٣٥٤٦
✓ سالم
بە ڕوخ ڕەنگین و دڵ سەنگین، میان لاغیر، کەمەر زەڕڕین
نیگەھ شاهین و موو موشکین زەنەخ سیمین و لەب شیرین
لەبت شەککەر خەتت عەنبەر موژەت خەنجەر قەدت عەرعەر
لە عیشقت دڵ وەکوو بولبول لە ڕووتا گوڵ وەکوو گوڵچین
سەهی قامەت قەوی شەوکەت قەمەر تەلعەت مەلەک خەسڵەت
کەمان ئەبروو نیگەھ ئاهوو فەڕەنگی خووی موو موشکین
بە ڕوخ وەک شەم بە ئەبرۆ خەم، سیەھ پەرچەم لە من بێغەم
گوارەی توو کە هات و چوو موقارین بوو مەھ و پەروین
بە چین زوڵفت ئیحاتەی دا وەکوو سونبول لە دەوری گوڵ
بە موو هەر سوو لە ڕێگەی موو بەڕووی دڵما دەکەی پەرژین
چهار فەسڵی لە هەر فەسڵا بە یەک دەم وا لەلای «سالم»
بەهار ئەشک و خەزان ڕەنگ و زومستان ئاھ و دڵ هاوین
+ بڵاو کرایەوە لە 2019/7/29 ـدا کاتژمێر 0:21 بەدەستی مانگەشەوی زرێبار
|
ڤەژینبوکس