✓ ستار عەزیز
ماتم وەکوو
چەتری ساڵێکی بێباران
دڵتەنگم وەک
شارۆچکەیەک دابڕابێ
لە نیشتمان
کپم وەکوو
ئاوی مەنگی
بێسەرچاوە
پڕئازارم
وەک ئەو خاکەی
لە چوار لاوە
دۆست و دوژمن
دەورەی داوە
✓ ستار عەزیز
من خەڵکی زۆنی سپیم
سپی سپی
بەیانیان بە نانەڕەق و چایەک
هەناوم پڕ ئەکەم
نیمەڕۆیان
بەدیار گەڵامێوەکانی حەوشەکەم
خەیاڵی دۆڵمەێکی چەور
دەمم پڕئاو دەکا
ئێوارانیش
هەر چی ڕق و قینە هەیە دەیدەمە دەست تاریکایی
تا خەونی سپی ببینم
سپی سپی
✓ ستار عەزیز
گاڵتە بەو ژنە دەکەن
نیوەڕۆ
جلەکانی لەبەر ڕۆژ هەڵخست
هەورەکان
لێرە خۆپیشاندانی
هەورەتریشقەیە
لە دژی تەقینەوەی
کانیاوەکان
دەستەوەستان
بۆ دەرکەوتنی خۆر
نقەیان نایە
گوڵەگەنمەکان
هەوڵ دەدا
لە کتێبی گێنس
ناوی تۆمار بکرێ
باران
✓ ستار عەزیز
لە چیا
بەرزی و بڵندیم
زۆر خۆش دەوێ
لە هەوریش برووسکە و باران
لە دارستانیش داربەڕوو
لە گۆی زەمینیش
نیشتمان
لە دەریا مەنگیم خۆش دەوێ
لە شەوەزەنگ تاریکایی
لە پەنجەرە ڕووناکیی خۆر
لە کاتەکانیش تەنیایی
ڤەژینبوکس