✓ سەیید کامیل ئیمامی (1903 - 1989)
هەچی زیڕووحە شایی کەوتە نێو دڵ
زەمانی خۆشیی و چەپڵە و پلانە
لەسەر جۆگانە هەڵپەڕکێی کوڕوکاڵ
کە بەزمی بولبولانیش سەرچڵانە
هەموو دنیا سەراسەر وەک بەهەشتە
نەماوە ڕۆژی ماتەی ناو کولانە
کونەڕەش بۆ کەسێکە بێ گوڵ و دڵ
ئەوا کاتی گوڵان، جێژنی دڵانە
«ئیمامی» بانگ دەکا ئەو جێژنە پیرۆز
لە کورد و کیژوکاڵی ژیکەڵانە
✓ سەیید کامیل ئیمامی (1903 - 1989)
با بە یادی شەمعی ڕووت، پەروانە بێ
گیانەکەم، دڵ بێ دڵت وێرانە بێ
بەفری خەم دیسان لەسەر کێو کەوتەوە
ڕەنگە پەڕ دەرکات و لێم دێوانە بێ
مانگی جێژن با ببێ ئاوا، بە توون
ڕەببی ڕۆژی ڕووت لە من ئاوا نەبێ
تۆ کە لای من نی، نەماوە زیندەگیم
خێر و خۆشیم بۆ چییە هەر با نەبێ
بێ تۆ کەی جێژنە، هەزار مانگ نوێوە بێ
گەر ئەتۆش بێی، ڕۆحەکەم جێژنانە بێ
✓ بێخود (1879 - 1955)
بێخود ئەتەوێ قەسری قەناعەت بێ جێت
ڕازی بە بەوەی کە وا خودا داویە پێت
گەر بچیە گەرووی تەنگی نەهەنگیشەوە تۆ
ئەو ڕزقە کە دانراوە بۆت ئەینێرێت
✓ بێخود (1879 - 1955)
ئەی سەبا، ئەی قاسیدی ئەربابی نامووس و شەرەف
هەستە تا کەرکووک بچۆ ئازانە ئەمما لاتَخَفْ
زوو وەکوو تەلسز بڕۆ دەستی من و داوێنی تۆ
وەختی خۆت نابێ بکەی یەک لەحزە زایع یا تەلەف
ئەم عەریزەم بۆ مودیری مەنتیقەی تاپۆ بەرە
یەعنی چادر حاجی ئەحمەد زادە ئەوڕەحمان شەرەف
پێی بڵێ وەک من هەموو ئەهلی سولەیمانی ئەڵێن
حافیزی ئەو بن لە کاک ئەحمەد هەتا شاهی نەجەف
تا بەراتی ئەشقیا بێ دانەوێڵەی مەعسیەت
تا خەڵاتی ئەولیا بێ شاڵی تورمەی مَنْ عَرَفَ
خۆشەویستت هەر لە قەسری عوشرەتا بێ بادەنۆش
ناحەزت دایم لە بیری حەسرەتا بخوا ئەسەف
هەر بە ناوی عالەمی ویجدانەوە بەندەش ئەڵێم
هەر بژی تاپۆ مودیری، هەر بژی نِعْمَ الْخَلَفْ
✓ بێخود (1879 - 1955)
ئەمجا لە عوود و ڕوود و نەی و مەی شەراب ئەدووم
یەعنی لە غەیری ساقی و موتریب خراپ ئەدووم
لەو ساوە عاشقم بە برۆ و ڕوویی دڵبەران
دایم لە مانگی یەکشەوە و ئافتاب ئەدووم
✓ دەنگی کوردی
ڕەببی تۆ پشتوپەنامی مەرحەمەت کە ڕەحمەتێ
بەندە عەبدم، تۆ خوامی مەرحەمەت کە ڕەحمەتێ
شەرمساری بارەگاتم، ڕووم نییە سەر هەڵبڕم
خۆت کە بەخشندەی گوناهی، مەرحەمەت کە ڕەحمەتێ
موشکیلاتی دین و دنیام هەر بە لوتفت حەل دەبێ
ساحیب و موشکوڵگوشامی، مەرحەمەت کە ڕەحمەتێ
خۆت حەکیمی ئاگەداری ئێش و ئازاری منی
داروویی دەردی شیفامی، مەرحەمەت کە ڕەحمەتێ
ماڵ و ڕزق و عومر و دەوڵەت، عیزەت و زیللەت هەموو
هەر بە دەس خۆتە نیزامی، مەرحەمەت کە ڕەحمەتێ
گەر دەرم کەن بچمە کوێ لای کێ سکاڵای خۆم بکم
مەرجەعی لاڵە و تکامی، مەرحەمەت کە ڕەحمەتێ
ڕووی دڵ و ڕۆحم لە تۆیە یا ئیلاهەلعالەمین
ڕەببی خۆت مەعبوودی عامی، مەرحەمەت کە ڕەحمەتێ
بەندە هیوام گەر بە ڕەحمەت بێ لە کەس باکم نییە
لابەری جەور و جەفامی، مەرحەمەت کە ڕەحمەتێ
عەبدی زاتی پاکی خۆتە ڕەببی «شاهۆ» ـی لانەواز
باعیسی خۆشی و سەفامی، مەرحەمەت کە ڕەحمەتێ
✓ دەنگی کوردی
وەک فەلەک بۆ عەشقی تۆ سەرگەشتە و حەیرانە ڕۆژ
بۆ جەمال و حوسنی تۆ هەر ڕۆژە سەرگەردانە ڕۆژ
ئیقتیباسی نووری خۆیی کردووە لەو نووری تۆ
چونکی لەو ڕۆژە کە ڕۆژە بۆ تۆ سەرگەردانە ڕۆژ
وا لە ڕێگەی عەشقی تۆ ئەو کاری هەر نەسرەوتنە
جانفیدا و سەربازە بۆ تۆ کاری سەردانانە ڕۆژ
شەو کە دی جیلوەی جەمال و شوعلەیی شەمعی ڕوخت
ڕۆژ و شەو بۆ شەمعی تۆ دەڕوانێ وەک پەروانە ڕۆژ
عەینی ئەم تەئسیرە ئیکسیرە کە تەئسیری لە خاک
وا کە ئەیکاتە تەڵا و گەوهەری یەک دانە ڕۆژ
خوڕڕەمی بەخشی درەخت و نەشئەزا بۆ سەبزەزار
شیرینی بەخشی حەلاوەت میوەیی باغانە ڕۆژ
ماهی دووهەفتە ئەچێتە ژێر خسووف و تیرەگی
گەر بزر بێ ڕووبەڕووی ئەو شوعلەیی تابانە ڕۆژ
مەشقی ئەشقی کرد لە ڕۆژا کەوتە دەشت مەجنوون ئەگەر
بۆ هەموو شام و سەحەر ئەیدی لەسەر شاخانە ڕۆژ
بۆ تەوافی کۆیی تۆ سەرگەشتەیە و دێت و دەچێ
سەوڵەجانی عەشقی تۆ بوو گۆیی ئەم مەیدانە ڕۆژ
یا خودا بڕژێنە سەر خۆی و سەحابە و ئال و بەیت
نووری خۆت و هەم سەڵاتت تا وەکوو تابانە ڕۆژ
من سەگی دەرگاهتم هەم «خادیم» ـی یارانی تۆ
بەندەیی ئیحسانتم قوربان هەتا ئەعیانە ڕۆژ
✓ نالی (1800 - 1877)
گوڵ کە یاغی و دەمدڕاو بوو، کەوتە لاف و ڕەنگ و بۆی
باغەبان گوێی گرت و وا هێنای بە دەستی بەستە بۆی
ڕەنگی زەرد و سووری خەوف و خەجڵەتی، ئاوی حەیای
وا تکا و ئەرجوو دەکەن عەفوی بکا وەک عەبدی خۆی
چونکە بێنی بێوەفایی و ناز و شۆخی لێ دەهات
ناردییە بازاڕی ڕیسوایی کە بیدا شوستوشۆی
دەست بە دەست چوو تا گەیشتە دەستی عەتتاری سەفیهـ
نایە سەر نار و عەزابی ڕۆحی دا و سفت و سۆی
چونکە مەنشووری گوڵەندامی بە ناوی خۆی دەوێ
یار، ئەگەر لەو باغییانە کەس بمێنێ، عارە بۆی
مەهـ بە شەو هەڵدێ، پەنا دەگرێت و دەنوێتن بە ڕۆژ
دا بگاتە سیڕڕی پەچچەی پەرچەم و وەسفی برۆی
گەر بڵێم شەمسی، دەڵێ ئەو خۆشڕووە بێپەردەیە
وەر بڵێم سەروی، دەڵێ ئەو ئەحمەقە کوا گفتوگۆی
دیدە و دڵ هەر دوو وا جۆبار و جۆیای قەددی تۆن
سەروی دڵجۆی عەرعەر و دڵجۆی نەمامی دیدەجۆی
چونکە باوکی ڕۆمی و دایکی حەبەش بوو، ما بە بەین
ڕۆژ و شەو، کافوور و میسکی، ڕووگەنم، خاڵ دەنکەجۆی
من گوتم سەروی قەدت مەوزوونە، ئەو تەبعەم هەیە
ئەو گوتی «نالی» بە میزابی کینایەتمان دەشۆی
✓ دەنگی کوردی
جەماڵێوەم دیەن یاران تەعالا سونعی ڕەببانی
مەلاییک یا پەریزادەن بە وێنەی شکڵی ئینسانی
یەدەینش چوون یەدی بەیزا دوو ئەبرۆش نەقشی بیسمیللا
دوو دیدەش نەرگسی شەهلا و ما زاغ البصر خوانی
بە عاریز مەشعەلی نوورەن بە باڵا شەمعی کافوورەن
جەبینش مەتلەعی نوورەن پەرێ ئەمواجی نوورانی
بە گۆنا یۆسفی چاهەن بە خەت خزر و بە ڕوو ماهەن
بە لەب عیسای مەسیحا هەن مەبەخشۆ ئاوی حەیوانی
بە دەندان شەککەر و قەندەن بە باڵا شۆخ و دڵبەندەن
هەزار دڵ پەیش ئەرامەندەن یەکێ چوون پیری کەنعانی
جە دەفتەرخانەیی شاهیش هەزاران سەد هەزارانەن
نییەن مەیلش جە کەس پەرسۆ عیراقی یا خوراسانی
دوو مشکین قەوسی ئەبرۆشەن ڕیدایی دڵبەریش دۆشەن
«شەهاب» ـش پەی سیاپۆشەن خودا وینۆش بە ئاسانی
✓ ئەوڕەحمان بەگی بابان (1880 - 1967)
هەر لە بەحری فورسەوە خاکی هەتا بەحری ڕەشە
نیشتمانی میللەتی کوردە، لە دونیا ئەم بەشە
ڕەوزەیێکی جەننەتە لالە و گوڵی دایم گەشە
پڕ لە ئاڵتوونی سیاهـ و زیوی ساف و بێغەشە
نیعمەت و خێری بە تاڵان وا بە دەست ئەغیارەوە
من بە دڵ هاوار ئەکەم، کەس نایە بەم هاوارەوە
شاخی کوردستان هەموو ئێسقانی ئەجدادی منە
خاکوخۆڵی، گۆشت و لاشەی قەومی ئازادی منە
لاوی کورد بۆ دایکی گەورەت شیوەن و ڕۆڕۆ مەکە
بۆ خۆراوا و خۆرهەڵات قەت مەیلی هاتوچۆ مەکە
ئیعتمادت هەر بە خۆت بێ قەت لە دوژمن کۆ مەکە
فەرقی خەسمی خارجی یا خائینی ناوخۆ مەکە
هەڵمەتێکی وا بەرە، ناو جەرگی دوژمن کون بکا
شۆڕشێ پەیدا بکە، ناوی قیامەت ون بکا
من کە حەقبێژی نەکا، خامەی خەمۆشم بۆ چییە
فیکری ئازادی نەڕێژی، مێشکی بۆشم بۆ چییە
هەوڵی سەربەستی نەدا، من فام و هۆشم بۆ چییە
بۆ فیدای کۆمەڵ نەبێ، کەللەی بەجۆشم بۆ چییە
«بابە» عاجز بووم لە دیلی پاڵەهەنگم لەت ئەکەم
ئەیخەمە ئەستۆ و ملی دوژمن وەکوو سەگ پەت ئەکەم
ڤەژینبوکس