✓ زاری (1905 - 1982)
ئایەتی سوبحان بەحسی واقیعەی «ئیسرا» ئەکا
نەقڵی چوونی ئەو بە شەو بۆ «مسجدالاقصی» ئەکا
سووڕەتی «والنجم» شاهید بۆ قسەی میعراجیە
دەبدەبەی عیززی لە سەدرە وەک زەوی بەرپا ئەکا
خۆشەویسی بارییە و دەعوەت کرا بۆ لامەکان
جیلوەفەرمایی لە سەدری بەزمی ئەو ئەدنا ئەکا
چاوی ڕێژاوە بە سورمەی سافی «مازاغ البصر»
کەشفی ئەوزاعی فەلەک وەک سەیری «مايغشي» ئەکا
خاتری ئاوێنە بۆ جلوەی جەماڵی «ذوالجلال»
سینە گەنجینەی دوڕ و مەرجانی «مااوحی» ئەکا
چاوی دڵ ڕۆشن بە شۆڵەی ئافتابی «ماكذب»
چاوی سەر بینا بە ئایەی «ربةالكبرى» ئەکا
بۆ ئەمە بێ چوونی چەن دەفعە بە چاوێ دیویە دڵ
دەرکی ئینسانی بە نووری «نزله أخرى» ئەکا
بەهـ! چ ڕۆژێکە لە شەرقی مەککەوە کردی زهوور
خاکی پاکی «طا» بە ڕەشکی «جنت الماوی» ئەکا
پای لە هەر خاکێ کە نا وا بوو موعەتتەر هەر نەفەس
سەد کەڕت نەفرەت لە موشک و عەنبەری سارا ئەکا
یەککەتازێکە لە عەرسەی خۆشەویسیدا لە ژوور
عەرشەوە خەڵوەت لەگەڵ بینایی بێهەمتا ئەکا
بازی تەسدیقی بە تیژی وا لە دەشتی «لا» فڕی
هاتە باغی وەحدەت و تەقریری «الا الله» ئەکا
تیغی تەبلیغی وەها کێشاوە بێ عەجز و قسوور
ئەمری ئیسلامی لە شەرق و غەربدا بەرپا ئەکا
پەنجەپۆڵایێکی بێباکە بە تەنها شەڕ لەگەڵ
شەڕکەرانی قەیسەر و ئەسکەندەر و کیسرا ئەکا
نەسڵی ئادەم بوو لە حەووا زا کەچی ڕۆژی جەزا
ئەم تکا بۆ ئادەم و زوڕڕییەتی حەووا ئەکا
بۆ سبووتی ئیددیعا گەر بێ بجووڵێ غیرەتی
کاری باڵاتر لەوان «شق القمر» داوا ئەکا
بۆ زهووری موعجیزە وەختێ ئیشارەی کردە مانگ
دوولەتی کرد و موعانید چی قسەی بێجا ئەکا
موعجیزەی مووسا لە ئەرزا بوو کە بەحری پارە کرد
یەک ئیشارەی ئەم لە چەرخا کاری سەد مووسا ئەکا
تۆزی ڕێگات ئەی جەنابی موستەفا نەفرەت لە گشت
زیوەری تاجی کەیوومەرس و جەم و دارا ئەکا
گەر بە عومری نۆحەوە شاعیر بنووسێت و بڵێ
سەدیەکی مەدحی ئەتۆ کەی تا ئەبەد ئینشا ئەکا
وا خەریکە ماڵی وێرانی دەروونی خۆ بە نوور
تەلعەتی وەک ئافتاوی ئەنوەرت ئاوا ئەکا
جێبەجێبوونی مورادی خاتری «زاری» لە بەحر
ڕەحمەتت ئەی «رحمةً للعالمين» داوا ئەکا
Kurdish_Poetry
ڤەژینبوکس