٣٢٧٤
✓ شێخ ڕەزا تاڵەبانی
- پێنجخشتەکی لەسەر شیعرێکی کوردی
دڵی بردم بە ناز و عیشوە دیسان شۆخی عەییارێ
فریبی دام بە سیحری چاوی خۆی مەحبووبی سەححارێ
لە هیجرانا تەقم کرد ئەی ڕەفیقان کوا مەدەدکارێ
ئەمان مردم عیلاجێ سا لە ڕێی پێغەمبەرا چارێ
ویساڵ یا قەتڵ یا تەسکین لە هەرسێ بۆم بکەن کارێ
بەدەوری نێرگسی مەستی کەسێ نەیماوە مەیلی مەی
لەبۆ شەهدی لەبی لەعلی دەناڵێنێ دڵم وەک نەی
لە تابی ئاتەشی عەشقی بکەم داد و فوغان تا کەی
وەها سووتاوم ئەسڵەن تابی فەریادم نەما سا دەی
ڕەفیقان نیوەسووتن ئێوە نامەرد عەرزە هاوارێ
لە ڕێگەی عەشقدا نایانە پێم زنجیری مەجنوونی
لەدەستم چوو ڕمووزی دانش و فەهمی فەلاتوونی
وەکوو شەخسێ کە زاری کا لە جەوری دوژمنی خوونی
لە کونجی سینە دەنگی ئای و ئۆی دڵ دێ بەمەحزوونی
وێران بێ نەمدی ساتێ لێی نەیە ناڵەی بریندارێ
کە چاوی ساحیری دەستی بە غەمزە و ناز و ئیما کرد
مەتاعی عەقڵ و هۆش و دەرکمی تاراج و یەغما کرد
کەسێ نەیگوت درێغا کێ ئەتۆی وا شێت و شەیدا کرد
ئەلای هەرکەس دەچم مەنعم دەکا خۆت بۆ چی ڕیسوا کرد
درێغ کوا حاڵزانێ ڕەببی تووشم بێنی بیمارێ
گوتم وەک سورمەیە بۆ چاوی عاشق خاکەکەی ژێر پێت
لە ئولکەی حوسندا گەر لافی شاهی لێ بدەی لێت دێت
گوتی مەیخانە بێ دایم بەیادی چاوی مەستم جێت
سەبا یارانی مەجلیس گەر هەواڵی من دەپرسن لێت
بڵێ کێشاویەتە مەیخانە چاوی بێچووەعەییارێ
سەری جەنگی هەیە دایم لەگەڵ من چەرخی دوونپەروەر
نە بەختم یار نە چەرخم یاوەر و نە تاڵعم ڕەهبەر
ئەوەند بێڕەحم و ساحێبکینەیە دەرهەق بە من دلبەر
لە نەزعا پێی دەڵێم قوربان جەفا بەسییە دەڵێ کافەر
ئەرێ چیت دیوە تۆ سەگمەرگی کارم ماوە پێت جارێ
نەماوە ڕەونەقی بازاڕی عەقڵ و دانیش و وردی
بە پوولێ نایکڕم لەم عەسرەدا عیلمی ئەبی وەردی
لە ئەشعاری «ڕەزا» پەیدایە ئاساری جوانمەردی
دوڕ و یاقووت دەبارێ لەم کەلامە شیرینەی «کوردی»
خوا سا کوا لە دنیادا قەدرزانێ خەریدارێ
ڤەژینبوکس