✓ نالی (1800 - 1877)

خاڵی بەینی چاو و ئەبرۆت ئینتیخابی کاتیبە
یەعنی نوقتەی فەرقی ئیبنوموقلە و ئیبنوحاجیبە

عەیب و لەعبی خەڵقی کرد تا یاری خستە داوی خۆی
خەسمەکەی من کەلبی ئاهووگیرە، خیرسی لاعیبە

لەشکری خەتتی شکستە و تیپی زوڵفی تارومار
پادشاهی حوسنی عالەمگیری هێشتا غالیبە

حازری ئەمر و خیتابە دڵ، ئەگەرچی مەنهییە
ڕاجیعی تۆیە زەمیری من، ئەگەرچی غائیبە

«نالی» ئێستە تاجی شاهی و تەختی خاقانی هەیە
شەوکەتئارا، موحتەشەمدیوانە، فیکرەتسائیبە

Kurdish_Poetry