✓ هەوراز مەریوان
کە گۆچانی خەیاڵاتم، دەکا پەلکێشی بێتۆییم
لە تاڵی تێ دەگەم شوێنێ، کە بێ تۆ من، دەمێ ڕۆییم
حەرامی چۆن نەکەم ئاخر، بەهەشتێ لێی نەبێ باڵات
کە بێ تۆ جەننەتی دونیا، نەبێتە شین و ڕۆڕۆییم
شەرابی لێوەکانی تۆ، مەگەر چارەی بکا ئێشم
بەرەو جێژوانی جارانمان، هەمیسان تۆ کەوە پێشم
لە کانی و ئاوەکەی لادێ، کە دەرمانخانەکەی من بوو
وچانێ بەینەوە تاوێک، کە دەرمان کەم دڵی ڕێشم
✓ هەوراز مەریوان
گەر ویستت جوانی لە خۆتا جەم کەی
ئەبێ خەیانەت بە گەلت کەم کەی
جلوبەرگ تەنیا زاهیر ئەنوێنێت
ئەبێ چەکیشت ڕوو لە ستەم کەی
✓ هەوراز مەریوان
ئەڵێن پەتایە خونچەدەم، چ کەم لە ماچی ئەو دەمە
نەکەی کە ڕێگریم بکەی، کە ماچەکەت بکوژ خەمە
بەدەم پەتاوە من دەڕۆم، ئەگەر لە تۆ وەری گرم
چ کێشەیەک نییە گوڵم، بەهۆی ئەتۆوە بیشمرم
✓ هەوراز مەریوان
شەرابی دەستی قابیز هەر لە شارم تاڵی ئەنوێنێ
چما کوندەی شەوەزەنگە و لەسەر وێرانە ئەخوێنێ
✓ هەوراز مەریوان
تەرەی هێلانە بوو، کەی دێیتەوە کەی
نەکەی دیسانەوە، هێلانە ون کەی
زەمەن کورتە و زەوی پڕدانەوێڵە
وەرە و زوقمی زناران جێ بهێڵە
✓ هەواز مەریوان
خەمڕەوێنی ماڵی دڵ کەی دێ خەمانم لا دەبا
پێی بڵێن من چاوەڕێیم، کەی تەقەی دەرگا دەدا
لەو دەمەی وا حوکمەتی دڵ وا لە ژێری دەستی ئەو
ئەو لە تەختی پادشایە و من لە ئاستی ئەو گەدا
✓ هەوراز مەریوان
چەرخی گەردوون وا لە چەرخان، هەر دەچێ و دەتلێتەوە
ئەم شەوانەش با بەسەر چن، ڕۆژی ئێمەش دێتەوە
✓ هەوراز مەریوان
ئەم وڵاتەم پڕ لە ئەشق و خۆشەویستی و جوانییە
ئەی ڕەقیبان، وەرنە مەیدان، پێم بڵێن ئاوا نییە
گەرچی ئەمڕۆ، پڕ لە ڕەنج و نامورادی و میحنەتە
تەرکی ناکەم، بێ بە دۆزەخ، هەر لەلاما، جەننەتە
ئاوپژێنی دڵ بە نەغمەی تاڤگەکانی ئەم دەبێ
هەر بە خۆشی ئەو دڵەی ئەو، ئەم دڵەم بێخەم دەبێ
ڤەژینبوکس
