٤٥٣٣
✓ شێرکۆ بێکەس (1940 - 2013)
هۆنراوەکانم پەپوولەن
بەشوێن وشەی دڵا ئەفڕن
گەرا، لەناو گیانا ئەخەن
لە دەروونا، وچان ئەگرن
ئاوێنەی پڕشنگی ئاسۆن
گزنگی دەمەوبەیانن
شەونمی سەر پێڵووی چرۆن
شنەی هەواری کوێستانن
هەڵبەستەکانم باوەڕن
نائومێدی و خەم ئەنێژن
ڕێی تاریکی ژیان ئەبڕن
بۆ ئازادی، خوێن ئەڕێژن
مەشخەڵی دەست جەنگاوەرن
بەڵێنی ڕێی کۆڵنەدانن
لوولەی تفەنگی سەنگەرن
سروودی دەم شەهیدانن
ناڵەی دەروونی هەژارن
کسپەی دایکی سکسووتاون
بازووی کوردی کرێکارن
هۆرەی دوای جووتی جووتیارن
هەڵبەستەکانم، سنووریان
نییە و سەربەست یەن و ئەچن
هەموو دونیا، هەموو ژیان
لە باوەشی خۆیان ئەگرن
+ بڵاو کرایەوە لە 2022/11/18 ـدا کاتژمێر 20:28 بەدەستی مانگەشەوی زرێبار
|
ڤەژینبوکس