٢٦٧٧
✓ قانێع
ئەی وەتەن دایم خەریکی شیوەن و گریانتم
ئەی وەتەن سووتاوی زامی دەردی بێ دەرمانتم
گەر خوا بۆم کا بەوەڵڵا گیانفیدای لاوانتم
ئەی وەتەن شێواوی حاڵی قەومی بێ سامانتم
دایما سەودازەدەی دەستی خەم و ھیجرانتم
خۆم ئەزانم چەن کەساس و دڵبرین و ڕەنجەڕۆم
خۆم ئەزانم چۆن دوچاری زامی پڕئێش و بەسۆم
با بزانن یەک بە یەک ئەفغان و تورک و فارس و ڕۆم
کۆھکەندەی بێستوونی فیرقەتی شیرینی تۆم
بۆیە دایم بێ تەوەققوف جان بەڵاگەردانتم
ئەی وەتەن وەڵڵا لە بووکی یەکشەوە زیباتری
تۆ لە دووسەد کیمیا و زێڕ و گەوھەر چاتری
بۆ خوماری کەللە بێ شک تۆ لە مەی سەھباتری
تۆ بەمومتازی لە فیردەوەسی بەرین ئەعلاتری
بۆیە وەک بولبول ھەمیشە تالبی گریانتم
ئەو کەسەی تەنیا و بەبێکەس ڕۆڵەڕۆی بێ ھەر منم
خەمفرۆش و خەمکڕ و یا خەم بە کۆی بێ ھەر منم
گەر بەڕاستی بێ تەواوی یا درۆ بێ ھەر منم
گەر لە دنیا تاقەتی ئەحزانی تۆی بێ ھەر منم
وا موقیمم ئەی وەتەن وەک شاخی ھەورامانتم
گەر دەمیشم ھەڵدروون دڵ ناڵە و ئەفغان ئەکا
چاو بەبێ فیکری دەروون چۆن فێرە خۆی گریان ئەکا
دار و بەردی ھۆدەکەم ھەر زیکری یا کوردان ئەکا
عیشقی میللەت لە دڵما ھێرش و جەولان ئەکا
ئەی وەتەن بۆ تۆ بفەوتێم قۆچەکەی قوربانتم
من وەکوو ئەسکەندەرم کەوتوومە ناو گێژی مەمات
ئەی ئەرستۆی خوێندەواران غیرەتێ بۆ ڕێی نەجات
ئەی وەتەن وەک بەعزێ کەس گوێ نادەمە ھات و نەھات
گەر لەگەڵ یادی ئەتۆدا سەرفی کەم مودەی حەیات
وا ئەزانم موونسی سەد کەوسەر و عەدنانتم
«قانع»ـا نەزمت پەشێوە داخەکەم فاییەی چییە
من ئەزانم ھەوڵ و دادت بێ سەمەر داری بییە
ھەرچی ھاوارێ ئەکەی لای بێتەمیز ھەر فیفییە
باوەڕت بێ ئەی وەتەن لافم لە ئەشعارا نییە
شاعیرێکی گیانفیدای ئاووھەوای نیشتمانتم
ڤەژینبوکس