٤٤١٨

 

✓ دەنگی کوردی

• دەنگ: عەتا قەرەداغی (1973)
• شیعر: پەشێو (1946)

هەموو شتێک جوانە لە تۆ
سۆزی گەرم
بزەی نەرم
دڵتەڕیت و چێژی ناسک
جارجار چرپەی تێکەڵ شەرم

چەندە جوانە
قژی تەنکی سەر ناوچەوان
کە وەکوو تەم سەما دەکا
لەسەر بەفر و گوڵ ئەرخەوان

چەندە جوانە
پەنجەی لەخۆوە نەرم و شل
تاڤگەی کەزیی ئارمووشینی
پەخش و خاوی سەر شان و مل

هەموو شتێک جوانە لە تۆ
وردەنیگا
چاو و برۆ
گێڕانەوەی بیرەوەریت
باسی خۆشی و دەردەسەریت

باسی دەستەخوشکانی خۆت
باسی شیعری بێتام و بۆت
باسی دواڕۆژ
باسی ناوماڵ
باسی ناوی یەکەم مناڵ

Kurdish_Poetry

٤١٩٢

 

✓ پەشێو (1946)

سەدان ساڵە
وەکوو چنگێک دانەوێڵە
ئاشی مێژوو فڕێی داوم
هەر چوار دەورم شارۆچکەیە و
مێروولە دەمیان تێ ناوم

بێئارامم
ئارامی من، چرایەک بوو
ڕەشەبای دەورم خوێنی ڕشت

وەرن خەڵکە
لە نێچیر و زام بپرسن
بڵێن، توخوا
خەنجەر هەیە زام تیمار کا
ڕاوچی هەیە نێچیر نەخوا

دە خەڵکە، لە کا بپرسن
قەت ئاگری ساردی دیوە
لە هێلانەی مەل بپرسن
بەنیازی ماچ
قەت مار دەمی تێ ژەنیوە

دە لە داربەڕوو بپرسن
تەوری دیوە داربڕ نەبێ
دە لە کەرێکیش بپرسن
گورگی دیوە کەردڕ نەبێ

Kurdish_Poetry

٣٩٩٥

 

✓ دەنگی کوردی

• دەنگ: حەسەن زیافەتی
• شیعر: عەبدوڵڵا پەشێو (1946 - 0000)

ئەگەر ئەم جارە بێمەوە
بەیانیان
وەک بەرخۆڵەیەکی ساوا
لەناو قەرسیلی پاراوا
تل دەخۆم و
گیایەکی تفت تێرتێر دەجووم
تا کفت دەبم
پێ و بەلەکم
لە شەونمی سارد هەڵدەسووم
ئەگەر ئەم جارە بێمەوە

ئەگەر ئەم جارە بێمەوە
وەک پەڵەهەورێکی نەوی
بەسەر کێڵگە سەوزەکانا دەخولێمەوە
وەک شەنگەبی
بەسەر چەم و
زنارەکانی کەنارا
شۆڕ ئەبمەوە
ئەگەر ئەم جارە بێمەوە

ئەگەر ئەم جارە بێمەوە
سەرنج دەدەم
گوڵەگەنم چۆن زەرد دەبێ
هەنار و سێو چۆن پێ دەگەن
قەتییەکان هێلانەیان چۆن چێ دەکەن
سەرنج دەدەم
زەڕنەقووتە چۆن باڵ دەگرێ
پەڕەسێلکە کۆچەرەکان
لەسەر سێمی کارەبای ڕێ
چۆن ڕیز دەبن
جۆگەلەکان لە کوێوە دێن
بۆ کوێ دەچن

ئەگەر ئەم جارە بێمەوە
لە گۆی مەمکی هەر کانییەک
قومەئاوێک دەخۆمەوە
گشتیان دەکەم بە دایکی خۆم
لە هەر ئەشکەوتێکا شەوێک
سەر بە گاشەبەردێ دەکەم
گشتیان دەکەم بە لانکی خۆم
ئەگەر ئەم جارە بێمەوە

ئەگەر ئەم جارە بێمەوە
زمانی گڕ دەهێنمەوە بۆ لاڵەکان
شاپەڕی گڕ دەهێنمەوە
بۆ فڕندە بێباڵەکان
ئەگەر ئەم جارە بێمەوە

ئەگەر ئەم جارە بێمەوە
نایەڵم لاوان گوڵ بچنن
بۆ گوڵدانی مردووی سەر مێز
فێریان دەکەم
کە چوونە ژوان
لە بەرۆکی کچانی دەن
پێش ئەوەی بیانگرنە ئامێز
ئەگەر ئەم جارە بێمەوە

ئەگەر ئەم جارە بێمەوە
زۆر جۆلانەی نەرم و سادە
بۆ مناڵان هەڵدەبەستم
جێژنی لەدایکبوونیانە
کە نییانە
بەشدار دەبم
لەباتی مۆم دادەگیرسێنم ئەنگوستم
گڕ بەردەدەم
لە گلێنەی چاوەکانم
لە ساواترین هەڵبەستم
ئەگەر ئەم جارە بێمەوە

ئەگەر ئەم جارە بێمەوە
هەر بێشکەیەکم بێتە ڕێ
بەشێنەیی
بەسەریا دەنووشتێمەوە
بەشینەیی

Kurdish_Poetry

٣٩١٤

 

✓ دەنگی کوردی

• دەنگ: عادڵ نادری
• شیعر: پەشێو

لێت ڕاهاتووم
وەکوو مناڵ، لە گۆپکەی مەم
وەکوو ماسی، لە زەریا و چەم
وەکوو شاعیر، لە شێتی خۆی
وەکوو شێت، لە سووژێتی خۆی

لێت ڕاهاتووم
وەکوو بەنگکێش، لە بۆنی بەنگ
وەک نیگارکێش
لە هارمۆنیا و زمانی ڕەنگ

لێت ڕاهاتووم
وەک خەنجەر، لە کالانی خۆی
قەرەج، لە ئاگردانی خۆی
وەک کیژی لادێی کوردستان
لە کلچووک و کلدانی خۆی

ئەگەر ڕۆژێک لێت تووڕە بووم
ئەگەر ڕۆژێک بڕیارم دا جێت بهێڵم
دڵتەنگ مەبە
خەمت نەبێ
درێژترین ڕێی تووڕەییم
لە بەردەرگە کۆتایی دێ

Kurdish_Poetry

٣٦٤٤

 

✓ پەشێو

سەدان ساڵە
ڕۆژێک دەبم
بە مەیتەری والیی بەغدا
ڕۆژێک لە تاران کووتاڵم
ڕۆژێک لفکەم
پشتی ژنی سوڵتان دەشۆم
ڕۆژێک گەسکم شام دەماڵم

سەدان ساڵە
لەبەر دەرگەی تەکیەی جیهان
جووتێک سۆلی پینەپینەم
کێ لەپێم کا بۆ ئەو دەشێم

Kurdish_Poetry

٣٥٣٧

 

✓ پەشێو

مناڵەکان
ئێمە تووشی سەد کوێرەڕێین
چرای بیرمان گەلێک کزە
هەنگاوی کوێرانە دەنێین
مناڵەکان
ئەفسانەکان دەگێڕنەوە
هەبوو ... نەبوو ...
هۆزێک هەبوو لە خاکێکا
پاڵەوانیان
چاوی کوێر بوو
هەوای دەوری خۆی دەپێکا
فەیلەسووفیان
فاڵچییەک بوو
شەوان فاڵی دەگرتەوە
تا بزانێ کەی دوژمن بۆی
پەت دەخاتە گەردنی خۆی
پیاوماقووڵیان
کەڕولاڵ بوو
ماوەی کورتی ئارامشی هەزار ساڵ بوو
هۆزی نەگبەت
شەوی دەژمارد
ڕۆژی دەژمارد
سێ ژەم نان و چەپڵەی دەخوارد
چاوەڕێ بوو کە دوژمن بۆی
پەت بخاتە گەردنی خۆی

Kurdish_Poetry

٣٤٦٧

✓ دەنگی کوردی

• دەنگ: خالید ڕەشید
• شیعر: پەشێو

سەرمای گەلێ شارانم دی
بەڵام پەنجەم لەگۆ نەچوون
چونکە سەرمای هەموو جێیە
تیشکی ڕۆژی نیشتمانی منی تیایە

گەرمای گەلێ شارانم دی
بەڵام گیانم وەڕەز نەبوو
چونکە گەرمای هەموو جێیە
سروەیەکی نیشتمانی منی تیایە

چاوی کچی ئەورووپایی گەر شینیش بێ خۆشم ئەوێن
وا تێ دەگەم شینترین چاو و سەوزترین چاو لەم دنیایە
تۆزێ ڕەشیی چاوی کچی نیشتمانی منی تیایە

نیشتمانم تۆ وەک تانەی، تۆ وەک تانەی لەسەر چاوم
تۆ وەک تەمی لە گشت لاوە، لە گشت لاوە دەورەت داوم
تۆ ئاوێنەی لەناو تۆدا هەموو دنیا بەدی ئەکەم

تۆ تەیمانی بەهۆی تۆوە هیچ نابینم
نە کەل دەبینم نە زەوی، نە خوا دەبینم نە ئاسمان
جا نازانم نیشتمانم نە جیهان وەک تۆ بچووکە
نە تۆش گەورەی بەقەد جیهان

Kurdish_Poetry

٣٤٥٦

✓ دەنگی کوردی

• دەنگ: عەدنان کەریم - سەبا کامکار
• شیعر: عەبدوڵڵا پەشێو

شەو ڕاشکا
ئەژنۆم شل بوو
مانگ بە تاقی ئاسمانەوە هەڵپڕووکا
دەرگەکەتم لێ بکەوە
ئەمشەو هاتووم
بۆ چنینی چەپکەنێرگزێکی چاوت
بۆ وچانێ
بۆ خەونێ
تۆزەگریانێ
لەسەر هەوری قژی خاوت

ئەمشەو هاتووم
ترووسکاییی شاری یادگار بانگی کردووم
لەگەڵ سیمای مناڵیما
لەگەڵ خەمی شۆڕەبیما
هاتووم و ناگەڕێمەوە
یا پێت دەگەم
یا وەک مۆمێک
دەسووتێم و دەتوێمەوە

دەرگەکەتم لێ بکەوە
هەر دڵدارەکەی جارانم
هەر کێڵگەکەی بەردەرگەتم
هەر تینووەکەی بەر کڕێوە و با و بارانم

دەرگەکەتم لێ بکەوە
من ئەو کەسەم
تا دوێنێ بوو
لەناو گەرووی ڕووناکیدا دەتشاردمەوە
لەناو جامی مەترسیدا دەتخواردمەوە

دەرگەکەتم لێ بکەوە
کفت و مانووی ڕێگەی دوورم
وەکوو جاران
کەمێک لەلات دەمێنمەوە و ڕادەبوورم

Kurdish_Poetry

٣٢٤٧

 

✓ پەشێو

کە من تەنیا جارێک بژیم
هەم تۆم خۆش دەوێ هەم ئەویش
کە من تەنیا جارێک بژیم
نە تیشکی ڕۆژ دەتۆرێنم
نە تریفەی مانگەشەویش

ئەگەر دوو جار من ژیابام
خۆشەویستم هەر تۆ دەبووی لەمەیانا
لەوی تردا
ئەوم دەکرد به تاقانە
بەڵام چ بکەم 
کە من تەنیا جارێک بژیم
چارەم نییە
هەم تۆم خۆش دەوێ هەم ئەویش
هەم تیشکی ڕۆژ دەپەرستم
هەم تریفەی مانگەشەویش

Kurdish_Poetry

٣١٩٠

 

✓ پەشێو

لەم جیھانە
ھەرکەس لە شتێک تۆقیوە
کوندەبۆ لە ئاوەدانی
دز لە سەگ و کۆکەی بێدار
کەر لە ھەوراز
دیوار لە سینگ
دار لە بزمار
کەڵەکێوی لە خڕەی بەرد لە خشپەی دار

منیش زراوم ڕژاوە
دەترسم لە سەرەمەرگا
سییەکانم بزریکێنن
بۆ تۆسقاڵێک ھەوای وڵات
دەترسم بمنێنە خاکێک
نە من ئاشنای بۆنی ئەو بم
نە زمانم ئەو تێی بگات

Kurdish_Poetry