٢٨٩٤
✓ مارف ئاغایی
باران
ئەی ئەزموونی لەدایکبوونێکی ئاسمانی و
مەرگێکی دەریایی
بۆ زەوی وادەی چی پێ دابووی
کە هەوری دڵدارت بەجێ هێشت
باران ئەی کۆچکردووی
وڵاتی ئەستێرە و هەور و با
کێ هەیە بۆ ئەو لاوکە ئاسمانییەت
گوێ هەڵخا
باران تۆ خاچێکی سەرگەردان
سەرێکت لە ناخی سووڕانی زەویدا و
سەرێکت لەنێوان گەڕانی هەوردا
باران
ئەی ڕێبواری ڕۆژانی بێ خۆر و
شەوانی بێ مانگ و ئەستێرە
باران
ئەی پاکترین هاوڕەگەز بۆ گریان
منم من
بۆ مەرگی تۆ گریام
ئەی مرۆڤترینی دڵداران
+ بڵاو کرایەوە لە 2018/1/8 ـدا کاتژمێر 21:25 بەدەستی مانگەشەوی زرێبار
|
ڤەژینبوکس