٤٦١٣

✓ سەیید کامیل ئیمامی (1903 - 1989)

یاخودا زستان بەخێرێ، چونکە وەک یاری منە
سارد و سڕ، بێمیهر و بێمەیلە، جەفاکاری منە

ڕووی لەسەر کوێستانەکان تاڵە، بە ڕق هاتۆتەوە
هەر وەکوو یار دێتەوە ماڵێ بە ئازاری منە

بەرگوباری دار و گوڵزاری بە شەختە کرد نەخۆش
هەر وەکوو جەرگ و دڵ و گیانی برینداری منە

تکتکەی گوێسوانەکانی وەک زووخاوی من دەچێ
ڕەنگی سیخواری وەکوو ڕیشی سپیکاری منە

بۆ سپیکاری عەجەب وەستایە زستان چاوەکەم
وەک خەمی من مووی سپی کردووم و میعماری منە

چەرخی گەردوون بۆ لەسەر من بەختی من نادا خولێک
هەر لەسەر یەک لاتەنیشتە هەر وەها باری منە

پێچەوانەی خۆی کە جاران چەرخوخول بوو کاری ئەو
هەر دەڵێ شان و ملی «کامیل» وەفاداری منە

Kurdish_Poetry

٤٦١٢

✓ مەلا موستەفای عاسی (1885 - 1975)

تەماشای چەرخی چەپگەرد کەن بە زیددی چەرخی گەردونە
ئەوەی شایانی عیززەت بێ ئەوێستا سووک و مادوونە

ھەوا و دەستووری نائەھلە بناغەی حورمەتی تێک دا
وەتەن شێوا و پڕحەسرەت ئەھالی زار و مەفتوونە

لە چۆل و دەشت و ھەم چیادا تەماشای خوێنی کوردی کە
لەگەڵ فرمێسکی بابکوژراو دەڵێی ڕووباری جەیحوونە

حەرەس قەومی کە وەختی ھات بە لینگی ڕووت و بێدەرپێ
لە ڕاستی کوردی بێچارە دەڵێی مەڕوان و مەئموونە

خیلافی ئەمری یەزدانە ھەموو ڕەفتار و ئەفکاریان
ئیدارە و حوکمی بێجێیان خیلافی شەرع و قانوونە

ئەگەر چی ڕاستە دووپێنە بە وەحشەت فەوقی چوارپێنە
بە عەقڵ و سوورەت و سیرەت ھەمووی سەگسار و مەیموونە

زەرەرمان ھیچ نەکرد ئێمە کە چونکە تێ گەیشتین باش
بڕینی پەنجەیی کورتی کە چەند پڕئێش و کەسکوونە

بە ھیوای تۆڵەوەرگرتن کە سەرفی ڕووحی شیرین کەین
ئەوا فەرھادی سەردارمان خەریکی کێوی بێستوونە

ئەگەر فیرعەونی میسریش بێ زەریف با تێ بگا بۆ خۆی
سیلاحی کوردی ساحیبحەق عەسای مووسا و ھاڕوونە

دەبێ ھەر خۆی بخنکێنێ لە گێژی بەحری حەسرەتدا
لە دەستی چوو کە خاکی کورد ھەمووی ھەر گەنجی قاروونە

سەرت دەرکە ھەتا ماوی بە ڕێگای فورسەتا ڕا کە
شیمال ھەر موڵکی کوردانە ئەتۆش چارت بە لاچوونە

زەریفی تێ بگە یا بە وەکوو حەڵقە لە گوێتی کە
میسالی نیشتمان و کورد وەکوو لەیلا و مەجنوونە

وەتەن خاوێن و بێغەم بوو بە زوڵمی ئێوە چڵکن بوو
لەبۆ شۆرینی بڕنەومان گەڵی باشتر لە سابوونە

ئەگەر حەسرەت دەخۆی بۆ نەوت بڕۆ ھەندێک بە سەرتا کە
بەکار نایە درۆ و تەفرە بەڕاستی وەختی دەرچوونە

لە شوومی زوڵم و بێرەحمی لە دەرحەق نیشتمان و کورد
بناغەی ھێزی ناحەقتان بەرەو ڕووخان و تێکچوونە

بیحەمدیللا کە ناوی کورد بە ناوی ئەو کەسەی دەرچوو
بە غیرەت کێوی ئەلبورز و بە ھیممەت پیرەمەگرونە

منیش ھاوناوی ئەو زاتەم وەلاکین شوھرەتم «عاسی»
بە تیشکی ڕۆژی سەرکەوتن قەریحە و زیھنەکەم ڕوونە

Kurdish_Poetry

٤٦١١

✓ جەلال مەلەکشا (1952 - 2020)

ئەگەرچی زەخمی دڵ ناسۆرە قەد داوای دەوا ناکەم
بە داوی شیوەن و ناڵین مەگەر دولبەر بە داوا کەم

نەماوە باوی عیشق و ناوی دڵ بازاڕی دڵداری
سەری خوم هەڵگرم دەرچم بڕۆم و ڕوو لە سەحرا کەم

ئەوندەی دڵ شکاندم یاری دڵڕەق شەرتە وەک مەجنوون
لەمەولا ڕوو لە قیبلەی کەعبەتولعوششاقی لەیلا کەم

غوبار و تۆزی ئاوێنە بە ئاوی ڕوون نەبێ ناچێ
مەگەر من هەر بە مەی فیکرێ بە حاڵی ڕۆحی شەیدا کەم

وتی زاهید کە پەیمانە بە بەردی تۆبە بشکێنە
بڵا بمرێ ڕەقیبی سەگسیفەت من کاری وا ناکام

دەڕۆم ئەم کافرستانە بەجێ دێڵم خودا بیکا
لە شاری عاشقاندا دولبەرێکی تازە پەیدا کەم

لەسەر رێبازی خوێنی حەزرەتی پەروانە چەن خۆشە
بە هێزی ئاوری شەم شوڕشێ مەستانە بەرپا کەم

فیراقی تۆیە تەقدیرم هەتا ڕۆژی حەشر گیانە
مەگەر تا نەفخی سووری عاشقان هەر شین و واوا کەم

بە ماچێ ئاوری دڵ ڕەنگە دامرکێ بەڵام هەرگیز
لە ڕێی عیشقا ئەگەر بمرم تەقازای ناڕەوا ناکەم

غەزەل بەرتەسکە بۆ هاواری عاشق خۆزگە ئەمتوانی
لە هیجران و فیراقی گوڵ فوغانێ بولبولئاسا کەم

Kurdish_Poetry

٤٦١٠

✓ خادیم (1895 - 1953)

هەراسانن هەموو عالەم لە ناڵەم یەک بە یەک ئیمشەو
لە گریەی ڕەعدئاسا کەڕ ئەبێ گوێچکەی فەلەک ئیمشەو

فوغان و دووکەڵی ئاهم بەتوندی بۆ هەوا ڕۆیی
لە حەوتەم ئاسمان ئەگرین بە حاڵی من مەلەک ئیمشەو

جگەر برژا لە سینەمدا کەبابئاسا بە ناری عەشق
لە شۆری ئەشکی خوێنبارم موهەییا بوو نمەک ئیمشەو

سەبەب بۆ جۆششی ئاوی سوروشکم ئاگری جەرگم
ئەپاڵێوێ لە هەر دوو چاوەکانم مەردوومەک ئیمشەو

لە بۆتەی سیدق و ئیخلاسا لە عەشقا تەجروبەی دڵ کە
عەیاری زەڕی خالیس دەردەچێ بیکەی مەحەک ئیمشەو

لە حاڵی زاری بێحاڵم گەواهی حاڵمن عالەم
بە گریانن لە گریانم لەناو دەریا سەمەک ئیمشەو

ئەگەر چی عەشقی لەیلا زۆر بەتەئسیرە لەبۆ مەجنوون
لەگەڵ تەئسیری سۆزی «خادیم» ـت نابن بە یەک ئیمشەو

Kurdish_Poetry

٤٦٠٩

✓ کەمالی (1886 - 1974)

شەوی دووریت ئەوەندە گریە و هاوار و شینم کرد
بە خوێنی ئاڵی چاوم ڕەنگی سەفحەی سەرزەمینم کرد

کە دیم ئادەم نەوەی وەک تۆ لە پشتی دێتە دنیاوە
سوجوودی ئادەمم برد ڕەجمی شەیتانی لەعینم کرد

مورادم مەدحی زوڵف و ڕووی نیگاری شۆخەکەی خۆمە
کە هاتم وەسفی ماچین و نیگارستانی چینم کرد

ژیانی تازەیی بەخشی بە من یارم کە ڕێگەی دا
شەوی وەسڵی تەوافی لێوی موعجیزئافەرینم کرد

کە دیم زونناری زوڵف و پەرچەمی وەک شێخەکەی سەنعان
قوبووڵی مەزهەبی تەرسا و تەرکی عەقڵ و دینم کرد

لەناو باخا چنار و سەرو و عەرعەر شەرمەزار مابوون
«کەمالی» من کە مەدحی بەژنی یاری مەهجەبینم کرد

Kurdish_Poetry