٣٧٩٩
✓ عەتا ساڵحپوور
چ ئازارێکی نامۆیە کە ساڵانێکە دەیچێژم
لە شێعرێکی تەڕ و سەوزا مەگەر هەندێکی هەڵڕێژم
بڵا چاوی غەزەل چەشنی برووسکە و هەوری بارانی
بە تۆزی ڕووی دەبا بەشکم دەسەخشتێکی وێ پێژم
منی بێبەش لە هەر چوار لا، نە ماڵێکە نە ڕەشماڵێ
دەبا بەو خشتە پێژراوە، بناغەی ماڵێ داڕێژم
ڕەشە چارەم وەکوو خاڵی ڕەشی کابە و سنووری ڕووی
دەنا بۆ چی ئەبێ ڕەش بێ خەتی بەرماڵەکەی نوێژم؟
شەڕابی خەم لە چاوانەی چەمەیلم گەر دەبێ جارێ
چ حوکمێکە کە بیخۆمۆ، چ سڕرێکە کە نەیڕێژم؟
ئەوەی ئەیکەم، بە دەستی خۆم نییە پێمی ئەکا گەردوون
خەییامئاسایی لەم کارە گەلێ کاس و وڕ و گێژم
ئەگەر عومرم «عەتا»ـی تۆیە، ئەبێ چوار وەرزی تێدا بێ
بەهارم کوا؟ ئەدی قوربان بەغەیری تۆ بە کێ بێژم؟
+ بڵاو کرایەوە لە 2020/4/1 ـدا کاتژمێر 21:45 بەدەستی مانگەشەوی زرێبار
|
ڤەژینبوکس