٤٤١٤
✓ کەمالی (1886 - 1974)
فەلەک نادا هەتا ڕۆژی قیامەت مەقسەدی دانا
ئەوەی دانا بێ داماوە هەمیشە وا لە زیندانا
دەخیلم ئەی سەبا تێکی نەدەی لانەی دڵی زارم
کە ئێستا وا لەناو پێچوخەمی زوڵفی پەرێشانا
نیگارم یا مەلەک یا خۆ پەری یا حۆرییە بێشک
مەحاڵ و سەعبە حوسنی وا تەجەللا کا لە ئینسانا
لە باخا پەست ئەبێ بۆ ئیمتحان و تەجرەبە ڕۆژێ
بەرانبەر کەن ئەگەر باڵات لەگەڵ سەروی خەرامانا
لە دووری تۆ هەمیشە شیوەن و زاری ئەکەم قوربان
ئەگەرچی وام لەناو جەمعی پەریڕوویانی تارانا
لەناو کوردی عێراقا ئەی «کەمالی» شیعری ڕەنگینت
ئەوەن مەرغووبە هەر وەک شیعری قائانی لە ئێرانا
+ بڵاو کرایەوە لە 2021/12/12 ـدا کاتژمێر 21:39 بەدەستی مانگەشەوی زرێبار
|
ڤەژینبوکس