٤٥٠٧

 

✓ عارف عورفی (1896 - 1961)

کەسێ داری نەژادی قیمەتی وەک دوڕڕ و گەوهەر بێ
نەوەی ئەو گەوهەرەش تێراوی ئاوی حەوزی کەوسەر بێ

نەوەک هەر جەژنی ئەمساڵی هەموو ساڵێ بە خۆشی بێ
لە مەولامە ئیتر مەولا لەمەولای یار و یاوەر بێ

کەسێ تەعریفی گوڵ کا گەر بە دڵسۆزی، مەکە شوبهە
دەماغی گەر لە سایەی ئەو گوڵستانە موعەتتەر بێ

بە زەردی تێ مەگە زەردی ڕوخی سوورم کە ئەیبینی
لە ئیکسیری مەزەی تەعریفە وا سەرپۆشی ئەخزەر بێ

چ خۆشە داری نێژراوی بەدەس پیری بوخارا بێ
هەموو ساڵێ بەرێ بگرێ بەری یاقووتی ئەحمەر بێ

عەدووی ئەژداد و ئەحفادت لەلای من حەزرەتی ـــــ
بە کوێری دەستی لێ هەڵناگرم تاکوو کەڕ و کەر بێ

لە تەعریفی گوڵ و ڕێحان هەزارێکی وەکوو «عورفی»
عەجەب نابێ کە شێوەی تەبعی تامی شەهد و شەککەر بێ

Kurdish_Poetry

٤٥٠٦

 

✓ ئەحمەد موختار جاف (1896 - 1935)

لەگەڵ دڵ شەرتی من وایە هەتا ڕۆژێ حەیاتم بێ
بەشی ئەو دەرد و غەم بێت و منیش ماتەم خەڵاتم بێ

بە تەختی قەیسەر و کەیخەسرەوی نادەم ئەگەر دولبەر
قبووڵم کا بە بەندەی خۆی لە جێی مووچە و بەراتم بێ

ئەگەر ماچی دەمی ڕۆژێ خوا بیکا بە قیسمەت بێ
بە زەهرم بێ ئەگەر من ئارەزووی نوقڵ و نەباتم بێ

وتم ئەی بت لەلام پەشمن هەموو ئایین و دینێ من
بە یادت ڕەنگە مەیلی پەیڕەوی عوززا و لاتم بێ

 

Kurdish_Poetry

٤٥٠٥

 

✓ ئاران موحەممەد ئیسماعیلنژاد (1981)

جوانی لە لەشتدا وەخەبەر هاتووە ئەمشەو
بۆ بردنی دین و دڵ و سەر هاتووە ئەمشەو

ئازادی چ سەرخۆشە لەنێو خوێنی گەشی تۆ
بۆ سەرکوتی ئازار و کەسەر هاتووە ئەمشەو

خەونێک کە لەبەر چاوی خەیاڵ هێندە مەحاڵ بوو
بەم ڕەشکە گلێنانە وەبەر هاتووە ئەمشەو

دەریای وەکەنین خستووە مۆنجی بزەکەی تۆ
هۆی لەنجەتە بارانە ئەگەر هاتووە ئەمشەو

چیرۆکی قژت هێندە درێژ دادەڕژێنی
شێعری غەمی من بۆیە بەسەر هاتووە ئەمشەو

لەو دوو مەمکەتدایە ئەوی چێژی ژیانە
ئۆخەی کە لەناو سوخمەوە دەرهاتووە ئەمشەو

هەرچی وشەیە هەڵدەپەڕێ لەم غەزەلەمدا
جوانی لە لەشتدا وەخەبەر هاتووە ئەمشەو 

Kurdish_Poetry

٤٥٠٤

 

✓ قانع (1898 - 1965)

با بناڵم بەم برینۆ تا بە ڕۆژی نەفخی سوور
لەشکری مەینەت بە جارێ قڕ بکا عەیش و سروور

وەک خەدەنگی قەوسی ئەبرۆی نەوجوانە قامەتم
موقتەبەس دال و ئەلف، لام و دالی بێشعوور

نەک ئومێدە بۆ دڵ و نەک شادییە بۆ شەوق و عەیش
سەر لە یەک شێوێنن و کۆچکردنیش بۆ خوار و ژوور

کەی لە هەر دێوە ئەبێت تەرفیعی ئیعزازی وەتەن
یا لە هەورامانۆ بکشێ بۆ محاڵی شارەزوور

ئیتتیفاقی عامەیە مەرهەم لەبۆ دەرمانی کورد
کۆمەڵێک پێکۆ بنێن وەک ئیجتماعی سەلم و توور

کەی لە کردە نائومێد و بەشبڕاوە هیچ کەسێک
بۆنی بۆگەن دێ لە سیر و عەتری خۆشبۆیە بخوور

تا قیامەت «قانعا» وەسیەت بکەی فایدەی نییە
کوردستانی کوشت بە جارێ، کانی با و پیرمەسوور

Kurdish_Poetry

٤٥٠٣

 

✓ مەولەوی (1806 - 1882)

ئازیز وەس بووزەم نە گێجاو خەم
وەس چون بینایی پەنهانبەر نە چەم

خۆشەویست! وەکوو چۆن بینایی لەناو چاودا نابینرێت تۆش بە خۆشاردنەوە و نەبینینت غەرقی گێژاوی خەم و خەفەتم بکە.

وەختێ جە وەسڵیچ هەر دڵم ڕێش بۆ
مشیۆ وەسڵ و فەسڵ فەرقشان چێش بۆ

ئەگەر لە کاتی وەسڵ و بەیەکگەیشتنیشدا هەر دڵم ناڕەحەت بێت و نەتوانم بتبینم ئیتر فەرق و جیاوازیی وەسڵ و دووری ئەبێت چی بێت؟

Kurdish_Poetry

٤٥٠٢

 

✓ عارف عورفی (1896 - 1961)

پەرێشانە دڵم بە خوا بەدەستی داو و تەزویرت
چ فکرێکت هەیە قوربان بفەرموو ڕای و تەدبیرت

فەقیرە، بێکەسە، مەزڵوومە، توخوا وازی لێ بێنە
ئیتر بەس بێ، بکە خێرێ لە ڕێگەی باووباپیرت

گوناهی چی بوو، نازانم خۆ هیچ کەعبە نەڕووخاوە
هەتا کەی هەر بمێنێ دڵ ئەسیری بەندی زنجیرت

تۆوە دائیم مەزرەعەی غەم تا بچێنی بۆ منی مەزڵووم
منیش بێ جەبر و تەکلیف ئەی عەزیزم ئەبمە ئاوێرت

ئەوەندەی من تەعریفی قەد و باڵات ئەکەم ئاخۆ
بووە مەعلووم کە دڵگیری وە یاخۆ بۆتە دڵگیرت

پەشێوە شێوەی خورشید و ماهـ شێوەت تەماشا کەن
پەشیمانی ئەکێشن ماهـ و خۆر گەر بێنە تەعبیرت

چ شێخێکە ئەوەی تۆی وا نەسێحەت کرد بۆ ئەم غەدرە
بەسە دەس هەڵگرە سۆفی بە حەققی حەزرەتی پیرت

Kurdish_Poetry

٤٥٠١

 

✓ زاری (1905 - 1982)

لە سەفحەی نامە بینێ دێ نەویدی وەسڵی جانانە
لە نووکی خامە خوێن ئەڕژێ نیشانەی قوربی قوربانە

دڵم موژدەی ئەدامێ بۆ ئەوەی قوربانی قەددی بم
سیابەختێ وتی نابێت کە ئەم قوربانە نوقسانە

لە سەیری ڕوویدا دڵ کەوتە بەر تیری موژەی بۆیە
لە هەر جێگەی کە تێ فکری برینە و جێگەپەیکانە

لە وەسفی تاقی ئەبرۆیا دڵم سەرسامە نازانی
کەمانە یا هیلالی جێژنە یا مێحرابی پاکانە

وەرە بڕوانە ڕوخساری، بزانە چۆنە من شێتم
ئەسێرەی سوبحە یا بەدرە وە یا خورشیدی تابانە

کەلامی دڵبەری یاڕەب بە چی تەشبیهـ لایق بێ
ڕەحیقە یا شەرابی کەوسەرە یا ئاوی حەیوانە

نەمامی قامەتی سەروی حەدیقەی شاهـ و شەهبازی
بەڵێ ئەم داری تووبایە و بیارە باغی ڕزوانە

ئەگەر «زاری» بڵێ وەک خزرە پێت وا بێ درۆ ناکا
لەبەر چی؟ چونکە سەردەستەی گوڵی گوڵزاری عوسمانە

Kurdish_Poetry

٤٥٠٠

 

✓ زاری (1905 - 1982)

جەژنی قوربانە سبەی ئەی نازەنین
ئەمن و دڵ پێکۆ بە قوربانت ئەبین

مەیلی کوشتاری هەیە بۆیە وەها
تێغی ئەبرۆ تیژ ئەکا بۆ سەربڕین

گیان ئەوا دەرچوو بڵێ لا کاتەوە
با شەڕەفیابی تەماشایی ببین

باغی حوسنە تەلعەتت لەو باغەدا
حەیفە بۆ بازی خەیاڵم هەڵفڕین

شارەزای ئەو باغە قەت ناکا هەوای
لالەزاری لەندەن و باغاتی چین

چاوەڕێ تا کەی بمێنم لێرەدا
یا بفەرموو بمکوژن یا بێژە بین

خۆ نییە یەک لەحزە ئەی «زاری» نەکەن
تیری برژانگی لە خاتر سەد برین

Kurdish_Poetry

٤٤٩٩

 

✓ بێسارانی (1643 - 1702)

چوون جەماڵشەن چوون جەماڵشەن
کەعبەی موعەززەم چوون جەماڵشەن

حَجَرالاسوَد خەت و خاڵشەن
سەرچەشمەی زەمزەم لەبی لاڵشەن

چینچین جەمەرەی خەیاتانی خام
حَجَرالاسوَد، مسجدالحَرام

نەمەردام تەواف مسجدالحَرم
عەرەفە و مینا، بازاڕی زەمزەم

بکەردام جارێ ئیحرام بپۆشام
جامێ جە شەربەت زەمزەم بنۆشام

Kurdish_Poetry

٤٤٩٨

 

✓ عەبدوڵڵا بەگی میسباح دیوان (1859 - 1916)

با بڵێن گوڵزارە ڕووی تۆ، خونچەیی گوڵزاری تۆ
کوا وەکوو گوڵزاری تۆ، یا خونچەیی گوڵزاری تۆ

سەرو ئەگەر تەنها لە یەک جێ، دڵکەش و مەوزوونقەدە
ئەی سنەوبەرقەد لە هەر جێ، سەروی خۆشڕەفتاری تۆ

کوا عیبارەت هێندە شیرین کوا تەللەفوز هێندە خۆش
کەوسەرە تێکەڵ مەگەر بەو شەککەری گوفتاری تۆ

پایی بەندی تیشکی ڕوو، وەک سایەیە بێئیختیار
هەر کەسێ تاوێکی هاتە سایەیی دیواری تۆ

دڵ، هەوەڵ زەخمی کە هێنا، من کە دیم، ناسیمەوە
دەست و شەستی کەس نییە ئیللا مەگەر شاکاری تۆ

تۆ گەر ئەمساڵە سەراپا، بۆ مە، جەوری یا ستەم
خۆشە هەر چی بێ، بەیادی لوتفەکانی پاری تۆ

خەڵک ئەگەر هەڵدێ لە مار و ئیحتیرازی لێ دەکەن
بۆچ ئەمن بێماری دوو زوڵفی ئەتۆم، بیماری تۆ

سەد کەڕەت تیرت لە دڵ داوم، هەتا پەڕ نیشتووە
ئەی چ جارت وا نەبوو دڵدۆزی وەک ئەم جاری تۆ

خۆت لە مە بێگانە دەگری و پێم دەڵێی بێگانە بووی
ئاشنا تا بووم، ئەمن بووم، وێستە وا ئەغیاری تۆ

گەر دەڵێی دڵ بۆ چی بەستەی زوڵفی وەک پەرگارتە
نوقتە لەو جێگە دەبێ، لێی بێ سەری پەرگاری تۆ

تۆ لەبت شیرین و خۆت شیرین و قامەت شیرینی
بۆیە وا نوتقی «ئەدەب» شیرینە بۆ تەکراری تۆ

Kurdish_Poetry