✓ پەشێو
عەفرینگڕاد
هاڕەی ئێف شازدەم دەگاتە بەر گوێ
لرفەی ئاگری زارکی دۆزەخ و بۆنی دووکەڵ دێ
هەشتا ملیۆن چاو ڕووەو ڕۆژاوان
چاوەڕێی خۆرن، لەوێوە هەڵدێ
هیوای جارانم بە مەزادخانەی مافی مرۆڤ بوو
دەناورامەوە بێتە هیمدادم
دەیانپرسی کێی
دەمگوت "چیای من بوو پەنای نووحی دا
من قەد و چڵی داربەڕووی مادم"
بەڵام لەمەولا
ئەگەر بپرسن لە ڕەچەڵەک و بنج و بنیادم
سەر بڵند دەکەم
دەڵێم "هاوخوێنی پڵنگەکانی عەفرینگڕادم"
✓ پەشێو
ئەوەی هەور پەڕە دەکا و
دەیتارێنێ
قۆناخ قۆناخ، ئاقار ئاقار
هەر خۆمانین
ئەوەی کەوە و کەو ڕاو دەنێ
ڕەوەز ڕەوەز، زنار زنار
هەر خۆمانین
هەر تابووتێک بۆمان دەکرێ
تەخته و چەکوچ
مێخ و بزمار
هەر خۆمانین
هەر شارێکمان
دوگمەی یەخەی دەترازێنرێ
دەستەدز و پاشەدز و
حەسحەسی شار
هەر خۆمانین
لە هەر باخێک
گڕ لە باڵی دارێک بەر بێ
لە هەر شاخێک
تاشەبەردێک بڕمێتە خوار
هەر خۆمانین
هەر ڕۆژێکمان
هەر مانگێکمان
هەر ساڵێکمان هەڵدەواسرێ
سێدارە و پەت
هەر خۆمانین
دوو لەت بین و
چوار لەت بین و
هەزار لەت بین
تیخی نەفرەت
هەر خۆمانین
پشت و قامچی
باڵدار و داو
هەر خۆمانین
پێ و بەرپێنە
ئاگر و ئاو
هەر خۆمانین
با کەس چیدی تف هەڵناوێ
بۆ ئەوانەی مێژووی مردوون
با کەس چیدی سووچ نەخاتە
ئەستۆی دەریا و
قیسمەتی خوا و
کەچگەڕانی چەرخی گەردوون
گشت سەحراکان
بنارێکیان پێ ناگیرێ
ئێمە خۆمان لووتکەکانمان پێشکەش کردوون
✓ پەشێو
پێش ئەوەی بێمە بەردەمت
کام بیری جوان خورپەدارە
کام دێڕهەڵبەست زۆر بەکارە
شانەی دەکەم وەک پەرچەمت
لە ماوەی چاوقوچانێکدا
هەزارویەک خەونی شیرین
دەمکەن بە مەم دەتکەن بە زین
لە خەیاڵما
پایز بەهاری لێ دەتکێ
درەختی ڕووت
گەڵای سەوزی پێوە دەلکێ
بەڵام سەد ئاخ ئەی دەروونپاک
کاتێ بانگم دەکەی بە [کاک]
کاک وەکوو مار
بەرەو گوێچکەم گینگڵ دەدا
کە دێمە گۆ
خۆی لە زمانم لوول دەدا
هێدی هێدی
قووتم دەدا
کفنی زەردی نائومێدی
من لە دڵتام
لە دەروونتام
لە گلێنەی چاوی ڕوونتام
شەرم مەکە
بەناوی ڕووت
ناوم بێنە پڕ بە گەرووت
با لە یەکتر ئاشکرا بین
تا کەی لەناو ئاگرا بین
نە تۆ خوشکەی نە من کاکم
خۆشەویستی دەروونپاکم
✓ پەشێو
من دەمەوێ تۆ نەمر بیت
من دەمەوێ
ئێوارەیەک
لەگەڵ ھەورا بباریت و تەواو نەبیت
من دەمەوێ
سپێدەیەک
لەگەڵ ڕۆژدا بۆم ھەڵێیت و ئاوا نەبیت
✓ پەشێو
من کوردێکم
هەر چەند ئەمڕۆ دەنگ هەڵبڕم دەنگم نییە
من کوردێکم
هەر چەند ئەمڕۆ خۆم نیشان دەم ڕەنگم نییە
کوردستانی گەورە و مەزن
وەک خەرمانی جوتیاری کورد بەش کراوە
باستیلێکە
توند کوردی تێ ئاخنراوە
بەڵام پەیمان
هەزار پەیمان
لە دواڕۆژا
کە خۆم ببینی کەسێکم نایە بە گژا
کە خۆم ببینی
لە سێبەری کوردستانی ڕزگاربووما
ئەوسا منیش
وەک کوردێکی خاوەن کیان
چەک هەڵگرم
بۆ هەر کەسێک بڵێ ژیان
پەیمان
پەیمان
هەزار پەیمان
کە ڕزگار بووم
لەو گەردەلوولەی تێی کەوتووم
ئەوسا بڕۆم
تا لە خاکی فەلەستینی ئاسمانگەشا
نەک هەر لەوێ
لە جەنگەڵە چڕەکانی ناو ڤێتناما
لە ئەفریقای قولەڕەشا
لە ئێرتیریای بێ بەهارا
لە هەر خاکێک دۆلار بژی
بژیێنمەوە سەد گیڤارا
✓ پەشێو
چەند حەز دەکەم
منی کوردیش
ئادەمزادێکی سەربەست بم
بە چەلین و کەوشی کوردی
لە چیاکانی فەلەستیندا چەکبەدەست بم
هێرش بەرم
بۆ سەر ئەو بووکەشووشانەی
بۆ سەر ئەو داڵەتووشانەی
گۆشتی کۆرپەی ساوا دەخۆن
مزگەوتەکان
کلێسەکان
بە خوێن دەشۆن
چەن حەز دەکەم بژیێنمەوە
داستانەکەی [سەلاحەددین]
دیسان وەکوو بوومەلەرزە
ڕاچڵەکێنم دڵی زەمین
تاو بسێنم وەک فەرتەنە
لەسەر لێوی خاچپەرەستان
ڕیشەکێش کەم زردەخەنە
بەڵام چ بکەم
خۆشم ئەمرۆ وا دەستبەستەم
داگیرکەران لە چوار لاوە
ناهێڵن بجووڵێ جەستەم
✓ پەشێو
ڕۆژێ دادێ کورد بپرسێ
کەی ڕەوایە خۆم برسی بم کەچی لەولاش
بێگانەیەک گەنمم بکاتە قوڕگی ئاش
کەی ڕەوایه
مناڵی من سەرما پەنجەی بتەزێنێ
دزی ڕۆژیش زێڕی ڕەشی بسووتێنێ
✓ پەشێو
دوو لەت بین و چوار لەت بین و هەزار لەت بین، تیخی نەفرەت هەر خۆمانین.
پشت و قامچی، باڵدار و داو، هەر خۆمانین.
پێ و بەرپێنە، ئاگر و ئاو، هەر خۆمانین.
✓ پەشێو
گووتی کەرە گیان گوێ گرە
ئەو دەنگە دەنگی رێگرە
هەتا زووە با بارت کەم
لە رێگران ڕزگارت کەم
کەر دایە قاقای پێکەنین
گوتی قوربان هاورێی شیرین
بارەکەی من لە خۆت بار کە
هەتا زووە خۆت رزگار کە
کە من کەر بم بارەبەر بم
کورتان لە پشت قوربەسەر بم
فەرقی چییە دەرد هەر دەردە
کەری تۆ بم یا هی جەردە
ڤەژینبوکس