١٨٧٠
✓ مەدهۆش
دڵم بۆ خۆش نەبێ یارم بەرامبەر من وەستاوە
لەسایەی خواوە هێشتا عەشقی جارانی لەلا ماوە
ئەگەر لوتفی ببێ ساتێ لەلام دانیشێ ئەو شۆخە
هەتا ئەمرم منەتباری ئەبم دایم لەمەولاوە
وەرن سەیری جوانی و دڵڕفێنی بەژن و باڵا کەن
بەشەر بەم ڕەنگە هەر نابێ سەرم لەم جوانە سوڕماوە
ئەگەر نازیش بکا توخوا دڵی مەشکێنن ئەی یاران
کە داوای چی بکا دڵبەر بەسەر ڕۆح و بەسەر چاوە
نە وەک هەر من بەتەنیا بێقەرار و کوشتەی عەشقم
هەزاران عاشقی بێچارە هەر بەم ڕەنگە فەوتاوە
بە لەنجەولار و هاتوچۆی شێت و [مەدهۆش]ـم
لە سەر تا پای تەماشا کەن چ خەوشی تیا نەبینراوە
+ بڵاو کرایەوە لە 2016/5/3 ـدا کاتژمێر 0:26 بەدەستی مانگەشەوی زرێبار
|
ڤەژینبوکس