٤٢٨١
✓ هەوراز مەریوان (1971)
لێم گەڕێن با هەڵگرم پێ، ڕوو بە شاخ
لێم گەڕێن با دەربڕم ئاخم لە ناخ
لێم گەڕێن با ڕووی دزێویان دەربخەم
لێم گەڕێن با دادڕم بۆیان یەخەم
بێم و ڕۆژی ڕوون بکەم لێیان بە شەو
بێم و چاویان لێ زڕێنم شەو لە خەو
کێم لەگەڵ دێ؟ بێ لەگەڵما ڕێ بڕێ
مەشخەڵانێ بێ لە شەودا، بێ، گڕێ
کێ بە دڵ ئەم نیشتمانەی خۆش ئەوێ؟
کێ لە داخی نیشتمانی ناخەوێ؟
کێ لە ماڵ و گیانی خۆی تێپەڕ ئەکا؟
کێ لەگەڵ دوژمن بە دڵ دێ شەڕ ئەکا؟
شۆڕەسوارم من ئەوێ لەو ڕێگەیە
ترسنۆکم بۆ لەگەڵ بێ؟ با نەیە
ڕێگە سەختە و پڕ لە کۆسپە و تەنگەبەر
خۆنەویست ئەو ڕێگە مەر بگرێتە بەر
مەسڵەحەت گەل خاتە پێشی خزم و خێش
کێ وەها بڕیار ئەدا با بێتە پێش
خێڵ و عەشرەت با وەلا نێین بۆ ئەوەی
نیشتمانمان هەر هەبێ و دوور بێ لە وەی
+ بڵاو کرایەوە لە 2021/4/20 ـدا کاتژمێر 23:15 بەدەستی مانگەشەوی زرێبار
|
ڤەژینبوکس