✓ مارف ئاغایی (1966 - 1998)
ئەگەر ڕووبار
گەڵای تەرمم هەتاکوو نێو دەریا ببا
من ئامادەی هەڵوەرینم
ئەگەر ئاسمان
مەلی ڕۆحم تا ئەوپەڕی بێکۆتایی ڕێگا بدا
من ئامادەی هەڵفڕینم
من ئامادەی توانەوەم
هەڵمی لەشم دە باوەشیدا ڕاگوێزێ
ئەگەر هەور
✓ مارف ئاغایی (1966 - 1998)
هەوا نییە،
دواهەناسەی سوورەگوڵە.
باران نییە،
ئەوە فرمێسکی تێکەڵی مناڵی سەرپشتی لانک و
پیری سەر لێواری گۆڕە.
بەفر نییە،
ئەوە باڵی پەپوولەیە هەڵدەوەرێ.
تەرزە نییە،
ئەوە سەری سپیی کۆترە،
وڵاتی لەشی جێ هێشتووە.
شیعر نییە،
ئەوە ڕۆح و ئەوە گیان و ئەوە کەشی شاعیرێکە،
تکتک، تکتک،
دەتوێتەوە و هیچ کەسێک هەستی پێ ناکا.
هەر کێلە و کێلە و کێل دەڕوێ - لەجیاتیی گوڵ -
من دەترسێم کە گۆڕستان
هەموو خاکمان لێ داگیر کا
هەر خوێنە و خوێنە و خوێن دەڕژێ - لەجیاتیی ئاو -
من دەترسێم خوێن ڕووبارمان لێ داگیر کا
هەر ڕۆحە و ڕۆحە و ڕۆح دەفڕێ - لەجیاتیی مەل -
من دەترسێم کە باڵی ڕۆح
سێبەر لەسەر ژینمان بکا.
نا، نامەوێ ئەمشەو بگریم، بەڵام چ بکەم؟
خۆ فرمێسک پرسم پێ ناکا!
نامەوێ شیعر بنووسم،
وشە تەگبیرم پێ ناکا!
شیعر بۆ هەتاو دەنووسم،
سێبەر وڵام دەداتەوە.
شیعر بۆ ئاگر دەنووسم،
دووکەڵ وڵام دەداتەوە.
شیعر بۆ باران دەنووسم،
تفەنگ وڵام دەداتەوە.
✓ مارف ئاغایی (1966 - 1998)
ئێمە مەلین
بە قەفەسەوە هەڵدەفڕین
مرۆڤین و
بە زەنجیرەوە ڕێ دەبڕین
شاعیرین و
بە چەکەوە گوڵ دەنووسین
گوللە نەیهێشتووە چریکەی بولبولێکمان گوێ لێ ببێ
ڕەنگە لە ئاگربەسێکدا بۆ نەواری دەنگی بولبولێک
گوێ هەڵخەین
دووکەڵ نەیهێشتووە گوڵ بۆن کەین
ڕەنگە بەناچاری، عەتر
بەسەر گوڵە نایلۆنییەکاندا بپژێنین
✓ مارف ئاغایی (1966 - 1998)
گۆناکانم؛
گەڵای زەردن
پاییزانێ
لە داری ژیان وەریون
لێوەکانت؛
دوو شکۆفەی شللێرەن و
بەسەر گەڵای پاییزانا
ناچەمنەوە
✓ مارف ئاغایی (1966 - 1998)
هەور: کامێرا
برووسکە: فلاش
نمنمەی باران:
بۆ شوشتنەوە
دڵی منیش: قاپ
ئا...ی نیشتمانم!
هەتا یەک چرکە
بۆ لێوەکانت
بزە قەرز کە
✓ مارف ئاغایی
ئێمە دوژمنترین برای ئەم دونیایەین
ئێمە بێکەس و بێپەناین
تازە بادی خۆشمرووریش
بە شارەزووردا ڕانابڕێ
تا نالی خۆی بە قوربانی تۆزی پێی کا
تازە شێخیش ناچێتە نێو خەونی موریدەکانیەوە و
چاپخانەکەی پیرەمێردیش لە ڕووی نایە
تاقە یەک وشە بنووسێ.
هەور هەموو بارانی ئاسمانی هێنا
گوڵێک نەبوو پێشکەشی کەین
تازە چۆن هەور
باران بۆ ئەم وڵاتە دێنێ
شنە هەموو بۆنی خۆشی دونیای هێنا
پەنجەرێکمان نەکردەوە تاوێک تیا بحەسێتەوە
تازە چۆن شنە بۆنی خۆش
بۆ ئێمە بە دیاری دێنێ
ئێمە نەبووین لە جێی گەنم، فیشەکمان چاند؟
لە جێی کێڵان، تۆپمان لێ دا?
بە جێگای ئاو، خوێنمان پێ دا؟
ئێستا مناڵانی ئێمە هیچیان نانی گەنم ناخۆن
دەبێ هەویری باڕووتیان بۆ بشێلین.
ئێمە مەلین
بە قەفەسەوە هەڵدەفڕین
مرۆڤین و
بە زەنجیرەوە ڕێ دەبڕین
شاعیرین و
بە چەکەوە گوڵ دەنووسین.
من دەترسێم ڕۆژێک پیرەمەگروونەکان
سیروان و تانجەڕۆ بکەن بە دوو باڵ و
وەک سیمورغ بەجێمان بێڵن
ئەو دەم ئێمە بۆ پەناگا و بۆ ئەشکەوت و
بۆ لێقەومان ڕوو لە کوێ کەین؟
دەترسێم ڕۆژێک دارستان
پەنجە دە پەنجەی هەورەکان بهاڵێنێ و
ئێرە چۆل کا
ئەو دەم دەبێ
بۆ میوە و بۆ ژوان و سێبەر
دڵ بە چ شوێنێک خۆش بکەین.
ئێستا لە گشت شوێنێک
هەر شیوەنە و هەر واوەیلا
منی شاعیر، یەک شێعریشم بۆ نانووسرێ
دەزانی بۆ؟
مەزاجی کوردەواریم تێک چووە، دەروێش عەبدوڵڵا.
مناڵەکان! کە بەیانان لە خەو هەستان
هەتاو بۆ نێو دەروونتان بانگێشتن بکەن
کە خەوتان هات
سەر بنێنە سەر کەروێشکەی گەنمەکان و
مانگ بێننە نێو خەونەکانتان
ئەگەر بۆ شوێنێک ڕۆیشتن
پێ لە ڕووبار قەرز بکەن
دەنگ لە تاڤگە
ڕەنگ لە بەهار.
ئێمە گەڵاین
هەر بە سەوزی هەڵدەوەرین
مناڵین و
هەر لە لاویدا پیر دەبین.
جاران خەڵکی وڵاتێک بووم
پاشان بووم بە خەڵکی شارێک
دواتر گوندێک، پاشان ئەشکەوت
ئێستا خەڵکی قوژبنێکم کە لەشم بشارێتەوە.
جاران عاشقی فێعلێک بووم بە ناو بارین
کاتێ دەمبیست بەتاو هەڵدەهاتمە شەقام
یا بەفر بوو یانیش باران
بەڵام ئێستا کە بارینم گوێ لێ دەبێ
سام دەمگرێ
چونکە نازانم گوللەیە یا تۆپباران.
✓ مارف ئاغایی
بارانە و دەبارێ، سەرتاپای ڕۆحی من تەڕ بووگە و
لە پەڵەی هەورێکی چڕ زیاتر
هیچی تر شک نابەم کە بیکەم بە چەتر
تۆفانە و هەر تەنیا ژێر باڵی شەپۆلێکی یاخی
زریانە و سەرشانی قامچییەک
گریانە و هەر فرمێسک
شک دەبەم کە پەنای بۆ ببەم
سەرمامە و کڕێوە
لە بەژنم ئاڵاوە
برسیمە و سەهۆڵی کەشکاسا
بۆ توێشووی ئەم ڕێیەم دانراوە
بێپەنام
هەر ڕنوو مەنزڵمە
تەنیام و هەر تەمەن هاوڕێمە
✓ مارف ئاغایی
کە پاییز هات
هەموو شەوێ
وەک گڵۆپێ
بەسەر لکی دارەکانا شۆڕ دەبمەوە
دەبمە چاوی ئەو گەڵایەی
دەستی خەزان
لە دەفتەری ئەم دارستانە دەیدڕێ
با کوێرانە
بەرەو مردن
ڕێگە نەبڕێ
✓ مارف ئاغایی
مرۆڤ کە مرد
لەنێو کفنێکی سپیدا
دەیپێچنەوە
سروشت کە مرد
لە بەفرێکی زستانیدا
دەیشێرنەوە
✓ مارف ئاغایی
باران
ئەی ئەزموونی لەدایکبوونێکی ئاسمانی و
مەرگێکی دەریایی
بۆ زەوی وادەی چی پێ دابووی
کە هەوری دڵدارت بەجێ هێشت
باران ئەی کۆچکردووی
وڵاتی ئەستێرە و هەور و با
کێ هەیە بۆ ئەو لاوکە ئاسمانییەت
گوێ هەڵخا
باران تۆ خاچێکی سەرگەردان
سەرێکت لە ناخی سووڕانی زەویدا و
سەرێکت لەنێوان گەڕانی هەوردا
باران
ئەی ڕێبواری ڕۆژانی بێ خۆر و
شەوانی بێ مانگ و ئەستێرە
باران
ئەی پاکترین هاوڕەگەز بۆ گریان
منم من
بۆ مەرگی تۆ گریام
ئەی مرۆڤترینی دڵداران
ڤەژینبوکس