٢٨٦١
✓ مەحوی
بە زیکر و فیکری شیمەی موستەفا وەقتت موسەففا کە
کە باسی ئەو سەفابەخشە، تەرەبخێزە، دوڕئەفشانە
لە زیکری ئەو دەجۆشێ ڕەئفەت و ڕەحمەت دەبارێ هەم
"رءُوفُ" هەم "رحیمُ" وەسفی ئەو وەک وەسفی ڕەحمانە
لەگەڵ مەحزی خەیاڵی، دڵ بەجارێ بۆتە کێوی توور
لەکن وەسفی جەماڵی، لێوی واسیف گوڵبەدامانە
جەلال و شەوکەتی، ئەستۆشکێنی سەرکەشانی عەسر
جەمال و تەلعەتی، جەوهەرگودازی زوڵمەتستانە
هەتا هەوری بەهاری غازەکاری گوڵشەنە ئیشی
هەتا بولبول لەسەر گوڵ نەغمەخوان و ناڵەسەنجانە
بڵێن ئینس و مەلەک پڕ بەم زەمین و ئاسمانانە
"و صلی الله علی" ئەو بەحری نووری عیلم و عیرفانە
کە دەرکی غەوری ناکا "غیرُ علم الله سبحانه"
+ بڵاو کرایەوە لە 2017/12/21 ـدا کاتژمێر 19:30 بەدەستی مانگەشەوی زرێبار
|
ڤەژینبوکس