٣٤٩٩
✓ فایەق بێکەس
دڵ کە زۆر مەسروورە ئەمڕۆ ئارەزووی ئیزهار ئەکا
حەز لە فنجانی شەرابی دەستوپەنجەی یار ئەکا
دڵ گەشە وەک گوڵ وەهایە دەرد و ئازاری نەما
تالیبی ویسکی و شەرابە حەز لە عوود و تار ئەکا
دڵ نەجاتی بوو لە تەنگی کەوتە بەزم و ڕەزمەوە
عاشقی سەیروسەفایە مەیلی ناو گوڵزار ئەکا
دڵ ئەوەندە مەست و کەیلە شێتە هیچ هۆشی نییە
وا لە ڕەقسایە خەریکە عالەمێ بێزار ئەکا
دڵ بە نەشئە و بەزمی میللییەت شوکر بووژایەوە
شایییە سەیرانە بەزمە پڕبەدەم هاوار ئەکا
دڵ بە ئاواتی گەیشت و لاوی کوردی دی کە وا
یەکدڵ و یەکدەم خەریکە میللەتی هۆشیار ئەکا
دڵ لە کینە خاڵییە بێگەردە سافە وەک بلوور
سەد تف و لەعنەت لە چارەی خائینی سەگسار ئەکا
دڵ ئەڵێ «بێکەس» هەتا کەی لافی میللییەت بە دەم
هەوڵ و تێکۆشینە تەنها قەومی کورد ڕزگار ئەکا
گەر بەڕاستی بێنە پێشێ دەست لە دەست یەک کەن هەموو
کێیە ئەو کاتە حوقووقی قەومی کورد ئینکار ئەکا
یەکتریتان خۆش بووێ تا نەگبەتی بەرتان بدا
دوودڵی ئەم قەومە دیل و سووک و بەدڕەفتار ئەکا
ڤەژینبوکس