نووری ژیــــــــان

٤٤٥١

✓ هێدی (1927 - 2016)

سووچی دەردانە ئەگەر جارێ خەیاڵی مەی دەکەم
ئەو وڵاتە وا نەبێ، من بیری بادە کەی دەکەم

چوو لە چیرۆکی خەما داوێنی نەی گرت مەولەوی
من هەتا ناڵینی خۆم بێ، شیوەنی بێ نەی دەکەم

کۆڕی یاران ساردە، دڕدۆنگن عەزیزان، ئەی خوا
کەنگێ بەو هاوینە چاوەڕوانی سەرمای دەی دەکەم

دوورەدەستە نایگەمێ، چ بکەم فریشتەی ئاشتی
چەندی من لەو ڕێگەدا هەوراز و لێژی تەی دەکەم

قەت بە هەڵکەوتیش نەبوو خۆشی لە ژینمدا، بەڵام
ئەو دەمەی ئەو پەریە خۆی دەنوێنێ، من ئۆخەی دەکەم

مەمکەنە پێخوست لە پیلەی ناڕەوادا، چونکە من
ئارەزووی ژینێکی سادە و هێمن و بێوەی دەکەم

بۆ کەلەبچەی ناکەنە دەستم، ئەرێ پیرانی ژیر
وا دەبینن خۆم دەکووژم، کاری دێوانەی دەکەم

کوردەواری، کۆیلەیی تۆ هەر لە دەوری مادەوە
هەرچی هاتوە چاخی خۆی کردوویە، من ئێستەی دەکەم

هەر لەسەر هەر بەردێکی زێدی شیرنی خۆم جێم هەبێ
جا دەزانی «هێدی» چۆن گاڵتە بە تەختی کەی دەکەم

Kurdish_Poetry

نیشانەکان: هێدی

+ بڵاو کرایەوە لە 2022/3/14 ـدا کاتژمێر 21:58 بەدەستی مانگەشەوی زرێبار |

٤٤٣١

✓ هێدی (1928 - 2016)

لە دەرد و مەینەتی ژینا هەتا زانیم تەمەن ڕۆیی
پەلەی کرد نەیدەویست چیدیکە ئازاری بدەن ڕۆیی

لە دەوری گوڵ دەمێک بوو دەیچریکاند بولبول و ڕۆژێ
کە نازی باغەوانی دی، لە سەیرانی چەمەن ڕۆیی

خەیاڵ تەکبیر و ڕای زۆر کرد هەتا گەییە سەری زولفی
بەڵام زانی ئەوێ بێگانە دەستی بۆ دەبەن ڕۆیی

بە جارێ هاتوچۆی ئەو شۆخە نەزمی گوڵشەنی تێک دا
ئەگەر وەک یاسەمەن هات و ئەگەر وەک نەستەرەن ڕۆیی

دەڵێن ئەو بێوەفایەی تۆ ئەرێ کەی دێ، ئەرێ کەی دێ
ئیتر ناڵێن ئەرێ بۆ هات و وەک ئاسکی خوتەن ڕۆیی

بەیانی سروەیەک هات هەڵوەدای سەیری بەیان ئەمما
بەناکامی ئەگەر زانی یەخەی لێ دادەخەن ڕۆیی

ئەوەندەی دەرد و خەم پێ بوو، دڵی بێچارە سام گرتی
نەوەک ڕۆژێ بڵێن دێوانەیە، زنجیری کەن؛ ڕۆیی

لە سەرمایەی ژیان هیچم نەما، ئاوارەیی هەر ما
لە دەستم چوو، ئەرێ چم کرد؟ تەمەن ڕۆیی وەتەن ڕۆیی

قومارێکی قورس بوو چارەنووس هێنای و دۆڕاندم
ژیانی من بەخۆڕایی لەنێو دارودەوەن ڕۆیی

لە بەر دیدەی منا هەڵبەستەکانم بۆیە سان دەگرن
ئەگەر مردم نەبادا کەس بڵێ «هێدی» ڕەبەن ڕۆیی

Kurdish_Poetry

نیشانەکان: هێدی

+ بڵاو کرایەوە لە 2022/1/23 ـدا کاتژمێر 21:1 بەدەستی مانگەشەوی زرێبار |

٣٣٨٤

✓ هێدی

کۆڵمت گەش و ڕووناکە، دەڵێی تیشکی هەتاوە
جوانچاکی کراسێکە بە بەژنی تۆ براوە

ئاسک سڵە، نەک هێندی تۆ نەشمیل و ڕەزاسووک
گوڵ پێ دەکەنێ نەک وەکوو تۆ وا بەحەیاوە

بسکت دەگەڵ ئەو ڕوومەتە تێکەڵ بووە هەر وەک
باغی گوڵە پەڕژینی بە ڕەیحانە کراوە

سەد حیکمەتی گەر خوێندبێ، نازانێ بە دەردم
هەر کەس بە گڕی ئاگری تۆ هەڵنەچزاوە

جوانیت بەسە، بەرموورەکەی ئەستۆت بپسێنە
من کوردم، ئەزانم کە لە بەندی چ کراوە

تا گوارە لە گوێت دێتە لەرین، دێتەوە بیرم
هەر لاوێ کە لەم خاکە لەسێدارە دراوە

ئەو لالە کە دەیبینی وەکوو ڕوومەتت ئاڵە
هەر خونچەیەکی خوێنی شەهیدێکە ڕژاوە

هەرچی هەیە هەر باسی برۆ و بسک و خەت و خاڵ
هەر بەینی من و تۆیە کە کەس لێی نەدواوە

هەر مەرجی من و تۆیە وەتەن ماوە وەکوو خۆی
هەودایە وەتا من هەم و تۆ هەی نەپساوە

سەیری کە لەدەست هەڵمەت و پارێزی کوڕی تۆ
دوژمن لە هەموو لاوە چلۆن مێشکی پژاوە

دەنگی کوڕی تۆ دوژمنی هێناوەتە لەرزین
دەنگێ کە ئەڵێی هەورە بەسەر شاخ و چیاوە

هاواری گەلی تۆ ئەوە دەرچوو لە نهێنی
ئەو پەردە بە گوللەی کوڕە پێشمەرگە دڕاوە

سەرکەوتنی تۆی دیوە وەتەن، دوژمنی ڕووڕەش
وا ڕۆژی ڕەشی هات و چرای ڕوونی کوژاوە

ئەو جۆگەلە خوێنانە کە دەڕژێنە خڕ و دۆڵ
فرمێسکی کوڕی تۆ نییە وا لێڵ و قوڕاوە

خوێنی دڵی دوژمنتە وەتەن تاکوو نەڵێن پێت
تۆڵەی نەبی و عیززەت و میرە نەکراوە

کاوانی گوێ بگرە لە دەنگی گەلی ئازات
سەر هەڵبڕە لەو خاکە ببینە چ کراوە

تاوانی وەکوو تۆی چووە پێشمەرگە کە ساتێ
نەسرەوت و هەتا خوێنی نەئەستاند نەحەساوە

تۆڵەی بە چی دەستێندرێ گەنجێکی وەکوو تۆ
تا بن سەری ئاڵای گەلەکەی لێ نەچەقاوە

ئاڵا دەبێ جێی بن سەری تۆ بێ کە نەڵێ کەس
ئەو پەرچەمە ڕەنگینە بە خوێن ئاو نەدراوە

شانازی ئەکا کورد کە لە مەیدانی خەباتا
بارزانی قەڵای ئاسنی کوردی بە پەناوە

بارزانی سەرۆکی مەزنی کۆمەڵی پارتی
کوردێک کە هەتا هەبووە بەسەربەرزی ژیاوە

ئیلهامی لەوی وەردەگرێ پارتی خەباتگەر
وا بۆ وەتەنی گیان و ڕوحی هیچە بەلاوە

ژەنڕاڵێ کە هەر ئەو تەمەنی پیر و جوانی
داناوە لە ڕێی ئەو گەلەدا و کۆڵی نەداوە

ئەی خۆش بی وەتەن بۆ کوڕێ گرتووتە لە ئامێز
ئەی نەڕزێ دەسی تۆڵەستێنت کوڕی کاوە

Kurdish_Poetry

نیشانەکان: هێدی

+ بڵاو کرایەوە لە 2019/3/29 ـدا کاتژمێر 23:57 بەدەستی مانگەشەوی زرێبار |

٣٣٠٣

✓ دەنگی کوردی

دەنگ: حەسەن دەرزی
شیعر: هێدی «خالید حیسامی»

نامەیەکم پێ گەیی هەر وەک گوڵاوی پەرچەمت
وەسوەسەم کرد ئەی خودا کەی دەم بنێمە ناو دەمت
خۆزگە دەمزانی لە غوربەت کێیە بێ من هاودەمت
خۆ دەزانی گیانە بۆ من ناکرێ تەرکی غەمت