✓ سەیید کامیل ئیمامی (1903 - 1989)

ئەی سەییدی کائینات و جێی شانازی
زێدە لە پەیامبەران ئەتۆ شابازی

ئەم نۆکەری خاکی پاکی بەر دەرک و دەرت
پاڕاوە لە لات، نەهاتە جێ داخوازی

گەپجاڕی هەموو کەس و لەبەرچاوکەوتوو
فریای نەکەوی، نەماوە پۆز و نازی

ناڵێم منی شەرمەسار بڵندم بە نەسەب
سەرشۆڕم ئەمن، ئەتۆ بڵندپەروازی

بۆ خوارێ دەمێ نەزەر بفەرموو قوربان
تۆ خاوەنی شەققولقەمەر و ئیعجازی

با هەستمەوە، لە گێژ و خول بێمە دەرێ
ئیعجازە فەقیری وەکوو من بنوازی

ناڵێم گلەییم هەیە، ئەمن قابیلی چیم
نازی هەیە «کامیل» ـت، ئەگەر تۆ ڕازی

Kurdish_Poetry