٤٥٧٩
✓ حەریق (1856 - 1909)
عالەمێکە پڕ شەڕ و شۆڕ و نیزاع و ئیرتیهاش
ڕۆژگارێکە سەراسەر میحنەت و پڕئیغتیشاش
کەس نییە بۆ ئیستراحەت سەر بنێتە سەر سەرین
کەس نییە ئاسوودە بێ پاڵووی لە خاری ئیفتیراش
تالیبی ئیمساک و خیسسەت ڕووبەڕوو هاتۆتە پێش
ساحیبی عیرفان و دانیش سەربەزانوو چۆتە پاش
بۆ سلووکی ڕێی مەعاریف پاڵەوانیش ناتەوان
بۆ تەریقی جەزبی جیفە وەک یەکە ورد و هەراش
نان و ئاوی ئەهلی دڵ هەر غوسسەیە و خوێنی جگەر
دەستی بەرداوە لە عورزە تالبی نانی بەلاش
هەر کەسێ دانگێ شعووری بێ شەعیرێکی هەیە
ئەبلە بێدەنگ بۆتە ساحیب موڵکی شەشدانگ و مەعاش
گەر بە تێڵا و زۆر نەبێ ڕۆزی وەدەس کەس ناکەوێ
شاهیدە بۆ موددەعای ڕاست حوکمی قازی و کیری جاش
دین بە زاییع چوو مەگەر بۆی ڕێک کەوێ پیاو ناگەهان
وەک کەلیموڵڵا خودا کردیە دەلیلی سەنگتراش
نەک وەکوو قازی زەرووری و وەک مەلای ناخوێندەوار
یا خەڵیفە کۆڵەتاش و مورشیدی خۆهەڵتراش
یا وەکوو من بەخت و تالیع یاوەر و یارم نەبوو
جێی موتاڵا و نۆرەدەرسم بوو بە دەورەی نۆبەئاش
وەک ئەرەستوو بم جیهانگیرم سکەندەر بێ نییە
جارێ بابایێ ڕەفیقم بێ وەکوو وێڵداشی باش
ڤەژینبوکس