✓ ئەحسەن موفتی
دڵ بە تاسەی تۆ ئەزیزم فەتحی ناخی دڵ دەکا
چاوەڕێی بۆن و بەرامی چەپکەڕازی گوڵ دەکا
یادی تۆ هەر دەم لە یادە نەک بە ساڵ و مانگ و ڕۆژ
بەڵکوو گشت چرکەی ژیانم لەو نەیارە سڵ دەکا
وا کە یادی ئازیزانی بۆ نەبێتە شەوچەرە
ڕازی حوببی دەر نەخات و عەشقی لێ بەرکوڵ نەکا
«ئەحسەن»ـیش بۆ بەردەوامی خۆشەویستی بۆ برام
سەدهەزار تۆوی موحیببەت تێکەڵاوی گڵ دەکا
✓ ئەحسەن موفتی
دڵ و گیانم لەسەر ڕێتە بەدەوری تۆ وەکوو پەروا
بەدڵخۆشی، بەخۆبەخشی، لە خزمەتدا دەبێ هەروا
سەرێکە و من لەپێناوی ئەوینی دولبەرا بەخشیم
کە هەرگیز نایەمە دواوە، هەتا گیانم لە لەش دەڕوا
ئەوەی سەردارە هەر وایە دەبێ سەر وەک سەری ڕم بێ
لە پێشەنگی سەرانا بێ، بژی بمرێ لەسەر بڕوا
سەری «ئەحسەن» لەنێو شەوق و ئەوینیدا بەجێ ماوە
بەڵێنی داوە تا سەر بێ، لە ڕێی عەشقی ئەوا بڕوا
✓ ئەحسەن موفتی
نزیکە دڵ بتاوێتۆ بەتاوی تیلەیی چاوی
بە تاڵێکی لە موژگانی بە نووری پورتەوی تاوی
بە نەرمەی لەنجەیی خەندەی بە شەهدی لێوی قەنداوی
پەڕەی گوڵناری گۆناکەی، بە جۆش و ڕەحمی لێشاوی
بە ئاوازی دەفەی سینەی، بە چاوگەی ئەشکی خووناوی
بە سۆزی نەرمەیی ڕازی، هەموو کەوتوونەتە داوی
بە سەوزەی عەرعەری باڵای، بە نێچیری موژەی چاوی
بەوەی تەنها بە تیرێکی، ژوانگەی بوو لەبۆ ڕاوی
بە ناڵەی دڵ کە شەیدایە، کە تەنها تۆی لەبۆ ماوی
لە شوێنی شای ضیا و نەجم و عەلا و مەولای لەجێماوی
ئەگەر بێت و لە زەلکاوی خەیاڵاتا بە جێماوی
وەکوو کوشتەی "سیامەندی" لەناو داوی "خەجێ" ماوی
لە ئەنفاسی گڕەی گەرمی بەهاری لێزەمەی تاوی
ئەتۆ بەرکەوتەیی نووری چراخانی لەناکاوی
شەها قوربانی لوتفت بم ئەتۆ بۆ ئێمە ڕەخساوی
بپرسە تۆ لە حاڵی من، لە ناسۆر و لە تاڵاوی
لە ڕۆژی دەی موحەڕڕەمدا لە عاشورایی خوێناوی
ئەوا ڕووی کردە ئەستانەت بە ڕەنگی هەڵبزوڕکاوی
بە کۆڵێ ئێش و ئازار و بە نەفسی پیسی دەرداویی
وەکوو سواڵکەر لە قاپیتا ئەپاڕێتۆ بەداماویی
دەسم دامێنی میهری تۆ، لە تام و چێژ و خۆشاوی
خودا بۆ خاتری تۆیە کە تینوومە لەبەر ماوی
بنۆشم تا تەن و ڕۆحم نەجاتی بێ لە ژەهراویی
نەقشبەندیم نەوەک گیانم بمێنێتۆ بەشێواوی
ئەوا «ئەحسەن» لەتاوی تۆ لەبیریشی چووە ناوی
دەبا بەختی لە کارا بێ نەمێنێتۆ بە بەسراوی
خوا ڕەحمت هەتا سەر بێ، بفەرموو تۆ بەخشراوی
بە خاسان و سیڕاجەددین، بە یارانی لەڕێماوی
✓ ئەحسەن موفتی
چوارچرا و عەفرین و کەرکووک تا ئەبەد ئامادەیە
هەر وەکوو ئامەد بەجارێ لەو کەسە نەفرین ئەکا
وا کە خاکی ئەم وڵاتەی خستە بازاڕی هەڕاج
وەک هەڵەبجە ئەمڕۆ سەیری شارەکەی عەفرین ئەکا
خاکی کوردستان بەجارێ دەستی خائین تێکی دا
پشت بە تورک و حەشد و دوژمن حوکمی تا حەمرین ئەکا
ڕەببی ڕووی ڕەش بێ نەیاری ئەم گەلە بێ بەختەیە
وا بە هەر ناوێ بگونجێ ئەم گەلە بێدین ئەکا
«ئەحسەن»ـە تا ماوە ژینی لەو کەسە نەفرەت دەکا
ئەسپی شۆخی ئەم وڵاتەم بۆ نەیاری زین ئەکا
✓ ئەحسەن موفتی
گەر بەهیوای سەربڵندی و سەرفرازیت گیانەکەم
سەد کەڕەت ڕۆحم فیداتە خاکی کوردستانەکەم
نەک دەنگ و ڕەنگ و حەیاتم بۆ بڵندی ناوی تۆ
بەڵکوو چوار فەسڵەی ژیانم وا لەبۆت تەرخان ئەکەم
کوردە قوربانی وەفاتم ڕۆژی هەوڵ و هیممەتە
ڕووم لە تۆیە گیان و ڕۆحم گیانەکەت قوربان ئەکەم
زیاد لە سەد ساڵە بە زەبری تۆپ و تانکە لێت دەدەن
ئەمڕۆ کورد چاوی لە تۆیە، دیدەکەم باوانەکەم
زوو سبەینێ ڕوو لە بنکە، دەنگی خۆت تۆمار بکە
نێر و مێ، پیر و جەوان و گەنج و لاوی لانەکەم
دڵ بەخۆشی و چاو بەفرمێسک و زوبانیش هاتە جۆش
دەس لەسەر پیتکەی تفەنگە بۆ دەر و دەربانەکەم
وا سولەیمانی و دهۆک و شاری کەرکووکم دەڵێ
من بە دەنگی پڕزوڵاڵم، دوژمنیش پاوان ئەکەم
شاری هەولێر و هەڵەبجە و گەرمیان و ڕاپەڕین
ئاکرێ و شەنگاڵ و زاخۆ پشدەر و سۆرانەکەم
خانەقین و دەربەنیخان و کەلار و چەمچەماڵ
دوز و شەقڵاوە و دووکان و مێرگ و هەورامانەکەم
پێنجوێن و یەکبەیەک گوند و دێهات و شارەکەم
وا زەماوەندە بەجارێ، بووکی خانومانەکەم
نیشتمانی کوردەکانە وا بە ئەمری مەعنەوی
مانگی ئەیلوول مانگی هەنگوینی لەبۆ تەرخان ئەکەم
سەربەخۆیی بۆتە خولیای کوردی چوار پارچەی وڵات
بۆتە کارخانەی ژیانم، دەردی پێ دەرمان ئەکەم
نەنگە بۆ پیاوێ کە وا لەم خاکی کوردستانە بێ
دەنگی بۆ بێگانە بێ، ئاخر بەچی پێوانە کەم
«ئەحسەن»ـە نان و خۆراک و ژینی لێ بۆتە وڵات
نەفرەتی خوا لەو نەیارەی کۆسپی ڕێگە و بانەکەم
دەست و پەنجە و خامەکەی تۆ، مستەکۆڵەی توندە بێ
بۆ دەم و دان و لمۆزی دوژمنی دیوانەکەم
یەک دەنگی تۆ بۆ "بەڵێ" بێ، ئەمڕۆ بیدەی یا سبەی
شاد و کەیف و سەربەخۆییت پێ دەدا چاوانەکەم
ڤەژینبوکس