی عەممانن، نەدیم حوسنت بە دیدەی ڕوون

نەدیم سەفحەی جەبینجامت، دڵ و جانم فیدای نامت
دەبێژم خاکی ئەقدامت، بە ئاوی دیدەکەم مەعجوون

بە ئاوی دیدەکەم قوڕ بێ، هەتا پڕتابش و گڕ بێ
لە ئاهـ و ناڵە دڵ پڕ بێ، لە دەستم عەیشی دنیا چوون

لە دەست ئەو دڵبەری جانی، بووم یەکجار فەنا و فانی
غەم و ئەندووهـ و هیجرانی، دڵی عاشق دەکا مەحزوون

بە ئەمری قادری مەعبوود، وەکوو خۆی قەستی کرد مەقسوود
هەوەڵ، ساعەت کە بووی مەوجوود، موکەححەل، مەختوون و مەدهوون

لە ڕووی تۆ مانگ و ڕۆژ تارن، لەبت لەعلی شەکەربارن
لە من چەند دوور و بێزارن، میسالی ئەحمەدی مەفتوون

میسالی ئەحمەدی دڵبەر، لە شەرق و غەرب و بەحر و بەڕ
تۆ عالەم بووی بە خێر و شەڕ، بە ئەمری قادری بێچوون

بە ئەمری قادری قەییووم، ئەزی بەدبەختی تالیعشووم
هەتا کەی لێم نەبێ مەعلووم، ببینم سووڕەتی مەوزوون

ببینم سووڕەتی یارێ، کەناری باغ و گوڵزارێ
بەعەینی شوبهی بەهارێ، وەنەوشە و سوێسن و بەیبوون

وەنەوشە و سونبول و وەردن، دەوای چەندین غەم و دەردن
میسالی کەعبە لێم فەردن، تەواف کەم، ئەز بِلا عُيُون

ئەلا ئەی شافیعی موزنیب، حەبیبی مەشریق و مەغریب
خەلاسم کەی شەهی یەسریب، لە دەستی ئەژدەری مەلعوون

لە دەستی نەفسی ئەممارە، هەوای دنیایی مەککارە
دەگەڵ ئیبلیسی بەدچارە، لە مەکری کەس نییە مەئموون

لە مەکری کەس ئەمین نابێ، دڵێک حوببی وی تێدا بێ
غەریقی مەوج و گەردابێ، میسالی کەشتیی مەشحوون

جیهان چون کەشتیی شەشدەر، بینای کرد خالیقی ئەکبەر
بە پێنج و چوار تەبەق یەکسەر، مودەووەر چەرخی بێئەستوون

بەهەشتی حەوت و هەشت ئاگر، قەدیم و قەییوم و قادر
لە ڕووی مەخلووقی کرد زاهیر، بە ئەنجوم زینەتی کردوون

قەڵەم، کورسی و لەوح و عەرش، زەمین و ئاسمان و فەرش
زەمان و هەم جیهان هەر شەش، سەبەب، تۆی خالیقی گەردوون

شەو و ڕۆژ ساعەت و وەقتە، مەهـ و ساڵ جامیعی وەختە
گڵ و ئاو، نار و بای سەختە، بە ڕەسم و ڕەونەق و قانوون

لەقایی خالیقی مەخلووق، لەبۆ عوششاقی دڵمەحرووق
بینای کرد سەدهەزار مەعشووق، لە قەتڵی عاشقان مەئزوون

هەموو قەتتال و عاشقکوش، بە ئەبرۆی قەوسی پڕجونبوش
موژەی چون تیری دەرگەردش، بە ڕوخ چون لالەیی هاموون

بە فیرقەت سووت دڵ و جیسمە، حەق ئەو جاریش بدا قیسمە
ببینم قەبری ئەو ئیسمە، هەوەڵ میم و لە ئاخر نوون

میم محەممەد، نوون ئەمینە، پایە وو ئەستوونی دینە
چی بەوی ئیمانی نینە، جەزایەتی عەزابی هوون

Kurdish_Poetry

٤٢٧٧

 

✓ ئەحمەدی کۆر (1771 - 1856)

شەو دێ لە عومرم کەم دەبێ، جا چۆن دڵم پڕغەم نەبێ؟
ڕۆژ دێ لە عومرم کەم دەبێ، جا چۆن دڵم پڕغەم نەبێ؟

دنیا بەوەندە مەکر و فەن، ڕۆح خۆشەویستە دەر بەدەن
هیجرەت دەکاتن "از" بەدەن، جا چۆن دڵم پڕغەم نەبێ؟

هەر کەس کە بیبێتن کەماڵ، دنیای وا پووچ و بەتاڵ
نەیکا دەبێ قەتقەت خەیاڵ، جا چۆن دڵم پڕغەم نەبێ؟

منداڵ و خزم و دایک و باب، دەمرن ئیدی نادەن جەواب
بۆ تۆ بەسە هێندە خیتاب، جا چۆن دڵم پڕغەم نەبێ؟

دنیا بۆ کەس ناچێتە سەر، بێئیعتیبارە و بێهونەر
دەمرن فەقیر و موعتەبەر، جا چۆن دڵم پڕغەم نەبێ؟

خاکین دەبێ ببین بە خاک، دانیشتووین بێخۆف و باک
مەعلوومە هەر دەبین هیلاک، جا چۆن دڵم پڕغەم نەبێ؟

بەو خوایە پێت دەڵێم فەقیر، ئەتۆ خودا مەکە لەبیر
وەختێ دەبێ بکەویە گیر، جا چۆن دڵم پڕغەم نەبێ؟

دایم لە دوام شەقیە ئەجەل، ئەو توندوتیژ من کوێر و شەل
دەمخاتە ناو داوی ئەمەل، جا چۆن دڵم پڕغەم نەبێ؟

غەڕڕە مەبە، غەڕڕە مەبە، چی فەرموو حەق تۆش هەر وە بە
ڕابرد چی دەسگا و دەبدەبە، جا چۆن دڵم پڕغەم نەبێ؟

چەند هاتن و چوون سوڵتان و شا، مردن لە تەختی بوون جودا
واحید دەمێنێ هەر خودا، جا چۆن دڵم پڕغەم نەبێ؟

ماڵ و خێزان و دەوڵەتم، لەحزێکی نادەن مۆڵەتم
لێم تێک دەدەن جێ و حورمەتم، جا چۆن دڵم پڕغەم نەبێ؟

لەو قەبرەدا تاریک و قووڵ، دادەنیشن مات و مەلوول
ناکرێین عیلاج بە زێڕ و پووڵ، جا چۆن دڵم پڕغەم نەبێ؟

لەو قەبرەدا تەنیا نەفەس، بۆ کەس نییە فەریادڕەس
چاکە بکەین تەرکی هەوەس، جا چۆن دڵم پڕغەم نەبێ؟

غەمگینی دڵم چاترە، بەزاهیر نەفسم کافرە
لێم دەمرن دۆست و برا، جا چۆن دڵم پڕغەم نەبێ؟

ئەوجار وەرە سەیری مەزار، مردن فەقیران و هەژار
کەوتوون تێیدا چەندین هەزار، جا چۆن دڵم پڕغەم نەبێ؟

قەت نوێژ و ڕۆژوو ناگری، بۆ کاری دنیا حازری
پێت وایە قەتقەت نامری، جا چۆن دڵم پڕغەم نەبێ؟

«ئەحمەد» بەس کە لە خەبەران، سینەت خەزێنەی گەوهەران
نەسیحەتە بۆ برادەران، جا چۆن دڵم پڕغەم نەبێ؟

ئەی «ئەحمەدی کۆر» ـی فەقیر، بە دەستی نەفس بووی ئەسیر
جەهەننەمت کردوە لەبیر، جا چۆن دڵم پڕغەم نەبێ؟

Kurdish_Poetry

٤١٨٥

 

✓ ئەحمەدی کۆر (1771 - 1856)

دڵبەران داییم دەناڵم، دەمبەدەم شام و سەحەر
جارێ ناپرسی لە حاڵم، چاوعوقابی خۆشخەبەر

چاوعوقابی مەهجەماڵی، دوژمنی کوفر و زەلالی
نووری سیڕڕی لایەزالی، کاشفی شَقَّ الْقَمَر

کاشفی قەمەر دوونیمی، فاتحی دەرگای نەعیمی
شافعی يَوْمُ الْأَلِيمي، أَنتَ لِي نورُ الْبَصَر

نووری بینایی دوو چاوم، بێ فیدات ڕۆح و هەناوم
هەڵگیراوە خورد و خاوم، خواردنم بۆتە زەهەر

خواردنم خوێن و زوخاوە، سەبر و هۆشم لێ بڕاوە
ئاگری دڵ وا بەتاوە، میسلی شەمعی نێو فەنەر

وەک فەنەر دڵ پڕ لە نارم، باری عیسیان بۆتە بارم
ڕووسیاهـ و شەرمەسارم، من لەبەر يَوْمُ الْخَطَر

من لەبەر يَوْمُ الْمَماتم دێ کە قابیز بۆ حەیاتم
وا خەجڵ بێهۆش و ماتم، نامێنێ هۆش و سەبەر

نامێنێ هۆش لەو سەعاتێ، ڕۆح دەگاتە جێی نەهاتێ
دەفتەری دونیام دەداتێ، نامێنێ مەیلی پسەر

نامێنێ مەیلی جیهانم، دێتە جونبش ڕۆح و گیانم
گەر لە گیر لاچێ زبانم، نێوی حەقمان دێتە بەر

نێوی حەق دێنم بە زارە، تەن گەلێک تەشنە و بیمارە
دڵ هەمیشە ئینتیزارە، هەر دەڵێ ماءُ الْقَطَر

ئاخ لەبۆ یەک قەترە ئاوە، ئەو دەمەی دونیا تەواوە
شاهـ و دەروێش تۆپێ جاوە، قَد دَخَلْتَ في الْقَبَر

تا قیامەت قەبرە ماڵم، دێن مەلاییک بۆ سوئالم
ڕەببی تۆی موخبیر بە حاڵم، نەمخەیە سەر ڕێی خەتەر

نەمخەیە سەر ڕێی زەلالەت، لێم دەپرسن زۆر بەشیددت
قالَ مَن رَبِّکَ مَیّت کێت پەرەست، کێت پێغەمبەر

کێت پەرستووە، کوا ئیمامت، مەزهەب و دین و کەلامت؟
حەشر و میزان و مەقامت، بۆم بەیان کە ئەو خەبەر

بۆم بەیان کە سیڕڕی قەلبی، ئەی خودایە تۆم تەبیبی
من دەڵێم اَللّه رَبِّي، با خەلاس بم لەو خەتەر

با خەلاس بین لەو مەقامە، ئاخری دونیا تەمامە
جەمعی ئۆممەت خاس و عامە، ڕێی حەشرمان دێتە بەر

دەشتی مەحشەر وا دەبەستن، جەمعی مەخلووق سەف دەبەستن
یەکهەزار ساڵ ڕادەوستن، لێمان ناپرسن خەبەر

ناپرسن لێمان چ حاڵە، دەشتی مەحشەر دێتە ناڵە
ئاگر و پۆلوو و زوخاڵە، نامێنێ حیلم و بەسەر

نامێنێ عیلاج و چارە، چەند هەزار کەس بێژمارە
باب لە فەرزەندی بێزارە، ئەو لەبەر شین و چەمەر

ئەو لەبەر گریان و شینە، قَالوا يَارَبِّ رَضِينَا
کوا محەممەد شای مەدینە، بۆچ لێمان نابێ خەبەر؟

بۆچ خەبەردار نابێ لێمان، سووت دڵ و جەرگ، قەلب و پێمان
یەکهەزار ساڵ حەشرە جێمان، کوا حەبیبی ڕۆژی حەشەر

کوا حەبیبی کوللی عالەم مَا تَقَدَّم قَبلَ آدم
پاک لە مەحشەردا بووین جەم، بوو زوخاڵ سەمع و بەسەر

بوو زوخاڵ سەمع و بەسەرمان، باری عیسیان کەوتە سەرمان
چاو کە هەڵنایە لە شەرمان، دەستەوئەژنۆ قوڕبەسەر

دەستەوئەژنۆ ڕۆدەنیشن، پڕگوناهان ڕادەکێشن
خێر و عیسیانمان دەکێشن، هەم بە میزان سەربەسەر

پڕگوناهان دێن و چوونە، دەفتەری وان سەرنگوونە
فَاقْرَءُوا مَا تَفْعَلُونَ، قَدْ دَخَلْتَ فِي السَّقَرَ

ئەو سەقەر ئاورگڕینە، بۆ کوفاران زۆر بەتینە
دێتە سەر عالەم بە کینە، نامێنێ هۆش و خەبەر

نامێنێ هۆش لەو سەعاتە، دێ جەهەننەم بانگ دەکاتە
کوانێ تاریکەسەلاتە، چاوەڕێی وانە سەقەر

جێ و مەقاممان زەمهەڕیرە، باسی مەحشەر زۆر کەسیرە
پێغەمبەرمان دەستگیرە، چاکە بیکەین موختەسەر

موختەسەر کەین باسی زیللەت، دەکرێ حەشری کوللی ئوممەت
یەک بەڕەحمەت، یەک بەزەحمەت، ڕێی سیڕاتمان دێتە بەر

بۆن شەفیع کە تۆ بە ڕەحمەت، نەنخەیە تاریک و زوڵمەت
پێن عەتا کە قەسری جەننەت أَعْطِنَا طوبا شەجەر

دێتە بەرمان ڕێی سیڕاتە، بۆ گونەهبار، جێی نەهاتە
یا ڕەبی بندەی نەجاتە، بۆن شەفیع کە پڕ پێغەمبەر

تۆی شەفیعولموزنیبینە، لەو دەمەی ئاور بەتینە
تۆی پەنای مە شای مەدینە! بۆن شەفیع کە پڕهونەر

«ئەحمەدی کۆر» ـی فەقیرە، حەق تەعالا دەستگیرە
باری عیسیانت کەبیرە، نەخەیە سەر ڕێی خەتەر

Kurdish_Poetry

٤٠٨٩

 

✓ ئەحمەدی کۆر (1771 - 1856)

ئاخ لە دەستی جەوری خووبان ئەز دەناڵم ڕۆژ و شەب
زەهری ماریش بێ دەنۆشم با خەلاس بم لەو غەزەب
دەردی عیشقی وا لە من بوو ئاوری ساحێب لەهەب
زۆر لە قەلبم توند و تاڵ وەک مەنجەنیقی تیژ و تەب

عاشقان ڕەنگزەرد و مەجرووح بوون بە تیغی تازەساو
خورد و خواب و عەقڵ و هۆشم چوو، بینایی هەر دوو چاو
شیبهی مەجنوون ڕووت و عوریان کێو و سەحرایان گەڕاو
ئەز لە مەحبووبان دەکەم حاشا عیشق ناکەم تەڵەب

قەت من لە مەکری خووبڕوویانی جیهان نابم ئەمین
قەوسی ئەبرۆ و تیری موژگان مەرهەمی جەرح و برین
من لە دەستی دڵبەران خۆم کرد زەلیل و دڵبەخوین
کەوتمە حەڵقە و بەند و زنجیری زووڵفی عەقەب

Kurdish_Poetry

٤٠٢٥

 

✓ ئەحمەدی کۆر (1771 - 1856)

دڵبەرا پەی ڕووی فیراقت دڵ دەناڵێ چون ڕوباب
بۆ دوو ئەبرۆی میسلی تاقت بەندی جەرگم بوو کەباب

بوو بە بریان توێی دەروونم، چاو پڕئەسرین دڵزەبوونم
مەحبووبا وا بۆت جنوونم، لێم حەرامە خورد و خاب

خاب و خۆراکم گرینە، ڕەحمەتەن لیعالەمینە
ڕەحمێ کە بە منی حەزینە، با کۆتا بێ ئەم عەزاب

با کۆتا بێ داخ و دەردم، ناڵەناڵ و ئاهی سەردم
بێئەجەل وا بۆ تۆ مردم، پێم بدە جامێ شەراب

پێم کەڕەم کە جورعەیی مەی، لەو مەیەی مردوو دەکا حەی
تۆ بە حەققی ساحەبی مەی، با لە بەین لاچێ حیجاب

با لە بەین لاچێ حیجابە، مەحبووبە ڕۆژی خیتابە
وا دەکەم ئەز خۆم حیسابە، کەمترینم از کیلاب

کەمترینم از سەگانت، از سەگانی پاسەبانت
جانی من قوربانی جانت، گوڵڕوخی ڕووئافتاب

ئافتابی شەوقی عالەم، سەروەری از نەسلی ئادەم
بۆ ڕوسوول تۆ بووی بە خاتەم، ئەی شەهی عالیجەناب

ئەی شەهی لەولاکە لەولاک تۆ لە نووری، ئادەم از خاک
جوملەیی شێخ و وەلی پاک، بوون لە سایەت فەیزیاب

بوون لە سایەت ئەز بەقوربان، مەحرەمی ئەسراری سوبحان
قەلبی عاسیم بوو بە بریان، لەم سەرەڕێی ماڵخەراب

ماڵخەراب و دڵنەخۆشم، عاشقی بێهۆش و گۆشم
خوێنی جەرگی خۆم دەنۆشم، کوورەئاسا دڵ بەتاب

کوورەئاسا دڵ بەتاوم، لەتلەتە جەرگ و هەناوم
وا بە عیشقی تۆ سووتاوم، کەوتمە حاڵی ئیزتیراب

حاڵپەریشان، دەردەدارم، خەستەتەن دڵ پڕغوبارم
هێندە من بێئیختیارم، نایەتە حەدد و حیساب

ئەی شەهی ڕەببی جەلیلە، «ئەحمەدی کۆر»ـی زەلیلە
دامەنی گرتووی دەخیلە، نەیخەیە سەختی و عیتاب

«ئەحمەدی کۆر»ـی هەژارە، چاوەڕێی لوتفێکی یارە
تا بڵێی بێئیختیارە، نایەتە حەدد و حیساب

Kurdish_Poetry

٣٩٦٥

 

✓ ئەحمەدی کۆر

من لە دەستی هیجری جانان لیتنی کنت تراب
یار هەزاری وەک منی کرد خوێن جگەر دڵ چون کەباب
پڕ لەهیبی ئاگر و پڕ سۆز و تابش، هەم بە تاب
هەرچی دەر دنیا و دنیاش گەر هی من بێ بێحیساب
ڕووسیاهم گەر بۆ بۆسەی ژێری پای تۆ پڕ نەدەم

تا لە دنیادا ببم بەندەم لە ئەو خاکی دەرت
مونتەزیر بۆ ڕوئیەتی ڕوخساری ماهی ئەنوەرت
ڕۆژی قوربان میسلی قۆچ خۆ بکەم بە قوربانی سەرت
داخۆ لێم زیز نابی گەر دەست دەم لە باڵای عەرعەرت
تا ببم پێی شاد وەکوو مەغرووق نەجاتم بێ لە یەم

ئاخ لەبۆ یارێکی جانی ساحێبی شەرت و وەفا
کامەران دەر عەیش و شادی بێ، لەسەر زەوق و سەفا
نەک هەمیشە تابیعی جەنگ و جەدەل، جەور و جەفا
هەرچی حەق پێی دا بە عاقیبەت گەیشتە قد عفا
موژدە بێ حاڵی وی، از شش جهت بۆ هات ڕەقەم

بارەکەڵڵا چەند لەتیف و تورک و ڕەند و دڵبەری
زێڕی دەستەوشاری، خاسی خەزنەیی ئەسکەندەری
نەی چو باڵایی بڵندت، تەرزی توولی عەرعەری
تۆ بە من بۆسێک کەرەم کە، لەو دوو لێوی شەککەری
جەنگ مەکە، لێم زیز مەبە، سا پات بنێ سەر چاوەکەم

Kurdish_Poetry

٣٩٦٤

 

✓ ئەحمەدی کۆر

تا لە دنیادا ببم بەندەم لە ئەو خاکی دەرت
مونتەزیر بۆ ڕوئیەتی ڕوخساری ماهی ئەنوەرت
ڕۆژی قوربان میسلی قۆچ خۆ بکەم بە قوربانی سەرت
داخۆ لێم زیز نابی گەر دەست دەم لە باڵای عەرعەرت
تا ببم پێی شاد وەکوو مەغرووق نەجاتم بێ لە یەم

Kurdish_Poetry

٣٨٧٠

 

✓ ئەحمەدی کۆر

گەر تۆ یاری باوەفایی، هێندە سەنگین دڵ مەبە
یا مەکە کەس ئاشنایی، یا نە لێی غافڵ مەبە

غافڵی عەیش و مەعاشی، بە زبان چوست و هەراشی
هەر وەکوو سەنگی سەراشی، لێم بە تۆز و خۆڵ مەبە

خۆت مەکە غەرقانی دەردان، من مەخە ژێر باری بەردان
ڕێگە بگرە میسلی مەردان، دڵ بۆ ئاو و گڵ مەبە

ئاو و گڵ نەخشی دیواری، بێ سەدا و ڕەنگ دیاری
تۆ بە دۆستی ئاشکاری، دوشمنی قاتڵ مەبە

دوشمنی بۆ شێخ و شابی،، قاتڵی عەنقا و عوقابی
تۆ بە مەعشووقە حیسابی، ساکین و حاییل مەبە

ساکنی سەدر و نیقابە، هەر چی هەن پەردە و حیجابە
ساعەتێ دووانم لە لا بە، تۆوی خەردەلگوڵ مەبە

ڕاستە گوڵ بێ خار نینە، هەر چی بەر ڕوویی زەمینە
دڵ لە حاستی من حەزینە، مەخفی و موشکڵ مەبە

خۆت مەکە مەخفی لە پەردە، ڕوویی پاکت هەمچوو وەردە
تۆ خەبەردار نی لە دەردە، یاری ناکامڵ مەبە

یاری باعەقڵ و کەماڵی، باخەبەر لە دەرد و حاڵی
دڵ بە ئیحسان و خیساڵی، تووشی بەدمەنزڵ مەبە

مەنزڵی بەدخواهـ و بەدکەر، مەیکە مەوتەن یاری دڵبەر
عەرزی بێکیشت، داری بێبەر، باغی بێحاسڵ مەبە

باخی بێ میوات و دانی، ڕەنج بەبادە باغەبانی
هێندە با ساعی جیهانی، تالیب و مائیل مەبە

تالبی دنیای غەدارە، هەر کەسێ بیبێ بە یارە
سەعی و ڕەنجی وی خەسارە، مەردی قەت دوودڵ مەبە

سونجوو و خورما ببینە، نێوڕەقی توێکڵ شیرینە
خۆت بە تۆ و ڕێحان بچێنە، عاقیبەت پێکوڵ مەبە

کۆخ و قەیسی نوور جەماڵن، هەر دوو مەردی بەدخیساڵن
توێکڵ خۆشی نێوک تاڵن، تاڵی خۆش توێکڵ مەبە

گوێز و بادام هەر دوو جانن، ئەو لە سێ پەردەی نیهانن
خۆت لەوان چاکتر بزانن، وەک ئیلان قانگل مەبە

بی دەبێ بێ توێکڵ و پەردە، یا نییە یا زەهر و دەردە
بی بەری چون بێخی بەردە، وەک شیلان چڵچڵ مەبە

نەک توو شیلان دڕوو ساقەت، هەر چی دەگرێ بەر نەدا قەت
حەز دەکەی پاک بی لە عیللەت، موفسید و موخیل مەبە

نەک وەکوو گورگی لە گەڕ بی، بۆ موسڵمانان بەزەڕ بی
ساکین ئاسا پێستی مەڕ بی، گورگی خوێن ئاکیل مەبە

هەر چی موفسید ناعەدیلن، ئەو بێ ڕێگە و بێ دەلیلن
عەبدی شەیتانی زەلیلن، شوبری بێ دەلیل مەبە

سۆفی دەبێ دین دروست بێ، نەک لە تاعەت پشتی سست بێ
شەو هەتا ڕۆژ حەقپەرست بێ، قەت سەری بێدڵ مەبە

«ئەحمەدی کۆر» بێ وجوودی، ئەبلەهـ و بێ سەرف و سوودی
کەم نماز و کەم دروودی، وەک خرووس دەنگزل مەبە

Kurdish_Poetry