✓ قسەی خۆش با ون نەبێ
حەکیمێک لە کەسێکی پرسی: ڕۆژگار چۆنە بەلاتەوە؟
کەسەکەش بە ناڕەحەتییەوە وتی: چی بڵێم؛ ئەمڕۆ لەتاو برسێتی بە ناچاری ئەو گۆزەگڵینەیەی کە یادگاریی سێسەد ساڵ لەمەوپێشی باوباپیرانم بوو فرۆشتم هەتاکوو نانی ئەمڕۆی پێ بکڕم...
حەکیمەکەش وتی: خوا ڕزقی تۆی لە سێسەد ساڵ لەمەوپێشەوە بۆ داناوی، تۆش بەم شێوەیە ناشوکری ئەکەی؟
✓ شێرکۆ بێکەس
لەو دڵە زۆر ڕەقەی تۆشدا
پەیڤێکی نەرمی هەر تیایە
بەڵام چی بکەم
بۆی ناگەڕێی ...
✓ نەدیم
دڵ لەسەر پشکۆی فیراقت وەک سەماوەر هاتە کوڵ
بێرەوە چــــــای بەبێ شەکـــــــری لێوت چـــــــا نییە
✓ خاڵە قازی
لەبیرمە لە مەکتەبا دەیانپرسی دوو دانە دوو دەکاتە چەند
هەموو تێکڕا دەیاننووسی دەکاتە چوار
کەچی ئەمن لە حیسابا نمرەی کەمم ئەهێنا و ئەهاتمە خوار
ئەویش تەنیا لەبەر ئەوەی
لای من وا بوو
دوو دانه دوو دەبێتە یەک نابێته چوار
لای من وا بوو
ددان و دوو لیو و زوبان نابن بە چوار دەبن بە زار
بە تێکڕایی دەکەن هاوار
لای من وا بوو
دوو دەست و دوو لاقی مرۆڤ نابن بە چوار
لە لەشێکدا وا دێنە کار
لای من وابوو
گەڕەک
خانوو
کۆڵان
شەقام
نابن بە چوار
دەبن بە شار
تێیدا دەژین دەوڵەمەند و خەڵکی هەژار
لای من وا بوو
کۆلکە و ڕیشە
لق و گەڵا
نابن بە چوار
دەبن بە دار
هێندێک کورت و هێندێک درێژ وەکوو چنار
لای من وا بوو ئەوین و دڵ
جوانی و پاکی نابن بە چوار
دەبن بە یار لەلای دڵدار
ئەو هەمووە هیوا دوو بە دوو دەبن بە یەک نابن بە چوار
ئێجگار زۆرن بەڵام لە کوێ دێنە ژمار
تەنیا ئەوەندە ئەزانم
ئەگەر لەشم سەد پارچە کەن
بمدەنە ژێر گوللە و ڕەگبار
بچمە سەر دار
یەک وشەم دێتە سەر زار
کوردستان هەر وڵاتێکە و نابێ بە چوار
✓ ئەحمەد موختار جاف
خوێنی پــاکی لاوی کــوردانە ڕژاوە کێو و کەژ
بۆیە وا ئێستاکە سوورە ڕەنگی گوڵناری هەیە
✓ کەماڵی
كە وەسڵت دەست بدا بۆم هیچ خەیاڵی حووری عین ناكەم
گەدای بەر دەركی تۆ بم مەیلی فیردەوسی بەرین ناكەم
كە زوڵف و پەرچەمی چین-چینی تۆ سایەی سەری من بێ
ئەبەد گەر بمدرێتێ پادشاهی موڵكی چین ناكەم
لە شەوقی ماچی لێوی شەككەرینت دڵ وەها مەستە
هەتا ماوم خەیاڵی قەند و نوقڵ و ئەنگەبین ناكەم
بەحەققی جووتە چاوی مەستی نازت گیانی شیرینم
بەشەو بێ یادی ڕووی تۆ سەر لەسەر گۆشەی سەرین ناكەم
نگینی خاڵی تۆم مەنزوورە خاكی بەر دەرت جێمە
[سولەیمان]ـی زەمان بم ئارەزووی تەخت و نگین ناكەم
✓ مەحوی
دەپرسی بۆ چی من دەرکەوتم و دڵ بوو لە تۆ غاین
کە وەختێ ڕۆژ هەڵات ئەڵبەت دەبێ شەونم لە خۆ غایب
✓ ئەحمەد موختار جاف
دەشوبهێ حاڵی [ئەحمەد] وەقتی وەسڵت
بە ڕۆژهەڵهـــــاتن و ئەحـــــواڵی ئــــــــاونگ
● ئاونگ: زوقمی بەیانیان بەسەر گەڵا و گوڵەوە - شەونم
✓ قسەی خۆش با ون نەبێ
لە کاتی دەسەڵاتی شای ئێراندا مامۆستایەک لە قوتابییەکی پرسی: ئادەی کوڕم پێم بڵێ کێ کارەبای دروست کرد؟ قوتابییەکە وتی: مامۆستا! جەنابی شا کارەبای دروست کرد. مامۆستاکەش نەیوێرا بڵێ ڕاست نییە وتی: ئەدیسۆنیشی لەگەڵدا بوو ...
✓ قسەی خۆش با ون نەبێ
ماموستا: بە ئينگلیزی بە تەماتە ئەڵین چی؟
قوتابی: توماتوس
ماموستا: ئەی بە پەتاتە؟
قوتابی: پوتاتوس
ماموستا: ئەی بە خەیار ئەڵین چی؟
قوتابی: خەیاروس
ماموستا: دانیشە هەی سەخیفوس ...
✓ قسەی خۆش با ون نەبێ
سێ کەس درەنگ دەگەنە لای شەمەندەفەڕ و شەمەندەفەڕەکە خەریکە ڕێ ئەکەوێت و ئەوانیش بەدوایدا ڕائەکەن و دوانیان فریای ئەکەون و سوار دەبن. ئەویانە کە بەجێ ماوە دەس ئەکات بە پێکەنین. خەڵکێکی زۆر کۆ دەبنەوە و ئەڵێن ئەوە بە چی پێئەکەنیت؟ ئەویش ئەڵێ: وەڵڵاهی ئەوەی ڕاسی بێت ئەو دوو کەسە هاتبوون خواحافیزی لە من بکەن.
ڤەژینبوکس