٣٠٠٩
✓ مەزڵووم
جەژنم غەمە، یاخود ئەسەف، بادەم تاڵە وەک زەھری مار
تەنسوختە و دڵحەزینم لە فیرقەتی یار و دیار
تەنزامدار و دڵسپێرم لەبۆ تەعنەی ڕەقیبانم
کونکون بووە جەرگ و دڵم، ھەر وەکوو نەی ئەکا ھاوار
لە ڕاستیدا من کەسێکم لەناو ئۆردووی دەرد و غەما
فەقەت ئەمرۆ بەرزە شانم، فەریق و سپەهسالار
ئەوسافی خۆم گەر بەیان کەم لەبۆ ئیوە بەموختەسەر
گەهـ فاعیل و گەهـ عامیلم، گاھی جامباز لە ناوی شار
غەمم زۆرە، غەمی ئێوەش کە بێمەیلن بۆتە سەربار
خوایە دوور بن لە موسیبەت، ھەم لە بەڵای ڕەبی سەتتار
دائم ئەڵێم بە ڕۆژ و شەو "أسعد الله أيامكم"
موبارەک بێ لەبۆ ئێوە جەژنی ئەمساڵ ھەر وەکوو پار
با «مەزڵووم»ـیش لە غوربەتا جەژنی غەم بێ و خۆراکی دەرد
بێبەھرە بێ لە دیدارتان ھەتا ڕۆژی دیوانی کار
+ بڵاو کرایەوە لە 2018/3/20 ـدا کاتژمێر 22:3 بەدەستی مانگەشەوی زرێبار
|
ڤەژینبوکس