✓ مەحوی
ھێندە ساحێبسیڕڕە، میعراج و شەوی قەدر و بەرات
خاسەجاتی ئەون و مومتازە بەم ئەسرارانە شەو
ھەر کەسێ تالیب بە دوڕڕی مەعریفەت کۆکردنە
پڕ لە دوڕ دەریایەکی بێ مەھلەکەی خنکانە شەو
وەک خزر ئاوی حەیاتی فەیزی حەق عافێتییە
ئەو خوداپێداوە «مەحوی» تا سەحەر ناڵانە شەو
✓ وەفایی
✓ نالی
✓ موحیب مەهابادی
شەوی قەدرە و دڵم موشتاقی ڕووتە
خودا عومرێکە چاوی من لەدووتە
تەمەننامە کە خۆتم پێ نیشان دەی
کە تەنیا ئارەزوومە ئەو هووبووتە
لەپێش مردن لە تۆم داوایە دیتن
کە عالەم تێ بگا ئاوایە دیتن
ڕوخی تۆ تا نەبینێ کوێرە ئینسان
لە کوێی سۆمایی بۆ دنیایە دیتن
شەوی قەدرە و منم مەستی حوزوورت
لە شەش لاوە دەکەم هەستی حوزوورت
بەقوربان نووری لوتف و ڕەحمەتت بم
چ ڕووح سووکە لەژێر دەستی حوزوورت
شەهیدم بۆ نیشانی بێ نیشانیت
لە دەریایی وجوودت بوومە کانیت
حیجابم لادە ئەی عیشقم عەزیزم
کە ئاگادارە گیان بۆ میهرەبانیت
شەوی قەدرە و «موحیب» هەر چاوەڕێتە
کە بیبینێ دەمێکی چاوی لێتە
لە هەر چی بیر ئەکا خۆ سەرتری لێی
لە سۆی ڕوخساری بێوێنەی تۆ شێتە
✓ هاوینی زانستی
ئەمڕۆ چوارشەممە 31 / 03 / 2717 یەکەم رۆژی زانستیی هاوینە لە نیوەگۆی باکووری زەوی.
بەپێی پێوانە فەلەکییەکان، ئەمڕۆ 21 ـی حوزەیران [31 ـی جۆزەردان] دەستپێکی وەرزی هاوینە لە نیوەگۆی باکووری زەوی کە ناسراوە بە دیاردەی «وەرگەڕانی هاوینە - Summer Solstice».
لەم رۆژەدا ماوەی رۆژ درێژ دەبێتەوە بۆ نزیکەی 15 کاتژمێر و شەویش کورت دەبێتەوە بۆ نزیکەی 9 کاتژمێر.
هەروەها لەم رۆژەدا ماوەی نێوان زەوی و خۆر لە دوورترین خاڵدایە، نەوەک لە نزیکترین، وەکوو باوە لای هەندێ کەس! دووریی نێوان زەوی و خۆر هەر بەرەو زیادبوون دەچێ تا دەگاتە «دوورترین خاڵ – Aphelion» کە لە رۆژی 03 / 07 / 2017 دەگاتە زیاتر لە 152 ملیۆن کیلۆمەتر.
هۆکاری گەرمداهاتنی نیوەگۆی زەوی سەرەڕای دوورکەوتنەوەی لەگەڵ خۆردا، دەگەڕێتەوە بۆ خزانی تیشکی ستوونیی خۆر لە «هێڵی کەمەری»ـی زەوی بۆ خۆلگەی «قڕژاڵ» لە باکووردا، هەر ئەم ستوونبوونەی تیشکی خۆر وا دەکات پلەکانی گەرما لە نیوەگۆی باکوور زیاتر بێت و ماوەی مانەوی خۆر لە ئاسماندا دوور و درێژتر بێت و لە هەمان کاتدا خۆر بەبەردەوامی و بۆ ماوەی نزیکەی 6 مانگ لە ناوچەکانی «جەمسەری بەستووی باکوور» ـدا ئاوا نەبێت.
بەڵام لە نیوگۆی باشووردا حاڵەتەکە بەتەواوی پێچەوانەیە، چونکە تیشکی خۆر سەر دەکەوێت لە «خولگەی کاوڕ» بۆ «هێڵی کەمەریی زەوی». بەمەش بڕێکی کەمتر لە تیشکی خۆر بەبەر نیوەگۆی زەوی دەکەوێت، بۆیە لە نیوەگۆی باشوور ئەمە دەبێتە «وەرگەڕانی زستانە - Winter Solstice». واتە دەستپێکی زستانە لەو ناوچانەدا و لە هەمان کاتیشدا، تیشکی خۆر بۆ ماوەی شەش مانگ لە ئاسمانی «کیشوەری بەستووی باشوور - ANTARCTICA» نابینرێت و دەبێتە شەوێکی شەش مانگیی دوورودرێژی بەردەوام.
✓ صافی هیرانی
ئەگەرچی دڵ بە رۆژی عاریزت سووت
وەلێ وا عادەتە بۆ عاشقی رووت
نییە ئیحتیاجی پابەندیم بە قوربان
کە گیراووم بە داوی تاری گێسووت
بە ناری عیشقەوە مەمنێژە جانا
دەسووتێنێ بە "باالله" کفن و تابووت
بە غەمزەی تۆ برینی من هەزارە
موژەت بەسیە لەگەڵ ئەبرۆت مەکە جووت
بە کوفری زولفەکەت دڵ وەرمەگێڕە
کە وا سالیکە بۆ میحرابی ئەبرووت
بە خەنجەر چارەیی دڵ ناکرێ وا
گرفتارە بە سیحری چاوی جادووت
بە سەر سەودا دەکا «صافی» بە ڕووی تۆ
میانی پێچی پەرچەم، خاڵی هیندووت
✓ کەمالی
پێنجخشتەکییەک لەسەر شیعرێکی سالم و غەزەلێکی حافز
بەیادی چاوی مەستی تۆ ئەنۆشم بادەیی سەھبا
لە شەوقی گەردەنی تۆیە کە ئەگرم گەردنی مینا
ئەبێ نەیبێ غەمی دنیا و عوقبا عاشقی شەیدا
بەدەل کەین با بە نەشئەی مەی خوماری میحنەتی دونیا
الا يا ايها الساقي ادر کاساً و ناولها
بناغەی ئەم جیھانە ئەی برایینە لەسەر بایە
ژیان ڕاستت ئەوێ دەردی سەر و ئەندووھی سەودایە
نەکەی تەفرە بخۆی بەم پیرە زاڵەی ناوی دنیایە
مەحەللی ڕیحلەتە دونیا ڕەفیق ئیمرووز و فەردایە
جرس فریاد می‌دارد که بربندید محمل‌ھا
وەکوو ھەندێ بە شمشێری برۆی دلبەر بریندار نین
بە دەردی عەشقەوە دڵ پڕ لە دەرد و ئێش و ئازار نین
لەناو گێژاوی دەریای عەشقدا وەک من گرفتار نین
لە بیمی مەوجی دەریای ئەھلی دڵ زاھید خەبەردار نین
کجا دانند حال ما سبکباران ساحل‌ها
لە نەشئەی چاوی مەستی دلبەری بەینێکە سەرخۆشم
جگەر پێکراوی تیری غەمزە، دڵ زاماری ئەبرۆشم
بە ماچێکی دەمی ئەو نازەنینە گیانم ئەفرۆشم
قسەی من شوھرەیی شەهرە تەماتە تازە بیپۆشم
نهان کی ماند آن رازی کزو سازند محفل‌ها
دەخیلت بم قسەی پیرانی دنیا دیدە مەشکێنە
بە تۆ ھەر چی بڵێ گیانە بە ڕێ و جێ و سەروشوێنە
کە چونکە شارەزایە تۆ دڵی ھەرگیز مەڕەنجێنە
تو خوا ھەر چی ئەڵێ ناسیح لە نێک و بەد بەجێی بێنە
که سالک بی‌خبر نبود ز راه و رسم منزل‌ها
کە ھەڵدێنێ بە ناز ئەو شۆخە چاوی چەشنی شاھینی
ئیتر عاشق ئەبەد نامێنێ سەبر و تاقەت و ژینی
ئەکا مردوو بە خەندە زیندوو لێوی موعجیزایینی
کە بادی سوبحدەم ئاڵۆز ئەکا زوڵفانی چینچینی
ز تاب جعد مشکینش چه خون افتاد در دل‌ها
لە ڕێی عەشقا ھەزاران پادشا و سوڵتان و سەرداران
ھەموو عەوداڵ و ڕیسوا بوون لە دەشت و کووچەیی شاران
ئەمان خۆتان بپارێزن لە فیتنەی دیدەبەخوماران
مەحەببەت زۆر بەئاشووبە بەسەھلی تێ مەگەن یاران
که عشق آسان نمود اول ولی افتاد مشکل‌ها
«کەمالی» بەم قسانە خەڵک ئەکەن ھەرچەندە گاڵتە و گەب
قوبووڵی کا ئەگەر دڵدار و دڵازاری شیرینلەب
بە پاسی دەرکەکەی ڕازیم لەباتی ڕوتبە و مەنسەب
ویساڵی دلبەرە «سالم» موقەددەمتر لە ھەر مەتڵەب
متىٰ ما تلق من تهوىٰ دع الدنيا و اهملها
✓ لەتیف هەڵمەت
من دەروێشیم نەکردووە
من خواناسێکی سەرەڕۆم
ڕۆژێ بەرەو مزگەوت و
ڕۆژێ بۆ لای کچێک دەڕۆم
ڕۆژێ دەستم بە قوڵفی کەعبەی پیرۆزەوە دەگرم
ڕۆژێ بە لێو ئارەقی گۆی مەمکی کچێک دەسڕم
ڕۆژێ کڕنۆش بۆ خوای میھرەبان دەبەم
ڕۆژێکیش نوێژ بۆ چاوی کچێ جوان دەکەم
ڕۆژێ وەکوو گوڵ تووڕەم و
ڕۆژێ وەک لافاو لەسەرخۆم
✓ مەحوی
حەرامە وا بەرن ناوی لەبی مەیگوونی تۆ ئەحباب
نەکەن تا شوستوشۆ سەد دەفعە لێو و دەم بە بادەی ناب
مەپرسن بۆ چی ئیمشەو زوڵفەکەی جانانە پڕتابە
ھەر ئەو زوڵفە نەبوو ئەمڕۆکە کردی عالەمێ بێ تاب
✓ سالم
بە ئیما گەر لە عاشق خواھیشی مەعشووقە بۆ سەر بێ
ئەگەر نەیخاتە بەر پێی ڕووڕەشی سەحرایی مەحشەر بێ
لە ڕووی ئەو شەمعەدا سیححەت تەڵەب کا قوربجۆ سەھوە
دەسووتێ یەک نەزەر پەروانەئاسا گەر سەمەندەر بێ
لە مەیدانی نەزەر چاوت شەجاعەت نایەڵێ بۆ من
بە چاو کێ دی غەزالی وا کە سەییادی غەزەنفەر بێ
لەسەر خاڵی ڕوخت کەس وەسفی خاڵی کەس نەکا خەتمە
خەلیلی پێ بڵێن نابێ کە ھەر کەس جێی لە ئازەر بێ
ھونەر سابت دەکەم بۆ ئەو ئیمامەی قامەتی تۆی دی
لە وەختی خوێندنی "قدقامت"ـا گەر ڕووی لە مینبەر بێ
لەناو سینەی قەفەسما شەرتە ئازادی نەکەم ئیتر
لە داوی زوڵفی دڵبەر گەر بە «سالم» مورغی دڵ بەربێ
ڤەژینبوکس