٣٩٦٧
✓ شاهۆ
عاشقی زارت هەمیشە شۆری فەرهادی هەیە
ئارەزووی شیرین ئەکات و داد و فەریادی هەیە
دەنگی ناڵەی دڵ لە سینەمدا میسالی تار و عوود
ڕۆژ و شەو بەزم و مەقامی داد و بێدادی هەیە
ئاگری دووریت وەها جەرگ و دڵی هێناومە جۆش
عادەتا تاوی بە تینی ناری حەددادی هەیە
چاوی بیمارت بە جارێ عالەمێک بیمار ئەکات
نووکی موژگانت بە ئیما نێشی فۆلادی هەیە
قورسی ڕوخسارت قەمەر پەرچەم سەودای دەوری ماهـ
قەوسی ئەبرۆیشت نیشانەی شیری جەللادی هەیە
قامەتە یاخۆ قیامەت؟ سەروە یا نەخلی ئیرەم؟
یا قەد و باڵاتە؟ شێوەی داری شەمشادی هەیە
کەی هەنار و سێو لیمۆی گرتووە سەروی چەمەن؟
ئێستە باڵای تۆ کە وا لیمۆی خودادادی هەیە
بیکوژە تۆ بەو یەدی بەیزایەوە مووساسیفەت
ئەو ڕەقیبەت فیکری جێی فیرعەون و شەددادی هەیە
قەت نەبوو ڕەحمێ بە حاڵی «شایق»ـی کات کافرە
شاهی من لەخوانەترسە جەوری بێدادی هەیە
+ بڵاو کرایەوە لە 2020/8/3 ـدا کاتژمێر 0:35 بەدەستی مانگەشەوی زرێبار
|
ڤەژینبوکس