٤١٤٥

 

✓ موحەممەد ساڵح دیلان (1927 - 1990)

کڕێوەیە لەو ملانە بەفری شاخ
سپیکاری خۆی گەیانە پشتی باخ

بەفر باری سەرپۆشی کێو نەخشانە
لە کلیلە کێوماڵکردن گرانە

کێ ئەگاتە دەرەی سەختی پشتی کێو
ڕەز داپۆشرا سەهەن گەیشتە سەر مێو

چ لوورەیە لوورەی بای زەمهەریرە
چیا سپی لووسە وەک چوڕی شیرە

لەبەر دێدا شەڕەتۆپەڵ هی گەنجە
سنگ بۆ کوانوو چۆقە جێگەی سەرنجە

خۆراکی ڕۆژ خواردەمەنی کوێستان هات
بەفر و دۆشاو ڕەش و سپی زستان هات

چلەی جاران شێرەبەفرینەی جاران
کوایت چیت لێ هات بۆ چوویتەوە بە باران؟

Kurdish_Poetry

٤١٤٤

 

✓ پیرەمێرد (1867 - 1950)

دنیا هەر ڕۆژە ڕەنگێ ئەنوێنێ
هیچیشی لەسەر بارێ نامێنێ

ڕۆژێ هاوارە باران نابارێ
کە باریش ئەڵێن غەرق بووین بەجارێ

هەر کەسە لەسەر هەوای خۆیەتی
تەنها هەژارە باوکەڕۆیەتی

دەوڵەمەند وا ڕێی خۆی گرتوەتە پێش
هەندێکیش بوونە یابووی سنگهەڵکێش

لەگەڵ هەوساریان لەسەر داماڵا
لەگەڵ جەردەدا ئەکەن بە ماڵا

گۆزە و دیزەمان تێکڕا ئەشکێنن
ئاشنا و دۆستمان لێ ئەڕەنجێنن

ئەڵێن مارانگاز کوێچکەی شل دەکا
لە خشەی مار و مێروو سڵ دەکا

ئێمە دوای ئەوەی مار پێوەی داوین
ئەنجا بۆ دووپشک زۆرتر بەتاوین

Kurdish_Poetry

٤١٤٣

 

✓ کوردی (1809 - 1850)

چاوەکەم! خۆ من برینداری خەدەنگی چاوی تۆم
زار و بیمار و گرفتاری کەمەند و داوی تۆم

وێڵ و سەرگەردان و خار و عاجز و ئاشوفتەحاڵ
دڵ بە تاڵان چووی سوپای کاکۆڵی تێکئاڵاوی تۆم

گەر دەپرسی داد و گریان و فوغانم بۆ چییە
ڕاستە باوکمردە نیم ئەمما جگەرسووتاوی تۆم

سەد کە تۆ فیکری ئەسیری خۆت نییە ئەمما ئەمن
خۆ دەزانی چونکە ڕۆژ بێ خورد و شەو بێ خاوی تۆم

من لەبەر پیری قەدم خەم نەبووە ئەر باوەڕ دەکەی
قەدخەمیدەی قامەت و باڵای وەکوو لاولاوی تۆم

قاتڵی من کەس نییە بوختانی ناحەق بۆچ بکەم
من شەهیدی خەنجەری موژگانی تازەساوی تۆم

هەر کەسە عەبد و موریدی موڕشیدێکە سا ئەمن
هەر وەکوو «هیجری» مورید و گیانفیدای هەمناوی تۆم

Kurdish_Poetry

٤١٤٢

 

✓ ناسێح ڕەحیمی (1993)

بێخەبەر لەو دەردی دڵمەی، با بڵێم پێت: کارییە
کاری تۆ بوو کاریبوونی، بۆیە کارم زارییە

من ئەڵێم خۆشم ئەوێی تۆ پێ کەنە و پێم بێژە گیان
مەحشەریش هەڵسێ عەزیزم، ڕستەکەم هەر جارییە

لەو بەهارە وا بە دەستی دووری تۆوە، هەڵوەڕی
خوێن لە چاوی خۆشەویستی، قەترەقەترە بارییە

ئەی دڵی بێڕەحمی شەوگار چیت لە دڵتەنگیم ئەوێ؟
دڵ کە داوای خۆشی ناکا، چاوەڕێی ئەو یارییە

تۆ ئەزانی مەرگ سەفایە، کاتێ پێم ئێژی بڕۆ
خۆشەویستی دەردی ئەمڕۆس، زندگی بێچارییە

پڕ لە فرمێسک شێعر ئەنووسێ، «ناسح» ـی دڵتەنگی تۆ
خۆزگە ژین جەبری ببایە، خۆ نەبوون موختارییە

من ئەڕۆم و پێت ئەڵێم خۆشم ئەوێی ئەی گیانەکەم
بەس بە گاڵتەش بێ بڵێ پێم، دووری لێت ناچارییە

Kurdish_Poetry

٤١٤١

 

✓ لوتفی (1905 - 1989)

وەرە یاری خونچەدەم، ئەی جوانی شیرینقەدەم
دڵ ئەناڵێ هەموو دەم، لەپێناوت ڕووح ئەدەم

ڕووح ئەکەم بە قوربانت، بۆ زووڵفی لوولی جوانت
دەستی من و دامانت، تیمار کە دەرد و زەدەم

تیمار کە دەردی دەروون، جەرگ و دڵم بوو بە خوون
کەوتوومە کز و زەبوون، تۆ شازادە و من خەدەم

توو وەک شازادەی چینی، قامەتشەنگ و شیرینی
دەوای زام و برینی، ڕووناکی هەر دوو دیدەم

دڵ پڕ دەرد و ئازارم، وەک فەرهادی هەژارم
بێخەون و بێقەرارم، لە مەغریب تا سوبحدەم

ڕۆژ و شەوم جەفایە، لە دووری ئەو لەیلایە
گەرچی زۆر بێوەفایە، لێم نەدی غەیری نەدەم

«لوتفی» تا کەی خەمباری، هەر دەم لە شین و زاری
لە گیانی خۆت بێزاری، وێڵی سەحرایی عەدەم

Kurdish_Poetry

٤١٤٠

 

✓ مەولەوی (1806 - 1882)

یاران، دڵداران نە تۆی دڵ داران
بێ یادی یاران، یاران مەویاران

• واته‌: عاشقه‌ دڵداره‌کان ياره‌کانى خۆيانیان له‌ناو دڵيانا ڕائه‌گرن و به‌ دڵ خۆشيان ئه‌وێن و به‌ هيچ جۆرێک فێڵ له‌ ياره‌که‌يان ناکه‌ن، به‌ ياره‌که‌يان ڕانابوێرن، چونکه‌ دۆست به‌بێ يادى دۆست ناتوانێت بژى ...

Kurdish_Poetry

٤١٣٩

 

✓ شاهۆ مەعازی (1973)

بڕیە کەسێ بەعەمدەن، خەڵکی هەژاری تاسنا
پەی تیکیە نانێ وشکێ، جە ژیواییشا کاسنا

دڵ ڕەق و گۆشێ کەڕێ، بە چەم چەم دەردێ وینا
کەچی ڕەگوو خیرەتی، دماو مەرگیشا ماسنا

Kurdish_Poetry

٤١٣٨

 

✓ قسەی خۆش با ون نەبێ

کابرایەک دەیگێڕاوۆ و وتی:
چووم بۆ لای قەساب، زۆر قەرەباڵغ بوو. گۆشتی هەر کەس ئامادە ئەبوو، ئاوا بانگی ئەکرد؛
گوێرەکە کێ بوو؟ وەرە بیبە.
مەڕ و بزن کێ بوو؟
لە کابرایەکیشی پرسی تۆ گێسکی؟
وتی نە، من مانگام ...

 

Kurdish_Poetry

٤١٣٧

 

✓ ناتیق (1886 - 1967)

لەو دەمەی پرشنگی خۆرێ لە مەشریقی "وان" ـەوە
خۆی گرێ داوە بە جیلوەی کێوی هەورامانەوە

ئەم وڵاتی شارەزوورە پڕ لە عیشوەی حەق بووە
زمزەمەی میللییەتی خستۆتە ناو کوردانەوە

بێنە مەیدان یەک گرن بۆ دەفعی دەردانی وەتەن
گەردی ئەم خاکە بکەن بە سورمەیی چاوانەوە

هەر بە یەکگرتن دەبێ ئیستقلالی مەملەکەت
هەر بە یەکگرتن تورەققی دێتە ناو ناوانەوە

ڕیشەکەن کەن خاری دەعوا ماری نیفاق قڕ بکەن
غوولی جەهالەت بە نەفرەت توڕ دەنە زیندانەوە

Kurdish_Poetry

٤١٣٦

 

✓ ناتیق (1886 - 1967)

چاوەکەم گلەت بەجێیە لە منی ئاشوفتەحاڵ
لە داماوێکی وەک منی دەربەدەر وێرانەماڵ

من کە تینووی کەوسەری لوتفی تۆ بووم ئێستە بۆ
بێخەبەر ماوم لە شەوقی شەوچرای وەعدەی ویساڵ

Kurdish_Poetry