٢٨٥٣
✓ قانێع
عومرەکەم باریک و کورتە، ئارەزووم پان و درێژ
فیکرەکەم فیکری ئەدیبە و سوورەتیشم گێژووێژ
ئاوی لافاوی خەیاڵم، ھێندە ساف و ڕۆشنە
ئاویاری خۆی ئەکا، بێ فەرقە لای ھەوراز و لێژ
بێ تەماشا کە لە کوردا، دائەپۆشێ شیعری من
پژدەر و گۆران و سۆران، جافەتی و شیروان و گێژ
گەر لە نوکتەی خامەکەم دیقەت بکەی، ئیقرار ئەکەی
سەربەسەر یاقووتی سوورە و شەوچراغی شوعلەڕێژ
شەخس وەختی عالمە، عالم بە ھەر ئەشیا ببێ
بێسەواد وا تێ ئەگا، زانین ھەموو دەسنوێژە و نوێژ
«قانعا» مونکیر ئەگەر فیکری کولی ئامادە کا
بێنە دەر تێغی زمانت ھەر وەکوو شمشێری تیژ
+ بڵاو کرایەوە لە 2017/12/16 ـدا کاتژمێر 21:16 بەدەستی مانگەشەوی زرێبار
|
ڤەژینبوکس