✓ عاجز (1929 - 1967)

لە عیشقی چاوی غەممازی غەزەلخوانی نەکەم چ بکەم
لە نازی تاوسی چین، سینەسووزانی نەکەم چ بکەم

عەجائیب مانگی چاردەم دی، دوو مانگی یەکشەوەی پێ بوو
لەگەڵ دوو زەهرە لەم تەرتیبە حەیرانی نەکەم چ بکەم

لە باغی یار کە جاری بووی گوڵێکم کرد فیراقم بوو
ئیتر جانم فیدای خاوەن گوڵستانی نەکەم چ بکەم

شەڕابی لەعلی لێوی گەر بخۆن وەک من دەبن ڕیسوا
مەکەن لۆمەم کە فیکری مەیلی جارانی نەکەم چ بکەم

ڕەقیبی سەگسیفەت مەنعی ویسالی یاری لێ کردم
بە ئەفکار خۆم هیلاکی تیری موژگانی نەکەم چ بکەم

لە غەم تازە خەلاس نابی دڵی دێوانە و مەفتوون
نەما سەبرم خەیاڵی خەتت و خاڵانی نەکەم چ بکەم

لە حەسرەت ڕوویی لەیلا «عاجز» ـم مەجنوونسیفەت ناچار
وەکوو بولبول لە دەوری گوڵ سەحەرخوانی نەکەم چ بکەم

Kurdish_Poetry