٤٤٦٤
✓ زاری (1905 - 1982)
لە باغی عالەما سەروێ نەزیری قامەتی ڕەعنات
نەبوو نابێت و نایابە گوڵێ وەک تەلعەتی زیبات
بە چی تەشبیهی ڕوخسارت بکا شاعیر لە جوانیدا
کە ئەم خورشیدە عالەمتابە شێوەی حوسنی تۆ نادات
بە هەر جوانێ کە تەشبیهت ئەکەم تەبعەن پەشیمانم
کە هۆشم غەیری تۆ جوانتر لە تۆ لێم ڕوونە دەس ناخات
سەلیقەی پێ دەوێ و هۆنینەوەی دوڕ تاکوو لایق بێ
دڵئارامی جەماڵت ئەی دڵئارامم زیاتر کات
بە ئەوسافی جەماڵی دڵبەرت گەرچی خەیاڵاتم
گەلێ سەرگەرمە وەک پێویستە دەستی قودرەتی ناگات
لە سارایەکی بێداروگیاهـ و گەرم و بێئاوا
ئیرادەی حەق وەها بوو جَنَّةُ الْمَأْوَىٰ ـیێ بەرپا کات
بە ڕەحمی بێحەدی تۆی کردە تووبای ئەو گوڵستانە
لە سێبەرتا کە جسمانی و ڕۆحانی پشوویێ بات
بەڵێ تاجی سەعادەت سەرئەنێ هەر کەس لە دنیادا
بە فەرموودەی سەحیح و پڕ لە دڵسۆزیت بڕوا کات
درێغە حەسرەتە ئێشە پەشیمانی و بەدبەختی
لە ئایینی سەحیحی پاک و ڕووناکت کەسێ لادات
کە تۆ بەم جۆرە شەمعی عیففەت و فەزڵ و کەماڵاتی
لە دەورت با وەکوو پەروانە دڵ ئاور لە خۆ بەردات
ئەبێ ئاوی حەیاتی واقیعی فەرمایشی تۆ بێ
بە دڵ هەر کەس وەری بگرێت و بێتەردید نۆشی کات
ئەبووبەکرێکە الْأَتْقَى نیشانی ئیمتیازی ئەو
ابوحفص ـێکه لَوْ كَانَ مەقامی ئەو ئەکا ئیسبات
بە فەرموودەی ئەتۆ هەر کەس نەکا ڕەفتار و مونکیر بێ
ئەبووجەهلێکە پاماڵی شەپۆلی قەهری سەیلئاسات
ئەحەد ناوی بە ئەحمەد بردووی ئیدی ئەمن چ بڵێم
چرانەوتی لەگەڵ خورشیدی تابانا ئەبێ چ بکات
لە اِقرَا بِاسمِ رَبِّكَ گەر بە دیدەی هۆش بڕوانین
چەندە ئەم شاگردە مەحبووبە و کریم الذات
لە تیکراری بخوێنە رَبُّكَ الاَكرَم نمایانە
کە بۆ غەیری ئەو ئەم تەعلیمە پڕتەعزیمە دەس نادات
حەڕا بوو مەدرەسەی مەخسووسی ئەم تەڵقینە چون لەودا
پەیامی دڵپەزێر و پاکی بۆ پێغەمبەری سەر هات
أَلَمْ نَشْرَحْ بەشارەت بۆ تلووعی ڕۆژی عیرفانت
فَتَرضَي مژدە بۆ بەرزی مەقامی خولقەتی والات
لە بەحری عَلَّمَ الاِنسان ئەوندەت جورعەنۆشی کرد
لە لەوحی سینەتا سابت نە کوللی بەڵکوو جزئيات
بە جەووادی ئەتۆ هەوری بەهاری بێگۆمان نابێ
بە جەززابی کەلامی دڵبەرت سەد کارەبا ناگات
بەهاری دەعوەتت مایەی سرووری دۆستانت وەک
قیامی قُمْ فَأَنذِرْ ئاوری بەردا دڵی ئەعدات
بە تێغی تیژی وەحدەت ڕیشەیی شیرکت وەها پەی کرد
هوبەل بێقەدر و قیمەت وەک مەنات و لات و عوززا مات
بتان و بتپەرستانی بە جارێ کردە پەندی عام
ڕەوییەی جوان و ئەخلاقی پەسەند و عادەتی ئەعلات
من و ئەم وەسفە؟ حاشا! چۆن ئەکا مێشوولە عەنقایی؟
دوڕی ئەم بەحرە غەوواسی ئەوێ بتوانێ دەستی خات
بە گیان و دڵ ئەپاڕێمۆ لە قاپی ڕەحمەتی یەزدان
بە دیداری موشەڕڕەف بم بە ماچی خاکی بەردەرگات
بە برژانگم بماڵم خاکی ئەو ڕێگە کە پێت لێ نا
بە ئەلتافی ئیلاهی چاوەڕێم ئەم فرسەتەم پێ بات
بە خۆمم وت ئەمانە بۆ بڵێم ئایا لە ڕووی هەڵدێ
سەگی خوێڕی لە خاوەنماڵ نان و ئاوی داوا کات؟!
پەزیرایی جەنابی تۆیە أَعْطَيْنَاكَ الْكَوْثَر
هُوَ الْأَبْتَر نیشانەی نەگبەتی بۆ دوژمنی بەدخوات
لە تۆدا کۆیە هەر خاسییەتێ مەحبووب و مەرغووبە
لەمە زیاتر چ نازانم فیکر ئەم دەشتە تەی ناکات
بە حوسنی سووڕەت و سیرەت لە مەوجوودات مومتازی
بەڵێ ئەسڵ و وجوودی تۆ و فەرعی تۆیە مەوجوودات
بە دوو دەستی ڕجا داوێنی لوتف و هیممەتت ئەگرم
کە تۆ دەسگیری بێتەقسیری بۆ ئەحیا و بۆ ئەموات
ئەڵێم ئەی شاسەواری عەرسەیی بەدر و حونەین و فەتح
ئەڵێم ئەی نووری دیدەی ئەنبیا ئەی ساحیبی ئایات
بە زاری هاتم و خۆم خستە ئاستانەی جەوانمەردیت
غەنی نابێ لە سفرەی نیعمەتی موحتاج بێبەش کات
لە عالەمدا منم یەک زەڕڕە هیواداری ڕەحمەت چون
خەڵاتی رَحْمَةً لِّلْعَالَمِين ئەی شاهـ بۆ تۆ هات
ئیلاهی بەرمەدە دەستم لە دەستی ئەم تکاکارە
کە بەر لەو ڕۆژی سەختی کەس تکا بۆ هیچ کەس ناکات
لە بەحری بێکەناری ڕەحمەتت لافاوی بێوشکاو
بڕێژە سەر وجوودی خۆی و ئالی هەر دەقیقە و کات
مەگەر خەللاقی ئەو دانا بە ئەخلاقی حەمیدی بێ
زبانی لاڵی تۆ «زاری» ژماری وەسفی ئەو ناکات
ڤەژینبوکس