✓ بێخود
دڵم مەفتوونی چاوی دڵبەرێکی نیکتەپەردازە
کە مەحزی حوسنە عەینی شۆخییە سەرچاوەیی نازە
هەرێمی چاو و بەینی ڕوومەت و تاقی خەمی ئەبرۆ
مەتافی نازە کەعبەی ئیمتیازە قیبلەیی ڕازە
لە بازاڕی موحەببەتدا هەزار لۆمەم بکەن ئیخوان
ئەڵێم ئەم یۆسفە پێغەمبەرێکی خاوەنئیعجازە
✓ بێخود
«بێخود» شەوەکەی هەتا بڵێی تاریکە
ڕێگەش بە خودا درێژ و زۆر باریکە
کاروان هەموو باری کردووە ڕۆیشتن، تۆش
خۆت گورجەوە کە کە ڕۆینت نێزیکە
✓ بێخود
لە ئەووەڵ و لە ئاخرا مەداری ئەنبیایە ئەو
لە باتین و لە زاهیرا حەبیبی کیبریایە ئەو
کە چونکە لای خودا قسەی بەڕاستی ڕەوایە ئەو
دە موژدە بێ لە ئوممەتی کە گەورەیێکی وایە ئەو
لە ڕۆژی مەحشەرا تکای هەموو گوناهکار ئەکا
پەیەمبەرێ کە باعیسی وجوود و خەلقی عالەمە
کە تاقەسواری عەرسەیی شەفاعەتە و موسەللەمە
کە زام و هیجر و میحنەتی سروور و وەسڵ و مەرهەمە
لە هەفتخوانی سینەدا موژەی خەدەنگی ڕۆستەمە
لە فەتحی خەیبەری دڵا برۆی لە "ذوالفَقار" ئەکا
شەها بە غەیرەتت قەسەم دەمێکە دیلە ئوممەتت
بەدەس عەدووی دینەوە عەجەب زەلیلە ئوممەتت
لە خەستەخانەیی غەما وەها عەلیلە ئوممەتت
بە چیهرەزەردییا ئەڵێی دوچاری سیلە ئوممەتت
دەوایی ڕەحم و لوتفی تۆ هەمیشە ئینتیزار ئەکا
خۆش ئەو دەمەی کە ڕۆژ و شەو تەواف ئەکا ڕەواقی تۆ
خۆش ئەو سەرەی کە کەوتبێ لە کووچە و سوقاقی تۆ
بە تیکە تیکە بێ دڵێ کە نەیبێ ئیشتیاقی تۆ
حەیاتی من ویساڵی تۆ، مەماتی من فیراقی تۆ
بەڵێ پەری خەیاڵی تۆ عیلاجی شێت و هار ئەکا
✓ بێخود
«بێخود» لە ڕووی نیازەوە ئەی نازەنین ئەڵێ
جارجار بە چاوی لوتف بڕوانە سوورەتم
من بۆیە سەیری تۆ ئەکەم و ڕووم لە کەس نییە
تا تێ بگەی کە تۆی هەدەفی تیری حیرەتم
✓ بێخود
ئەو سینە لە غەش خاڵییە، ئەو بێ ڕق و کینە
ئەو خادیمی شەرعی نەبەوی و میللەت و دینە
مەعلووم چووە بۆ خزمەتی سالاری مەدینە
وام زانی کە فەوتاوە، نەفەوتاوە دڵی من
زاتێکی وەهای گرتووە ڕۆحم بەفیدای ئەو
شاهان شەو و ڕۆژ دێنە قەدەمبۆسی گەدای ئەو
«بێخود» مەبە ئیتر بەئومێد و بەتەمای ئەو
نایێتەوە لات گەر سەری داناوە دڵی من
✓ بێخود
لە حەسرەت لێوی ئاڵی ئەو نیگاری سوخمەشێرداخە
دڵم یا خوێنە یاخۆ داخە کارم ئۆفە یا ئاخە
بەیادی شۆخیی ئەو چاوغەزاڵەی کەبکڕەفتارە
نەزەرگاهی دڵی دێوانە یا سەحرایە یا شاخە
ئەزانی من شەهیدی غەمزەم ئەی قەبرەڵکەنی دڵسۆز
لەباتی گوڵ لە قەبرا تۆخودا خارم لەبۆ ڕاخە
● شێرداخ: جۆڕی پارچەی نەرمونیان و ئاورێشەمییە کە دەکرێ بە کەوا و ...
✓ بێخود
«بێخود» مەبە قەت تێکەڵی دنیایی دەنی
هەر ڕووت بە لە ئەلبیسە و قوماشی وەتەنی
بۆ خاکی وجوودی تۆ لەڕێی تەجریدا
ئیکسیرە نیگاهێکی ڕەسوولی مەدەنی
✓ بێخود
دیدەکەم لەو ڕۆژەوە من ئاشناتم ڕۆحەکەم
ئاشنایێکی بە گیان و دڵ فیداتم ڕۆحەکەم
پەڕتەوی ڕووی تۆم کە دی لەو ساوە وەک "روحُ البَيان"
هەر خەریکی سەیری سوورەی "والضُّحى"ـتم، ڕۆحەکەم
تا لە چاوی مورشیدی تۆ بەیعەتم وەرگرتووە
ڕۆژ و شەو مەجزووبی حەوشی خانەقاتم ڕۆحەکەم
دڵ ئەگەر مەفتوونی دانەی خاڵەکەی سەرگۆنەتە
خۆم ئەسیری پەرچەمی داوی بەڵاتم ڕۆحەکەم
تۆ کە لۆرتی حوسنی ئەمڕۆ فەرزە من بێبەش نەکەی
موستەحەققی ڕووت و موحتاجی زەکاتم ڕۆحەکەم
من بە قووتی وەسڵی ئێوارە و سبەینێی تۆ ئەژیم
توخودا تۆش نەیبڕی مووچە و بەراتم ڕۆحەکەم
شەو ئەزانی بۆ چی هەر دەور و خولی ڕووی تۆ ئەدەم
تا بزانی من کە پەروانەی چراتم ڕۆحەکەم
بشمرم خاکم لەپاش سەد ساڵ ئەڵێ وەک سامی نووح
ئەی مەسیحا چاوەڕێی یەک مەرحەباتم ڕۆحەکەم
تووشی تیغی نازی تۆ بووم تازە توخوا لێم گەڕێ
با شەهادەت بێ بە ئەسبابی نەجاتم ڕۆحەکەم
جائیزەی ئەم شێعرە نازدارانە «بێخود» عەرز ئەکا
کافییە بەم نەوعە لوتفت بۆ خەڵاتم ڕۆحەکەم
© WWW.Telegram.Me/Kurdish_Poetry
3000
✓ بێخود
ئەی دڵ لە داخی ئەو مەهە بتلێ بە دەردەوە
بڕژێنە ئەشکی گەرم بەدەم ئاهی سەردەوە
دەرچوو بە داخی عەشقەوە ڕۆحی ڕەوانیان
فەرهاد بە بێستوونەوە، مەجنوون بە هەردەوە
گەر وەسفی گەنجی ڕوویی ببێ جارێ باخەوان
وێران ئەکا چەمەن بە هەموو دار و بەردەوە
شۆرێ بەیادی لێوی بڵێ ئەی "حەمەی عەلۆ"
ئەمما بە شێعری مونتەخەب و بەیتی فەردەوە
«بێخود» لەباتی سورمە لەسەر چاوی دائەنێ
ناڵی وڵاخی ئەو بە هەموو تۆز و گەردەوە
ڤەژینبوکس