٤٣٧٦
✓ شێرکۆ بێکەس (1940 - 2013)
وەختێ ڕووبارێک بەند ئەکرێ
ڕووبارەکانی تر لە جووڵە و ڕۆیشتن ناکەون و
سەرچاوە هەر هاژەیەتی
کە لووتکەی شاخێک ئەگیرێت
سەد لووتکەی تر سەر هەڵەبڕن
درەختێکمان پێوەند ئەکەن
لە گشت لاوە
دارستان و بێشەڵانمان ڕائەپەڕن
کە هەڵۆیەک زنجیر ئەکەن
سەدان هەڵۆمان باڵ ئەگرن
ئەوان ئۆجەلانـیان فڕاند
بەڵام هەرگیز بەربەرییەکان بۆیان ناکرێ
لەناو گیانی ملیۆناندا، خۆشەویستی ئۆجەلان و
عەشقی خاک و کوردایەتی و تیشکی ئازادی بفڕێنن
چۆن ئەتوانن شاخ بفڕێنن
مانگی شەهیدان بفڕێنن
شار بفڕێنن
خۆر بفڕێنن
سروودەکانمان بفڕێنن
چۆن ئەتوانن سلەیمانی و دیاربەکر بەنج بکەن و
چۆن ئەتوانن ئاگری نەورۆز پێوەند کەن و
بە چی چاوی ڕەشەبامان ئەبەستنەوە
چۆن زریان و شەپۆلەکان کۆت ئەکەن و
چۆن ئەتوانن زەریاچەی وان بگوێزنەوە
بە چی کەلەپچەی باوەڕ و هەقمان ئەکەن
لەگەڵتانم
لەم شەوەدا و لەناوتاندا ئەنگوستی شیعرم هەڵ ئەکەم
ئەگەر هیچیشم پێ نەکرێ، خۆ من خەونی پەپوولەیەک
لەبەر شەوقی پەنجەکانما ئەهێنمە دی
ڤەژینبوکس