✓ شێرکۆ بێکەس
ئەی «شاخ»ـم!
ئەی پەندی بەردینی پێشینان!
ئەی ملی پڵنگی بە خوێنم خەتخەت و
بە عیشقم داگیرساو!
...
قوتابیی ئاسۆتم
هەمیشە
خوێندنەوەی فەرهەنگی
گژوگیای سینەی تۆم
کردووە بە ڕێگا بۆ چاوم
ئەشکەوتت بە ژووری خوێندنی کێویم و
لووتکەیشت بە وانە و مامۆستام
✓ شێرکۆ بێکەس
لە سیی مارسدا فرمێسک ئەکەین بە گڵۆپ
خەم ئەکەین بە ڕێگای هەتاو
ئازار ئەکەین بە گوڵەبەڕۆژەی ژیان
سێدارە ئەکەین بە پەیژەی تێکۆشان
پەت ئەکەین بە پردی پەڕینەوە لە تاریکی
سەری پێشەوایش بەو خۆرەی کە هەرگیز ئاوا نابێ
بەهارێکیان کوشتین و کەچی هەر لەو ساڵەدا سەدان بەهاری ترمان لەدایک بوونەوە
ئێمە لە خەزاندا چرۆمان کردەوە
لە مردنا ژیاینەوە
✓ شێرکۆ بێکەس
لە ماڵەوەم
لەگەڵ تەنیایی دانیشتووم
نە ئەو ژنی هەیە و نە من
نە ئەو میوانی دێ و نە من
نە ئەو منەتی دنیا هەڵەگرێ و نە من
جاری وا هەیە، پێکەوە ئەنووسین و
پێکیشەوە دەس هەڵئەگرین
جاری وا هەیە من ڕقی هەڵەستێنم و
دەنگی ڕادیۆم
زۆر بە بەرزی ئەکەمەوە
جاری وایش هەیە ئەو تووڕەم ئەکات
کە ڕێ لە خەیاڵم ئەگرێ و
گران ئەیدا بە دەستەوە
یان هەر نایدا و قەڵەمم پێ فڕێ ئەدات
لە ماڵەوەم من ناجووڵێم
وەکوو ئەوەی بەهرەم کۆتاییی هاتبێ
وەکو ئەوەی تەڕاییی شیعرم نەمابێ
وەکو ئەوەی دڵی مەراقم وەستابێ
زمانم بیر چووبێتەوە
یاخود زمان، منی لەبیر چووبێتەوە
✓ شێرکۆ بێکەس
ئەگەر لەناو شیعرەکانما
گوڵ دەراوێژنە دەرەوە
لە چوار وەرز، وەرزێکم ئەمرێ
ئەگەر یار بێننە دەرەوە
دووانم ئەمرن
ئەگەر نان بێننە دەرەوە
سیانم ئەمرن
گەر ئازادی بێننە دەرێ
ساڵم ئەمرێ، خۆیشم ئەمرم
✓ شێرکۆ بێکەس
مەلی وشەم
نە بەبێ نان پێ ئەکەنێ
بۆ ئاسمان و
نە بێ ئاسمانیش گۆرانی
ئەڵێ بۆ نان
✓ شێرکۆ بێکەس
کە کەو ئەمرێ
دوای خۆی بۆ شاخ
چەند قاسپەیەک بەجێ دێڵێ
کە هەنگ ئەمرێ
دوای خۆی بۆ باخ
هەندێ ماچی شیرین شیرین
بەجێ دێڵێ
کە وەختێکیش تاوس ئەمرێ
دوای خۆی هەندێ تێلی ڕەنگین
بۆ ناو گوڵدان بەجێ دێڵێ
کە وەختێکیش ئاسک ئەمرێ
دوای خۆی مسک بەجێ دێڵێ
هەر کاتێکیش کە من مردم
دوای خۆم بۆ ئێوە و کوردستان
هەندێ شیعری نازدار و جوان
بەجێ دێڵم
✓ شێرکۆ بێکەس
نازانم تۆ
من بۆ خۆم چوار باڵم هەیە
یەکێکیان بایەکی "ئامەد" پێی بەخشیوم
بۆ ئەوەی شیعرم هەمیشە بڵند بفڕێ
دووەمیان خۆرەتاوێکی لای "کرماشان" پێی بەخشیوم
بۆ ئەوەی هەرگیز خورافات پێم نەوێرێ
سێیەمیان ئەوینی "کەرکووک" پێی بەخشیوم
بۆ ئەوەی وێنەی ئەو یارە قەت گلێنەم جێ نەهێڵێ
چوارەمیان هەورێکی "عەفرین" پێی بەخشیوم
بۆ ئەوەی هەردەم ئەم سەرەم بە بارانی کەسک بسپێرێ
چوار گوێچکیله و
تەنها یەک دڵ
چوار جۆگەلە و
تەنها یەک زێ
چوار تەلان و
یەک دارستان
نازانم تۆ
من بۆ خۆم چوار باڵم هەیە و
بەڵام هەر تاقە یەک ئاسمان
✓ شێرکۆ بێکەس
کە هاتم
مۆمێکم لە قوللەی حەزرەتی «نالی»ـدا بۆ هەڵکەن
با ملی دارێ بێ
یان پەنجەی نێرگزێ
یان قژی وەنەوشە
کە هاتم
تاقێکم بۆ لێ دەن
بە خونچەی ئەو هەموو فرمێسکەی هەتانە
بە گەڵای ئەو هەموو ئاخانەی لاتانە
بە ژاڵەی ئەو هەموو کسپانەی پێتانە
تاقێکم بۆ لێ دەن
بە خشتی ئازاری چوارگۆشەی
ئەو هەموو پرسانەی دایئەنێن
تاقێ بێ لە شێوەی مێزەری «مەولەوی»
تۆزێ قووچ
تاقێ بێ وەک پشتی کۆماوەی
خەڵوەتی «مەولانە»
✓ شێرکۆ بێکەس
برای مرۆڤ منی درەخت هەتاکوو ئەمرم
بەری خۆشی و بەختیاری بۆ ئێوە ئەگرم
بۆ هەر وەرزێ بۆ هەر پلەی تەمەنێ کە دێ
جۆرێ تام و جۆرێ سوودی خۆمتان ئەدەمێ
لە کڕێوە و سەرماوسۆڵەی سەختی زستانا
کەڵەپشکۆی ئاگردانم لەناو ماڵانا
تینی گەرمام کڵپەی گڕی زوقمڕەوێنم
بۆ چیرۆکی داپیرە گیان هەر خۆم هەوێنم
هەر منیشم ئاگری نەورۆز دائەگیرسێنم
مژدەی بەهار بە گوێتانا زوو ئەچرپێنم
لەژێر سایەی دڵنیایی مندایە دڵدار
سکاڵاکەی هەڵئەڕێژێ بێ ترسی بەدکار
بۆ دیلانێی منداڵانتان پەت لە مل ئەخەم
لەگەڵیانا ئێم و ئەچم دڵخۆشیان ئەکەم
خۆشەویستی کوڕی لادێ و کیژی ناو شارم
چەپکی دڵخواز مایەی شادی خاڵەی جووتیارم
قرچەی گەرماش سێبەرێکم ڕێی هەتاو ئەگرم
ئارەقی پاش هیلاکبوونی ماندوێتی ئەسڕم
من کۆڵەکەی خانووبەرەی ژووری ژیانتم
گوڵی دەست و دەرگای کونجت و چرای گیانتم
تا تەورەکەت جێدەستەکەی تا کەشتیت منم
کە بوویت لانکم کە مردیشیت تەختەی شتنتم
قەڵەمی بیر گاڵۆکی شوان مێزی خوێندنم
بۆ شەوگاری پشوودانت تەختی نووستنم
نزای منیش پاڕانەوەی ڕوولەئێوەنان
هەر ئەوەیە هەڵی مەبڕن بۆم دەستی تاوان
مەیبڕنەوە چڵ و لقوپۆپم مەشکێنن
توخوا ئەگەر گەشەی ژینم لێ بشێوێنن
✓ شێرکۆ بێکەس
منداڵ بووم وەک گوڵی دارچووالەی یەکەم بەر
بچووک بووم وەک بەچکەمراوی
رۆژێکیان کتێبێ لە جانتای باوکمەوە سەری خۆیی دەرهێنا و پێ کەنی
پێی وتم حەز ئەکەم بمبینی، سەیرم کەیت
وای وت و دەستی خۆی دامە دەست
هەڵم گرت، بۆنم کرد، ماچم کرد، کردمەوە
وێنەیەک چاوانی ڕەشی خۆیی تێ بڕیم
وێنەیەک خاچەکەی خستمە ناو کەلەپۆی خۆیەوە
مارەکەی ترساندم
وێنەیەک وەک پڕژە
وەکوو تیشک
وەک هەوا هاتە ناو چاومەوە
سەیرم کرد سەیرم کرد سەیرم کرد تا ژاکام
من پێشتر گوڵباخی ماڵێ بووم
سەیرم کرد سەیرم کرد سەیرم کرد تا لێڵ بووم
من پیشتر بەفراوی شاخێ بووم
سەیرم کرد سەیرم کرد سەیرم کرد تا پەرت بووم
من پیشتر شەماڵی ئارامی دارێ بووم
سەیرم کرد سەیرم کرد سەیرم کرد تا سووتام
هەتاکوو ڕیشم هات
تا تووکی سەر سنگم درێژ بوو
من پیشتر منداڵ بووم، منداڵ بووم، منداڵ بووم
لە کوێوە وام لێ هات
لە کوێوە گەورە بووم
لە کوێوە، لە کوێوە
وێنەیەک ئاوا بوو
بەم جۆرە
سێدارە و پیاوێکی خنکاو و دوو قاچی ناو ئاسمان
وێنەیەک پەتێک و ملێکی شکاو و
دوو دەستی بەرەو خوار ڕاکشاو
وێنەیەک کەوایەک هەتاکوو خوار ئەژنۆ
لە دووریش سێبەر و تارماییی چەند کۆشک و خانوویەک
من حونجەی پیاوەکە و ناوم کرد
بەم جۆرە
ق ا ز ی م و ح ـە م م ـە د
ئەو ژاکانە بۆ هەوێنی گەورەبوونی
ژانەکانی دەوەنم بوو
ئەو لێڵبوونە بۆ هەوێنی قووڵبوونەوەی
نیگاکانی گێژەنم بوو
ئەو پەرتبوونە بۆ هەوێنی چڕکردنەوەی
ئاخەکانی بەندەنم بوو
ئەو سووتانە بۆ هەوێنی شینبوونەوەی
بەپیتتری دەغڵی وشە و
دەغڵی هزر و
دەغڵی سووری تەمەنم بوو
ئەو ڕیشە ڕیشی شیعر بوو
ئەو تووکە تووکی ئازار بوو
ئەو ملە ملی شاخێکم و
ئەو پەتە پەتی تاریکی و
ئەو کەوایە کەوای بەری مێژوویەکم و
ئەو دەستانە دەستی شەقام و ڕووبارم و
ئەو مردنە مردنێ بوو
بیرنەچوونەوەی ژیان و
لەدایکبوونەوەی تازەی
پێ نیشان دام
ڤەژینبوکس