٤٣٢٣
✓ قانع (1898 - 1965)
ئەی وەتەن! یەعقووبی تۆم و یووسفم لێ گوم بووە
ئەی وەتەن! بەدناوی تۆم و ئابڕووم بۆ تۆ چووە
کێ فرۆشتیتی بەوەڵڵاهـ، نانی خوێڕی خواردووە
ڕیشی نامەردی درێژە، سادقە بەچکەی جووە
ئەی خوا هەستێ لە خەو، ئەم بەختە حیزەی نووستووە
ئەی وەتەن! کەی خۆش ئەبێتۆ، زامی پڕئێش و بەسۆت
عەیبی بێخێویت نەبێ، هەر زێڕ و زیوە تانوپۆت
دێتە مێشکم کوللی ڕۆژێ، دەنگی ناڵە و ڕۆڵەڕۆت
شەرتە ڕۆحی خۆم و سێ کوڕ، کەم بە قوربانی لەبۆت
کێ ئەڵێ ئەم بێشە چۆڵە شێرەکانی نووستووە
دوژمنان بۆ چی بەناحەق هەر خەریکی هاتوچوون
خۆی لە من چاکتر ئەزانێ ئەو لەگەڵ کورد بووک و شوون
ناخەنە خۆیان دە چی بکەم بێحەیا و بێئابڕوون
بەچکەشێری نیشتمانم شێرەزای شێرانی زوون
ڕشتنی خوێنی عەدوو بۆ کورد بە ئیرسێ هاتووە
ئەی وەتەن! دیقەت لە حاڵی تۆ ئەکەم عەیبت نییە
ساحیبی ڕزق و کەرامەت، خاکەکەت فیردەوسییە
تۆزەعەیبێکت ببێ هیچ تر نییە بێعیلمییە
پێم بڵێن عاقڵانی کوردستان وەجهی چییە؟
لاوەکانی کوردستانم شانیان کز کردووە
گەر لە شارێکدا یەکێکمان ڕوبعەدینارێک ببا
یا بە نانی خۆیەوە ئیشێ لەبۆ خەڵکی بکا
بابی خۆی بۆ سەر بڕی ڕازی نییە با بیشیخوا
خۆی ئەڵێ هەر کەس کە نانی کێ بخوا شوکری بکا
ناڵێ ئەم ڕوبعە لە کوێیە و کێ لەبۆمی ناردووە
کەی لە ئیستیهلاکی خورما عانەیێ نێردرایە ژوور
یاخۆ پارەی ... ـانە خەرج کرا بۆ شارەزوور
خۆشە لای ئەبلە و نەزان دەنگی دەهۆڵ و دەشتی دوور
با کەمیش بێ تۆ مەنووچیهر و ئەویش وەک سەلم و توور
یەک وەلەو کەم بێ براکەم، چاکە هەر نیوەی دووە
«قانعا» تا کەی بە شێتی بۆ وەتەن تەگبیر ئەکەی
بێنەتیجە بۆ چی بۆ مردوو وەها تەقریر ئەکەی
یا لەبۆ ئیبرازی جەوهەر خۆتە وا تەحریر ئەکەی
دەک درۆ ماڵی بشێوێ، شەرتە تۆش تەزویر ئەکەی
داکەوە بۆ خۆت لە کونجێ، چیتە لەم هاتوچووە
ڤەژینبوکس