✓ قسەی خۆش با ون نەبێ
ئەو کاتە پیرەمێردی شاعیر ڕۆژنامەی ژیانی لە سلێمانی دەردەکرد پرسەنامەیەکی بۆ دەنێرن کە لە ڕۆژنامەکەدا بڵاوی بکاتەوە. ئەویش پرسەنامەکە دەنێرێت بۆ چاپ و لە ژێرەوەی پرسەنامەکەدا دەنووسێت: "ئەگەر جێ مابوو". واتە ئەگەر جێ مابوو بڵاوی بکەنەوە. بەڵام لە کاتی چاپدا ئەو دێڕەی پیرەمێردیشیان چاپ کردبوو و کۆتاییی پرسەنامەکە بەم جۆرەی لێ هاتبوو: «خوای گەورە بیخاتە بەهەشتەوە ئەگەر جێ مابوو».
✓ سابیری
تا زیکری دەم و فیکری دڵت ناوی خودایە
سەرپاکی وجوودت لە بەڵا دوور و جودایە
دەروێش ئەگەر خزمەتی خاڵی لە ڕێیا بێ
سوڵتان لەبەر قاپییەکەی ڕووت و گەدایە
ئەو وەختە کە تۆ خەوفی خودا بێتە خەیاڵت
سوڵتان لەبەر چاوی دڵت ڕووت و گەدایە
دەستی تەمەعت خستووەتە گەردنی دونیا
ڕۆحت بە سەروماڵەوە قوربان و فیدایە
ئەی مەردی خودا دەستی تەمەع بەردە لە دونیا
بێ فائیدەیە باوەژنە مەیکە بە دایە
هەرکەس بەدەسی نەفسەوە داماو و زەبوونە
سەد شێخ و مەلا بێ، بەخودا دووری خودایە
لەو ساوە سکەی لیرە ئەخوێنێتەوە چاوت
تاریکی تەریقی تەرەفی دینی خودایە
زەڕەی کەر و زڕەی درەم و زێڕ کەری کردی
نابیێی لە مەلا ڕۆژی جەزا هەوڵ و سەدایە
کوا گەندومی چاکەی تۆ لە تۆماری عەمەلدا
سەد خانە برنجت لە قەباڵە و سەنەدایە
«سابیر» بە کەوای تازەوە تۆ چاکیری نەفسی
ئازا ئەوەیە حوڕڕە لە بەرگی شڕەدایە
✓ جەلال مەلەکشا
مێژوو دەڵێ
سەدان کەڕەت
گۆڕەپانی منیان کردە جەهەندەم و
وڵاتێکیان تیا هەڵقرچان
بەڵام هەرگیز نەیانتوانی
دوو دیاردە
لەسەر سینگم بسڕنەوە
یەکەمیان کورد و
ئەوی تریان
وشەی پیرۆزی کوردستان
✓ ستار عەزیز
پێشبینیی پاییزێک ئەکەم
نەک هەر گەڵا هەڵوەرێنێ
ڕەگ و ڕیشەی دار و درەخت
لە ڕێچکەوە
دەربهێنێ
✓ سەیید تاهیر هاشمی
دین و دڵەکەم یاری دڵارامی ئەمن تۆی
باغ و گوڵەکەم سەروی خۆشئەندامی ئەمن تۆی
وام زانی کە تۆ سەیدی کەمەندی منی ئێستا
وا دیارە کە سەییادی من و دامی ئەمن تۆی
وەک تاوس و ئاسکی لە کەل و هەردی دەرووندا
من ڕامی ئەتۆم گیانە نەکوو ڕامی ئەمن تۆی
هەم تاقەگوڵی وادیی سوبحی ئەمەلی من
هەم شەمعی جگەرسۆزی سەری شامی ئەمن تۆی
کەی جامی جەم ئاخر وەکوو سینگی منە ڕووناک
لەو ساوە کە سەهبایی من و جامی ئەمن تۆی
هەم نەوبەری ئەسماری ئومێدی دڵی مەحزوون
هەم "مقصد" و هەم "مبدأ" و هەم کامی ئەمن تۆی
ئەزواق و هەرا و وەجد و زهوورات و کەرامات
ئەشواق و سەفا و شۆڕشی ئەییامی ئەمن تۆی
فەزڵ و ئەدەب و دانش و ئەخلاق و کەماڵات
فەرهەنگی من و عەقڵی من و فامی ئەمن تۆی
بێ نام و نیشانم وەکوو «تاهیر» لە دوو عالەم
ئەی زوهرەجەبین باسی من و نامی ئەمن تۆی
✓ وەفایی
لەژێر باڵی هوما جێی بازی شاهی قەسری شاهان بووم
درێغا! ئێستە وێرانەی سیسار و جوغدە جێگاکەم
جەنازەم دی سەری ڕاگرت و فەرمووی گوێم لە ناڵەت بێ
درێغا! جێبەجێ بوو، هاتەجێ تەعبیری ڕوئیاکەم
خودا بۆ خۆی دەزانێ مەنبەعی نووری خودایی بووی
درێغا! نەخلی ئەیمەن، مەزهەری نووری تەجەللاکەم
نەسیمی فەیزی تۆ دین و دڵی دووبارە ئیحیا کرد
درێغا! وەک مەسیحا باعیسی ئیحیایی مەوتاکەم
دەلیلی تالیبان بووی، بۆ خودا، وەک ڕۆژ هووەیدایە
درێغا! مورشیدی دەوران و خورشیدی هووەیداکەم
لە سایەی تۆ گەلێ کەس بوونە عاریف، ڕێی خودایان گرت
درێغا! عاریفی ڕێگەی خودا و ئەهلی تەقواکەم
موریدانی دەری تۆم دی بە چاوی خۆم، لە ئینس و جان
درێغا! بۆ ئیمامی ئینس و جان مەولایی ئەولاکەم
بەڵایێک هات و پێی گیرا، بە بایێک نووری کووژاوە
درێغا! شەمسی عیرفان و چرای تاریکەڕێگاکەم
لە حەڵقەی تالیبان وا هەر دەبارێ نوور لە تەشریفت
درێغا! بۆ سەر و سەرحەڵقەیی ئەولادی "تاها"ـکەم
ئەمن نادان و نەمزانی، ئەرێ بۆچ عاریف و عامی
وەکوو پەروانە سووتابوون لەبەر شەمعی شەباراکەم
لەبەر چاوی نەزانان ساحیر و زەندیق و کافر بووی
درێغا! پیری "بەستام"، قوتبی "خەرقان"، غەوسی بەغداکەم
✓ کوردی
زەمانی فیرقەتی یارانە ئەمشەو
شنەی بای هیجری ناودارانە ئەمشەو
لە سەحرای سینە خاری خەم ڕواوە
لە هەوری دڵ خەفەتبارانە ئەمشەو
لە پێی دڵدا سەدایێ دێت، مەزندە
زڕەی زنجیرەکەی جارانە ئەمشەو
کەبابی دڵ لە ئەشکی دیدە سوێرە
لەکن من جەژنی مەیخارانە ئەمشەو
لەسەر دڵ قەترەیی ئەشکم کە دەتکێ
خیزابی دەستی ئەغیارانە ئەمشەو
حەریری زەرد و سوور و ڕەنگی ئەشکم
مەتای کاروانی غەمبارانە ئەمشەو
حەیات و مەرگ و وەسڵ و هیجر و خۆشیم
دەڵێی هیجرانی بیمارانە ئەمشەو
مەکەن مەنعم لە ئاھ و ناڵە «کوردی»
سەبووری خۆی ڕیاکارانە ئەمشەو
✓ هەوراز مەریوان
ڕەمزی مانەوەی خوداش یەکبوونە
گەلێ یەک نەبێ ئاخری ڕوونە
دەستیش بەرزۆ کا خودا خودا کا
چارەنووسەکەی هەر لەناوچوونە
✓ مەحوی
دڵ زیندووە بە عیشق و بژی تۆ لە مەرگ ئەمین
بەم دەردە بمرە تا ببیە "حیّ لا يموت"
دەیوت قیامەت ئەڵبەتە ڕوومت نیشان ئەدەم
ڕوو دەرخە تاکوو ڕۆژی قیامەت هەڵێ لە ڕووت
✓ قەرزار
بە فرمێسکی ئاگرینمان
هاواری ڕۆحی گڕگرتووی
سنەی
هەمیشە زیندووین
وشەیەک پڕتاسەتر لە پەژارە و
لێوانڕێژتر لە داخ و کەسەر
بە ڕۆحمانەوە ئاگر دەگرێت و
هەڵقرچاندنی ڕێگەوبانمان
بە دەمارەکانی ژیانماندا دەگێڕێت و
کسپەیەک دیسانەوە برینی درێژی
کاولیی جادەکانمان ئەگێڕێتەوە بۆ
ژیانمان و
پرسەی بێدەنگیمان ئەگێڕێت بۆ نەبیستنی بەرپرسانی بێخەمنشین
ژیان
ئەبێ چەن ڕۆحی تر سەرگەردانی بەرزەخی بێخەمی بن تا ڕێگەیەک لە شارێکەوە بۆ شارێک لە پێچ و خەم دەرباز ببێت؟
ئەبێ چەن هەژاری تر نەگاتەوە باوەشی خێزانی چاوەڕێی
تا بازرگانی بەسەر جەستەی بێتاوانانەوە نەچەرخێت؟
دەربڕینی داخ تەنیا هاوارێکە بۆ ئاسمانێکی خاڵی لە ئەستێرە
ڤەژینبوکس